14-Oct-2020

ବଲାଙ୍ଗୀର,(ସନ୍ତୋଷ ଠାକୁର)-ବଲାଙ୍ଗୀର ଜିଲ୍ଲାରେ ବିଭିନ୍ନ ସମୟରେ ସାମ୍ବାଦିକଙ୍କ ଉପରେ ଆକ୍ରମଣ କରାଯାଉଛି । ରବିବାର ରାତିରେ ବଲାଙ୍ଗୀରର ଜଣାଶୁଣା କଫସିରଫ ମାଫିଆ ସାନ ନେଗୀ ତାଙ୍କର ୪ଜଣ ସାଙ୍ଗଙ୍କ ସହିତ ରାତି ୧୧ଟାରେ ପ୍ରଗତିବାଦୀର ଜିଲ୍ଲା ପ୍ରତିନିଧି ପୂର୍ଣ୍ଣଚନ୍ଦ୍ର ପଣ୍ଡାଙ୍କ ଘରସାମନାକୁ ଯାଇ ଆଶ୍ଲିଳ ଭାଷାରେ ଗାଲିଗୁଲଜ କରିବା ସହିତ ତାଙ୍କ ଘରକୁ ବୋମା ଉଡାଇଦେବା ଓ ଗୁଳିକରି ହତ୍ୟା କରିବାକୁ ଧମକ ଦେଇଥିଲେ । ମାତାଲ ଅବସ୍ଥା ଥିବା ଯୁବକଙ୍କ ଉନ୍ମତ୍ତକାଣ୍ଡରେ ତାଲପଡାବାସୀ ଅତିଷ୍ଠ ହୋଇଯାଇଥିଲେ । ଆଜି ସାମ୍ବାଦିକ ପୂର୍ଣ୍ଣଚନ୍ଦ୍ର ପଣ୍ଡା ଏନେଇ ଜିଲ୍ଲା ସାମ୍ବାଦିକସଂଘ ଓ ଆଦର୍ଶଥାନାରେ ଲିଖିତ ଅଭିଯୋଗ କଲାପରେ ଅଭିଯୁକ୍ତ ସାନ ନେଗୀକୁ ଦିନ ୧୨ଟା ବେଳେ ଥାନାକୁ ଆଣି ଅଟକ ରଖିଥିଲେ । ଏନେଇ ଆଜି ଜିଲ୍ଲା ସାମ୍ବାଦିକ ସଂଘର ସଭାପତି ହରିନାରାୟଣ ପୂଜାହାରୀ,ସାଧାରଣ ସଂପାଦକ ବଳରାମ ମିଶ୍ର,ବରିଷ୍ଠ ସାମ୍ବାଦିକ ବୀରେନ୍ଦ୍ର ଝାଙ୍କର,ବିଶ୍ୱଜିତ ଦାସ,ପ୍ରଦୀପ୍ତ ମିଶ୍ର,ମହମ୍ମଦ ସେଖ ୱାହିଦ,ସୁନୀଳ ମହାନ୍ତି ,ଘଟେଶ୍ୱର ମିଶ୍ର ପ୍ରମୁଖ ଏକ ପ୍ରତିନିଧିଦଳ ଏସପିଙ୍କ କାର୍ଯ୍ୟାଳୟକୁ ଯାଇ ଅତିରିକ୍ତ ଏସପିଙ୍କୁ ଏକ ଦାବିପତ୍ର ପ୍ରଦାନ କରି ତୁରନ୍ତ ପଦକ୍ଷେପ ନେବାକୁ ଦାବି କରିଥିଲେ । ଆଜି ଦିନ ୧୨ଟାରେ ଟାଉନଥାନା ଆଇଆଇସି ସାନ ନେଗୀକୁ ଥାନାକୁ ଆଣି ଅଟକ ରଖିଥିଲେ । ଆଜି ସାନ ନେଗୀ ପରିବାର ପକ୍ଷରୁ ତାଙ୍କ ବଡଭାଇ ପଡାରେ ହୋଇଥିବା ଘଟଣାକୁ ନେଇ ଦୁଃଖ ପ୍ରକାଶ କରିବା ସହିତ ଆଗାମି ଦିନରେ ଆଉ ସେଭଳି ଘଟଣା ହେବ ନାହିଁ ବୋଲି କହିଥିଲେ । ସଂଧ୍ୟାରେ ସାନ ନେଗୀ ସାମ୍ବାଦିକଙ୍କୁ ଗତକାଲି ଭୁଲ ବୁଝାମଣାରେ ଗାଳିକରିଥିଲେ । ସେଥିପାଇଁ ସେ ଭୁଲ ମାଗୁଛନ୍ତି ଓ ଆଗାମୀ ଦିନରେ ସେ କୌଣସି ସାମ୍ବାଦିକଙ୍କ ସହିତ କୌଣସି ଗଣ୍ଡଗୋଳ କରିବେ ନାହିଁ ବୋଲି ଲିଖିତ ଆକାରରେ ଜଣାଇଥିଲେ । ଫଳରେ ସାମ୍ବାଦିକଙ୍କ ସହିତ ଆଲୋଚନା କରି ଆଇଆଇସି ଅଭିଯୁକ୍ତକୁ ଥାନାରୁ ଛାଡିଥିଲେ । ତେବେ ସାମ୍ବାଦିକଙ୍କ ଅଭିଯୋଗକୁ ନେଇ ଥାନାରେ ଏକ ମାମଲା ରୁଜୁ ହୋଇଛି ଓ ସାନର କାର୍ଯ୍ୟକଳାପକୁ ପୋଲିସ ଅନୁଧ୍ୟାନ କରି ସେ ଦିଗରେ ପଦକ୍ଷେପ ନେବ ବୋଲି କହିଛି ।