26-Nov-2021

ବଲାଙ୍ଗିର, ଭାରତର ବିଶିଷ୍ଟ ଗାନ୍ଧୀବାଦୀ ତଥା ଜାତୀୟ ଯୁବ ପ୍ରକଳ୍ପ ପ୍ରତିଷ୍ଠାତା ଡ. ଏସ୍‌.ଏନ୍‌. ସୁବାରାଓ ଜୀ  (ଭାଇଜୀ) ଗତ ଅକ୍ଟୋବର ୨୭ ତରିଖରେ ଦେହାନ୍ତ ହୋଇଯିବା ପରେ ଭାରତ ବର୍ଷରେ ଭାଇଜୀଙ୍କ ସାଥି ସହଯୋଗୀମାନଙ୍କ ଦ୍ୱାରା ବିଭିନ୍ନ ଜାଗାରେ ଶ୍ରଦ୍ଧାଞ୍ଜଳୀ ସଭା ଆୟୋଜନ କରାଯାଉଛି । ଏହି କ୍ରମରେ ବଲାଙ୍ଗିର ଜିଲ୍ଲା ଜାତୀୟ ଯୁବ ପ୍ରକଳ୍ପ ଓ ଅନ୍ୟ ଅନୁଷ୍ଠାନମାନଙ୍କ ସହଯୋଗରେ ବଲାଙ୍ଗିର ଯାଦବ ଭବନ ଠାରେ ଏକ ସାମୁହିକ ଶ୍ରଦ୍ଧାଞ୍ଜଳି ସଭା ଆୟୋଜନ ହୋଇଯାଇଛି । ଏଠାରେ ସମସ୍ତେ ଭାଇଜୀଙ୍କ ଜୀବନଯାତ୍ରା ସମ୍ପର୍କରେ ମତାମତ ରଖିଥିବା ବେଳେ ଜାତୀୟ ଯୁବ ପ୍ରକଳ୍ପ ଆବାହକ ମଧୁସୁଦନ ଦାସ ଭାଇଜୀଙ୍କ ଜୀବନ ଦର୍ଶନ ସମ୍ବଳିତ ତଥ୍ୟ ଉପସ୍ଥାପନ କରିଥିଲେ । ଚମ୍ବଲ ଘାଟିରେ ୬୫୪ ଜଣ ଡକାୟତମାନଙ୍କ ଆତ୍ମ ସମର୍ପଣ ପଛରେ ସୁବାରାଓ ଜୀଙ୍କ ଭୂମିକା ବିଶେଷ ଭାବରେ ଥିଲା ବୋଲି ବକ୍ତାମାନେ ମନ୍ତବ୍ୟ ଦେଇଥିଲେ । ରାଷ୍ଟ୍ରୀୟ ଏକତା ସାମ୍ପ୍ରଦାୟିକ ସଦ୍‌ଭାବନା ପାଇଁ ଭାଇଜୀ ଲକ୍ଷ ଲକ୍ଷ ଯୁବକ ଯୁବତୀମାନଙ୍କୁ ପ୍ରଶିକ୍ଷଣ ଦେଇ ରାଷ୍ଟ୍ର ଗଠନରେ ଯୁବ ଶକ୍ତି କୁ ସାମିଲ କରିବାରେ ଅଗ୍ରଣୀ ଭୂମିକା ଲିଭାଇଥିଲେ । ଜଣେ ରାଷ୍ଟ୍ର ପ୍ରେମୀ, ଗାନ୍ଧୀ ବିଚାରକ, ସର୍ବଧର୍ମ ସମନ୍ୱୟ ବିଶ୍ୱାସ ରଖୁଥିବା ଭାଇଜୀ ଆମ ଗହଣରେ ନାହାନ୍ତି ସତ ତାଙ୍କ ବିଚାରକୁ ବଲାଙ୍ଗିର ମାଟିରେ ଆଗକୁ ନେବା ପାଇଁ ବିଶିଷ୍ଟ ସମାଜସେବୀ ସନ୍ଦିପ ବାଗ, ଶଙ୍କର ପାଣିଗ୍ରାହି, ଜଗନ୍ନାଥ ପ୍ରସାଦ ମାହାଣା, ସଦାନନ୍ଦ ଦେବତା, ଅଜୟ ବାଲି, କାହ୍ନା ଶତପଥି, ନିରଞ୍ଜନ ଅଗ୍ରୱାଲ, ଶଙ୍କୁଶ ପାଣ୍ଡିଆ, ବଲାଙ୍ଗିର ସ୍ୱେଚ୍ଛାସେବୀ ସଙ୍ଗଠନ, ଜିଲ୍ଲାର ବିଭିନ୍ନ ସଂଗଠନର କାର୍ଯ୍ୟକର୍ତ୍ତା ଉପସ୍ଥିତ ଥିଲେ ।