15-Oct-2020

ବଲାଙ୍ଗୀର,୧୪ା୧୦(ସନ୍ତୋଷ ଠାକୁର)-ବଲାଙ୍ଗୀର ସହରର ବିଭିନ୍ନ ସ୍ଥାନରେ ବିଦ୍ୟୁତ ବିଭାଗର ଟ୍ରାନ୍ସଫର୍ମର ମୁକୁଳା ପଡିଛି । ଅନେକ ସମୟରେ ସେହି ଟ୍ରାନ୍ସଫର୍ମର ସଂସ୍ପର୍ଷରେ ଆସି ଗାଈ,ଗୋରୁ,ତଥା ଛୋଟପିଲାଙ୍କ ଜୀବନ ହାନୀ ହେଉଛି । ଆଜି ବରପାଲିପଡାର ରାସ୍ତାକଡରେ ରହିଥିବା ଏକ ମୁକୁଳା ଟ୍ରାନ୍ସଫର୍ମରର ସଂସ୍ପର୍ଷରେ ଆସି ଏକ ଗାଈ ମୃତ୍ୟୁବରଣ କରିଛି । ଆଜି ସକାଳୁ ସକାଳୁ ମୁକୁଳା ଟ୍ରାନ୍ସଫର୍ମରଠାରେ ଥିବା ଘାସ ଖାଇବାକୁ ଯାଇ ଗାଈଟି ଲାଗିଯାଇଥିଲା ଓ ଲୋକଙ୍କ ଆଖି ଆଗରେ ମୃତ୍ୟୁବରଣ କରିଛି । ଫଳରେ ପଡାବାସୀଙ୍କ ମଧ୍ୟରେ ପ୍ରବଳ ।ସନ୍ତୋଷ ଦେଖାଦେଇଛି । ସ୍ଥାନୀୟଲୋକ ଅଭିଯୋଗ କରିଛନ୍ତି ଯେ,ବିଦ୍ୟୁତ ବିଭାଗକୁ ଅନେକଥର ଏହି ଟ୍ରାନ୍ସଫର୍ମର ମୁକୁଳା ପଡିଥିବା ନେଇ ଅଭିଯୋଗ ହୋଇଛି । ଠିକ ସେହିପରି ଟ୍ରାନ୍ସଫର୍ମରଟି ମୁଖ୍ୟରାସ୍ତା କଡରେ ରହିଥିବା ଓ ରାସ୍ତାକୁ ଅବରୋଧ କରୁଥିବାରୁ ଏଠାରେ ଡ୍ରେନନିର୍ମାଣରେ ମଧ୍ୟ ବାଧା ଉପୁଜିଛି । ଏହି ଟ୍ରାନ୍ସଫର୍ମରକୁ ଖୋଲାସ୍ଥାନକୁ ସ୍ଥାନାନ୍ତର କରିବାକୁ ସ୍ଥାନୀୟଲୋକେ ବହୁ ପୂର୍ବରୁ ଦାବି କରୁଛନ୍ତି । କିନ୍ତୁ ପ୍ରଶାସନ ସେ ଉପରେ ଧ୍ୟାନ ଦେଉନି । ଗତ କିଛିଦିନ ହେଲା ପୂର୍ତ୍ତବିଭାଗ ପକ୍ଷରୁ ଡ୍ରେନ ନିର୍ମାଣନେଇ ମାପଚୁପ ଚାଲିଛି । ରାସ୍ତାକଡର ଜମିମାଲିକ ତାଙ୍କ ଜମି ଉପରେ ଟ୍ରାନ୍ସଫର୍ମର ବସିଥିବା ଅଭିଯୋଗ କରୁଛନ୍ତି । କିନ୍ତୁ ଏନେଇ ହୋଇଥିବା ମାମଲାରେ ବିଦ୍ୟୁତ ବିଭାଗ କୋର୍ଟରୁ ଜିଣିଛି ଓ ସେହି ସ୍ଥାନ ସର୍ବସାଧାରଣରେ ଯାଉଛି ବୋଲି ବିଦ୍ୟୁତ ବିଭାଗ ଦାବି କରୁଛି । ଅନ୍ୟପଟେ ଟ୍ରାନ୍ସଫର୍ମରଠାରେ ବିଦ୍ୟୁତ ବିଭାଗ ସଫେଇ କରୁଥିବା ତଥା ମେଟାଲ ପକାଇ ପାଣି ଦେଉଥିବା ଦର୍ଶାଇ ଅର୍ଥହଡପ କରୁଥିବା ଅଭିଯୋଗ ହେଉଛି ଓ ଏହାର ଏକ ତଦନ୍ତ କରାଯିବାକୁ ଦାବି ହେଉଛି । ତେବେ ଗାଈର ମୃତ୍ୟୁକୁ ନେଇ ସ୍ଥାନୀୟ ଲୋକଙ୍କ ମଧ୍ୟରେ ଅସନ୍ତୋଷ ଦେଖାଦେଉଥିବା ବେଳେ ବିଦ୍ୟୁତ ବିଭାଗ ତୁରନ୍ତ ଏଦିଗରେ ପଦକ୍ଷେପ ନେବାକୁ ଦାବି କରାଯାଇଛି ।