31-Mar-2021

ବଲାଙ୍ଗିର୍‌, (ପ୍ରେରଣା ଖବର ବ୍ୟୁରୋ): ମୁଣ୍ଡ ଉପର ତାତିଠୁ ବଳିଯାଇଛି ପିଇବା ପାଣିର ତାତି l ପିଇବା ପାଣି ପାଇଁ ବହୁ ଡହଳ ବିକଳ ହେଉଛନ୍ତି ସହରବାସୀ l ବଲାଙ୍ଗୀର ସହରରେ ବିଭିନ୍ନ ପଡାରେ ପାଣି ଏବେ ଆସୁନଥିବା ବେଳେ ପାଣି ଆସିଲେ ଡ୍ରେନ ପାଣି ଆସୁଥିବା ଅଭିଯୋଗ ହୋଇଛି । ଯାହାକୁ ନେଇ ଲୋକଙ୍କ ମଧ୍ୟରେ ଅସନ୍ତୋଷ ଦେଖାଦେଇଛି ।

ଏନେଇ ଆଜି ଭିଆଇପି ପାର୍ଟି ପକ୍ଷରୁ ଜିଲ୍ଲା ଜଳ ଯୋଗାଣ ଅଧିକାରୀଙ୍କ ସହ ପୌରପରିଷଦ ଅଧିକାରୀଙ୍କୁ ସହରରେ ପାଣି ସୁବିଧା କରିବା, ଜଳଛତ୍ରଗୁଡ଼ିକୁ କାମରେ ଲଗାଇବା, ଲୋକଙ୍କୁ ବିଶୁଦ୍ଧ ପାଣି ଯୋଗାଇଦେବା ଦାବିରେ ଦାବିପତ୍ର ଦେବା ସହ ଡେଡଲାଇନ ମଧ୍ୟ ଦେଇଥିବା ଜଣାପଡ଼ିଛି । ଆଗାମୀ ୧୫ ଦିନ ମଧ୍ୟରେ ଏହି ସବୁ ଦାବି ପୁରଣ ନ କଲେ ଏହାକୁ ନେଇ ଆନ୍ଦୋଳନ କରିବା ପାଇଁ ମଧ୍ୟ ଚେତାବନି ଦେଇଛନ୍ତି ।

ସେପଟେ ଏନେଇ ଜିଲ୍ଲା ଜଳ ଯୋଗାଣ ଅଧିକାରୀଙ୍କ ପ୍ରତିକ୍ରିୟା ଲୋଡିବାରୁ ସେ ସିଧା ସିଧା ମନା କରିବା ସହ ସରକାରଙ୍କ ଉପରେ ଦୋଷ ଲଦି କହିଥିଲେ ଯେ, କୌଣସି ପ୍ରକାର ପ୍ରତିକ୍ରିୟା ଗଣମାଧ୍ୟମ ଆଗରେ ରଖିବାକୁ ମନା କରାଯାଇଥିବା ନିୟମ କରାଯାଇଛି । ତେଣୁ ସେ କିଛି କହିବେ ନାହିଁ ବୋଲି ରୋକଠୋକ ମନା କରିଛନ୍ତି ।

ତେବେ ବର୍ତ୍ତମାନ ବଲାଙ୍ଗୀର ସହରରେ ତାପମାତ୍ର ୪୦ ଉପରେ ରହୁଥିବା ବେଳେ ପାଣି ସଙ୍କଟରେ ଲୋକ ହାହାକାର ହେବା ପୂର୍ବରୁ ପ୍ରଶାସନ ଧ୍ୟାନ ନ ଦେଇ ଏଭଳି ଉତ୍ତର ରଖିବା ଜନସାଧାରଣଙ୍କ ମଧ୍ୟରେ ଅସନ୍ତୋଷର ବାତାବରଣ ସୃଷ୍ଟି କରିଛି ।