08-Aug-2021

 । ଜଗତସିଂହପୁର/କୁଜଙ୍ଗ(ନୃସିଂହ ବାରିକ) : ଜଗତସିଂପୁହର ଜିଲ୍ଲାର କୁଜଙ୍ଗ ବ୍ଲକ ସିଡିପିଓ ଙ୍କ କାର୍ଯ୍ୟାଳୟ ଏବେ ଦୁର୍ନୀତି ର ଗନ୍ତାଘର ପାଲଟିଛି । ଅଙ୍ଗନବାଡି କେନ୍ଦ୍ର ଗୃହ ନିର୍ମାଣ,ବିଭିନ୍ନ ପ୍ରକାର ଶିଶୁ ଖାଦ୍ୟ,ପ୍ରି ସ୍କୁଲ କିଟ୍,ପୋଷାକ,ବୁଟ୍ ମୋଜା ଯୋଗାଣରେ ବ୍ୟାପକ ଅନିୟମିତତା ହୋଇଥିବା ସାଧାରଣରେ ଆଲୋଚନା ହେଉଛି । ମାନସ ନାମରେ କେହି ଜଣେ ଯୁବକ ଅସାଧୁ ଉପାୟରେ ପଦସ୍ଥ ଅଧିକାରୀ ଓ କିରାଣୀ ଙ୍କୁ କରାୟତ କରି ସମସ୍ତ କାର୍ଯ୍ୟ କରୁଥିବାର ଜଣାପଡିଛି । କମିଟି ନାମକୁ ମାତ୍ର ସିଡିପିଓଙ୍କ ନିର୍ଦ୍ଦେଶରେ ସବୁକିଛି କାର୍ଯ୍ୟ ଚାମଚା ମାନସ କୁ ହିଁ କରିବାକୁ ଦିଆଯାଇଥାଏ । ଏହି ଯୁବକ ର ମା ଓ ସ୍ତ୍ରୀ ସଭାପତି ଓ ସଂପାଦକ ଥିବା ସ୍ବୟଂ ସହାୟକ ଗୋଷ୍ଠୀକୁ ପ୍ରାୟ ୧୭୫ ଟି ଅଙ୍ଗନବାଡି କେନ୍ଦ୍ରକୁ  ଛତୁଆ ବଣ୍ଟନର ଦାୟିତ୍ୱ ଦିଆଯାଇଛି । ଅତ୍ୟନ୍ତ ଅସ୍ବାସ୍ଥ୍ୟକର ପରିବେଶ ମଧ୍ୟରେ ନିମ୍ନମାନର ଛତୁଆ ପ୍ରସ୍ତୁତ କରି ଏମାନେ ଯୋଗାଇଥାନ୍ତି। ଯେଉଁଥିରେ ସରକାରଙ୍କ ନିର୍ଦ୍ଧାରିତ ପରିମାଣର ଗହମ,ବୁଟ ଓ ଚିନି ନଥାଏ। ଛତୁଆ ପ୍ୟାକେଟ ରୁ ଅପମିଶ୍ରିତ ପୋକ ସାଲୁବାଲୁ ଛତୁଆ ଗୁଣ୍ଡ ବାହାରୁଥିବା ଦେଖିବାକୁ ମିଳିଛି । ଯାହାକି ଶିଶୁଙ୍କ ପାଇଁ ଆଦୌ ଖାଦ୍ୟ ଉପଯୋଗୀ ନୁହେଁ ବୋଲି ନିଜ ନାମକୁ ଗୋପନ ରଖିବା  ସର୍ତ୍ତରେ ଅଙ୍ଗନବାଡି କର୍ମୀ କହୁଛନ୍ତି । ୨୦୧୧ ମସିହାରୁ ଏହି ଯୁବକ ତାଙ୍କ ମା'ଙ୍କ ଏସଏଚଜି ଜରିଆରେ ନିକୃଷ୍ଟ  ଛତୁଆ ଯୋଗାଇ ଆସୁଛନ୍ତି । ଏଥିସହ ସ୍ବଳ୍ପ ମୂଲ୍ୟର ପ୍ରିସ୍କୁଲ କିଟ୍,ପୋଷାକ ଓ ବୁଟ ମୋଜା ମଧ୍ୟ ୩୩୫ ଟି ଅଙ୍ଗନବାଡି କେନ୍ଦ୍ରକୁ ପରୋକ୍ଷରେ ଯୋଗାଇ ଆସୁଥିବା କର୍ମୀ ଓ ସହାୟିକାଙ୍କ ଠାରୁ ପ୍ରକାଶ । ବୁଟ୍ ପିଲାଙ୍କର ଗୋଟିଏ ଗୋଡକୁ ବଡ ତ ଆଉ ଗୋଟିଏ ଗୋଡକୁ ଛୋଟ ହେଉଛି । ସେହିପରି ପୋଷାକ ଓ ମୋଜା ମଧ୍ୟ ଅସମାନ ରହୁଛି । ଶିଶୁଙ୍କ ବିକାଶ ପାଇଁ ସରକାରଙ୍କ ପ୍ରୟୋଜିତ ଏହି ସବୁ କାର୍ଯ୍ୟକ୍ରମରେ ସ୍ବଚ୍ଛତା କୁଜଙ୍ଗ  ସିଡିପିଓ ରଖୁନାହାନ୍ତି । ନିଜ ସ୍ବାର୍ଥ ସାଧନ ପାଇଁ ତଥାକଥିତ ସେହି ଯୁବକକୁ ଆପଣାର ଗେହ୍ଲାପୁଅ ସମ ସେ ଏଠାରେ ପ୍ରଶୟ ଦେଇଛନ୍ତି । ଅତି ଚତୁରତାର ସହ ନେପଥ୍ୟ ନାୟକ ହିସାବରେ ଏହି ଯୁବକ ସମନ୍ବିତ ଶିଶୁ ବିକାଶ ଯୋଜନା ର ସମସ୍ତ କାର୍ଯ୍ୟ କୁଜଙ୍ଗ ବ୍ଲକରେ ମନିଟରିଂ କରୁଛନ୍ତି । ଧରାପଡିଯିବା ଭୟରେ ଏକ ଖବର କାଗଜରୁ ପ୍ରେସ କାର୍ଡ ହାତେଇବା ସହ ସ୍ଥାନୀୟ ଅଞ୍ଚଳର ସାମ୍ବାଦିକ ସଂଗଠନର ସଭ୍ୟ ଓ ସଭାପତି ମଧ୍ୟ ହୋଇଛନ୍ତି । ରାଜନେତାଠାରୁ ପୁଲିସ ପ୍ରଶାସନ ସମସ୍ତେ ତାଙ୍କ ହାତ ମୁଠାରେ ଥିବା ଏହି ଯୁବକ ସବୁଠି ସର୍ବଦା କହିଆସିଥାଏ।  ଦୁଇବର୍ଷ ତଳେ କୁଜଙ୍ଗ ଗ୍ରାମ୍ଯ ପାନୀୟ ଜଳ ଯୋଗାଣ ଓ ପରିମଳ ବିଭାଗ ରେ ଠିକା ନିଯୁକ୍ତି ପାଇ ପାଇଖାନା ନିର୍ମାଣରେ ବଡ ଘୋଟଲା କରି ସେ ଚର୍ଚ୍ଚା କୁ ଆସିଥିଲା । ବିଡିଓ କେ କେ ସ୍ବାଇଁଙ୍କ ସମୟରେ ପାଖାପାଖି ଏକ କୋଟି ଟଙ୍କାର ଠିକା କାମ ସେ ବ୍ଲକରୁ ପାଇଥିଲେ ।  ଏବେ ପୁଣି ପରୋକ୍ଷରେ ବ୍ଲକର ଠିକାଦାରୀ କାର୍ଯ୍ୟ କରୁଥିବା ଲକ୍ଷ୍ୟ କରାଯାଇଛି । ମୋ ସ୍କୁଲ ଅଭିଯାନରେ ମୁଖ୍ୟମନ୍ତ୍ରୀଙ୍କ ଆକାଙକ୍ଷିତ ହାଇସ୍କୁଲ ଯୋଜନାରେ  ଭୁତମୁଣ୍ଡାଇ ହାଇସ୍କୁଲର ନୂତନ ଗୃହ ପ୍ରାୟ ସତୁରୀ ଲକ୍ଷ ଟଙ୍କା ବ୍ୟୟ ଅଟକଳରେ ସେ କରୁଛନ୍ତି । ନିମ୍ନମାନର ଗୃହ ନିର୍ମାଣ କାର୍ଯ୍ୟ ପାଇଁ ସ୍ଥାନୀୟ ଅଞ୍ଚଳରେ ଜନ ଅସନ୍ତୋଷ ପ୍ରକାଶ ପାଇଛି ।ଏସବୁ ସତ୍ତ୍ବେ କ'ଣ ପାଇଁ ବ୍ଲକ ପ୍ରଶାସନ ଏହି ଯୁବକଙ୍କୁ ଗୁରୁତ୍ୱପୂର୍ଣ୍ଣ ନିର୍ମାଣ କାର୍ଯ୍ୟ ସଂପାଦନ କରିବାକୁ ଦେଉଛି ତାହା ସାଧାରଣରେ ପ୍ରଶ୍ନବାଚୀ ସୃଷ୍ଟି କରିଛି । ବିଭିନ୍ନ ସମୟରେ ଅନୁସଂଧାନ ପାଇଁ ଆସୁଥିବା ପ୍ରଶାସନିକ ଅଧିକାରୀ ଓ ଦୁର୍ନୀତି ନିବାରଣ ବିଭାଗର କର୍ମଚାରୀଙ୍କୁ ଅସାଧୁ ଉପାୟରେ ସନ୍ତୁଷ୍ଟ କରାଇ  ଛତୁଆ ପ୍ରସ୍ତୁତି ଓ ବଣ୍ଟନ ଅଭିଯୋଗ ର ଯାଞ୍ଚ ପ୍ରକ୍ରିୟାକୁ ଏହି ଯୁବକ ସପୂର୍ଣ୍ଣ ବାଟବଣା କରିଥାନ୍ତି । କେନ୍ଦ୍ରୀୟ ଦୁର୍ନୀତି ନିବାରଣ ବିଭାଗ ଏଥିପ୍ରତି ଦୃଢ କାର୍ଯ୍ୟାନୁଷ୍ଠାନ ଗ୍ରହଣ କରିବାଲାଗି ସାଧାରଣରେ ଦାବୀ ହେଉଛି ।