12-Aug-2021

ଲୋଇସିଂହା/ଆଗଲପୁର, (ବିନୋଦ କୁମାର ଦୀପ): ରାଜ୍ୟ ତଥା କେନ୍ଦ୍ର ସରକାର ଗ୍ରାମାଞ୍ଚଳରେ କ୍ରୀଡ଼ାର ବିକାଶ ପାଇଁ କୋଟି କୋଟି ଟଙ୍କା ବ୍ୟୟ ବରାଦ କରୁଥିବା ବେଳେ ବଲାଙ୍ଗୀର ଜିଲ୍ଲା ଆଗଲପୁର ବ୍ଲକରେ ଏହା ପ୍ରହସନ ପାଲଟିଥିବା ଦେଖିବାକୁ ମିଳିଛି । ପୁଣି ଏକ ମନରେଗା ଦୁର୍ନୀତି ଦେଖିବାକୁ ମିଳିଛି ଆଗଲପୁର ବ୍ଲକ ନଅଗାଁ(ଖ) ପଂଚାୟତ ସାନଟିକା ଗ୍ରାମରେ ନିମ୍ନମାନର ଖେଳ ପଡିଆ ନିର୍ମାଣ କରି ଠିକାଦାରଠୁ ଆରମ୍ଭକରି ସରକାରୀ ଅଧିକାରୀ ମାଲେମାଲ ହୋଇଥିବା ବେଳେ ଖେଳପଡ଼ିଆ ଉନ୍ନତିକରଣର ବର୍ଷେ ନପୁରୁଣୁ ତାହା ଖେଳିବା ଅନୁପଯୋଗୀ ହୋଇ ପଡ଼ିରହିଛି l ପଡ଼ିଆ ଚାରିଆଡେ ବସିବା ପାଇଁ ସିମେଣ୍ଟ ବେଞ୍ଚ ହେବା ବଦଳରେ ସେ ଅର୍ଥକୁ ଆତ୍ମସାତ କରି ଦୁରୁପଯୋଗ ହୋଇଥିବା ସ୍ପଷ୍ଟ ଦିଶୁଛି l ଏପରିକି ଶ୍ରମିକକୁ କାମ ଦେବା ବଦଳରେ ମେସିନ ସାହାଯ୍ୟରେ କାମ କରାଯିବା ସହ କିଛି ଶ୍ରମିକଙ୍କ ବ୍ୟାଙ୍କଖାତାରେ ଟଙ୍କା ପଡିବା ମନରେଗାରେ ଅର୍ଥ ହଡ଼ପ କରି ହରିଲୁଟ ହୋଇଥିବା ଅଭିଯୋଗ ହୋଇଛି l ସାନଟିକା ଗାଁରେ ୨୦୨୦-୨୧ ରେ ମନରେଗା ଯୋଜନାରେ ଫାଇଲ ଖୋଲାଯାଇ ୫ ଲକ୍ଷ ଟଙ୍କା ବ୍ୟୟରେ ଖେଳପଡିଆ ନିର୍ମାଣ ହୋଇଥିବା ସୂଚନା ଫଳକରେ ଉଲ୍ଲେଖ ରହିଛି l ତେବେ ୨୦୨୧-୨୨ ବର୍ଷରେ ପୁଣି ଏହି ଖେଳପଡିଆ ନିର୍ମାଣ ପାଇଁ ଆଉ ୫ ଲକ୍ଷ ଟଙ୍କା ଯୋଗାଇ ଦିଆଯାଇଥିବା ଜଣାଯାଇଛି l ଖେଳପଡ଼ିଆ ଉନ୍ନତିକରଣ କାର୍ଯ୍ୟ ସମ୍ପୂର୍ଣ୍ଣ ନ ହୋଇ  ୨୦୨୦-୨୧ ବର୍ଷର ଅନୁଦାନ ଅର୍ଥ ଉଠି ସାରିଥିବା ଅଭିଯୋଗ ହୋଇଛି l ଦାୟିତ୍ୱରେ ଥିବା ପଂଚାୟତ ନିର୍ବାହୀ ଅଧିକାରୀ ତଥା କନିଷ୍ଠ ଯନ୍ତ୍ରୀଙ୍କୁ ଯୋଗାଯୋଗ କରାଯାଇଥିଲେ ସୁଦ୍ଧା ତାଙ୍କ ପ୍ରତିକ୍ରିୟା ଏ ପର୍ଯ୍ୟନ୍ତ ମିଳିପାରି ନାହିଁ l ଆଗଲପୁର ବିଡ଼ିଓ ଭୁବନ ଶତପଥୀଙ୍କୁ ପଚାରି ବୁଝିବାରୁ କଣ କାମ ହୋଇଛି ସେ ବୁଝି ପରଖିଵା ପରେ କହିବି ବୋଲି ପ୍ରକାଶ କଲେ l ଏଥିରୁ ସ୍ପଷ୍ଟ ଜଣା ପଡୁଛି ଯେ ମନରେଗାର ଦୁର୍ନୀତି ବାଟ ତଳୁ ଉପର ଯାଏ ଲମ୍ବିଛି l ପଡିଆ ନିର୍ମାଣରେ ପ୍ରଶାସନିକ ଅଧିକାରୀ ଏବଂ ଠିକାଦାର ମଧ୍ୟରେ  ମଧୁଚନ୍ଦ୍ରିକା ଯୋଗୁଁ ଏଭଳି ଅବସ୍ଥା ହୋଇଛି ବୋଲି ସାଧାରଣରେ ଚର୍ଚ୍ଚା ଜୋର ଧରିଛି l ତେବେ ସବୁଠାରୁ ବଡ ପ୍ରଶ୍ନ ସାନଟୀକା

ଖେଳପଡିଆ ନିର୍ମାଣରେ ହୋଇଥିବା ଅନିୟମିତତାର  ତଦନ୍ତ କରିବେ କି ସରକାରୀ ଅଧିକାରୀ ?  ଏଣୁ ବଲାଙ୍ଗୀର  ଜିଲ୍ଲାପାଳ ତଥା ଡିଆରଡିଏ ପ୍ରକଳ୍ପ ନିର୍ଦ୍ଦେଶକ ଏଥିପ୍ରତି ସ୍ୱତନ୍ତ୍ର ଭାବେ ଦୃଷ୍ଟିଦେବା ସହ କ୍ରୀଡ଼ାର ବିକାଶ ଚିନ୍ତା କରୁଥିବା ମନ୍ତ୍ରୀ ତୁଷାରକାନ୍ତ ବେହେରା ଏଦିଗରେ ଧ୍ୟାନ ଦେଇ ଦୁର୍ନୀତି ଗ୍ରସ୍ଥ ସରକାରୀ ଅଧିକାରୀ  ଏବଂ ଠିକାଦାରଙ୍କ ବିରୁଦ୍ଧରେ ଉଚିତ କାର୍ଯ୍ୟାନୁଷ୍ଠାନ କେବେ ନେଉଛନ୍ତି ଦେଖିବାକୁ ବାକି ରହିଲା ।