29-Aug-2021

ବିନିକା(ହିମାଂଶୁ ଶେଖର ପୁଟେଲ)- କିଛି ଦିନ ହେଲା ଦୁର୍ନୀତି ଖୋର ସରକାରୀ କର୍ମଚାରୀ ମାନଙ୍କ ଉପରେ ଭିଜିଲାନ୍ସ ବିଭାଗର ଆଖି ପଡ଼ିବା ଓ ସେମାନେ ରଖିଥିବା ଆୟ ବହିର୍ଭୁତ ସମ୍ପତି ଜବତ ହେବା ଘଟଣା ପରେ ସରକାରୀ କର୍ମଚାରୀ ମହଲରେ ଏକ ପ୍ରକାର କୋକୁଆଭୟ ସୃଷ୍ଟି କରିଛି l ଯାର ଜ୍ୱଳନ୍ତ ଉଦାହରଣ ଆଜି ଦେଖିବାକୁ ମିଳିଛି ସୁବର୍ଣ୍ଣପୁର ଜିଲ୍ଲାର ବିନିକା ଠାରେ l ଘଟଣାରୁ ପ୍ରକାଶ ଯେ ବରଗଡ଼ ଜିଲ୍ଲା ବିଜେପୁର ବିଡ଼ିଓ ପଦ୍ମନାଭ ସାମନ୍ତରାୟ ଏକ ଭଡ଼ା ଗାଡ଼ିରେ ଲକ୍ଷାଧିକ ଟଙ୍କା ଧରି ବିନିକା ଦେଇ ନିଜ ଗ୍ରାମ ପୁରୀ ଜିଲ୍ଲା ଗଡଚାନ୍ଦପୁରକୁ ଯାଉଥିଲେ l କୌଣସି ସୂତ୍ରରୁ ଖବର ପାଇ ସୁବର୍ଣ୍ଣପୁର ଜିଲ୍ଲା ଭିଜିଲାନ୍ସ ବିଭାଗ ବିନିକା ଠାରେ ଲୁଚିଛପି ରହି ତାଙ୍କୁ ନିରୀକ୍ଷଣ କରୁଥିଲେ l ବିଡ଼ିଓ ଶ୍ରୀ ସାମନ୍ତରାୟ ବିନିକା କଲେଜ ଛକ ରାସ୍ତା ଦେଇ ଯାଇଥିବା ମହାନଦୀ ସେତୁ (ବ୍ରିଜ) ଆଡ଼କୁ ତାଙ୍କ ଗାଡ଼ି ଅତିକ୍ରମ କରୁଥିବା ଦେଖି ପୂର୍ବରୁ ଲୁଚିଛପି ଥିବା ଭିଜିଲାନ୍ସ ବିଭାଗ ଅଧିକାରୀମାନେ ହଠାତ ଗାଡ଼ିକୁ ଅଟକାଇ ବିଡ଼ିଓଙ୍କୁ ପଚାରିଥିଲେ l ହେଲେ ବିଡ଼ିଓ ପଦ୍ମନାଭ ରଖିଥିବା ଟଙ୍କାର ପରିମାଣ କହିପାରି ନ ଥିଲେ l ପରେ ଭିଜିଲାନ୍ସ ବିଭାଗ ଗାଡ଼ିକୁ ଟିକିନିଖି ଯାଞ୍ଚ କରିବା ପରେ

ଗାଡିରୁ ୩ଲକ୍ଷ ୫୧ହଜାର ଟଙ୍କା ପାଇଥିଲେ ଓ ବିଡ଼ିଓ ଶ୍ରୀ ସାମନ୍ତରାୟଙ୍କୁ ସୁବର୍ଣ୍ଣପୁର ଭିଜିଲାନ୍ସ କାର୍ଯ୍ୟାଳୟକୁ ଆଣି ଅଟକ ରଖିବା ସହ ପଚରାଉଚୁରା କରୁଥିବା ଜଣାପଡିଛି l ଏହି ଘଟଣା ପରେ ବିନିକା ଅଞ୍ଚଳର ଲାଞ୍ଚଖୋର ସରକାରୀ କର୍ମଚାରୀ ମହଲରେ କୋକୁଆଭୟର ବାତାବରଣ ସୃଷ୍ଟି କରିଥିବା ସାଧାରଣରେ ଚର୍ଚ୍ଚା ହେଉଛି l