19-Jul-2026

ବଲାଙ୍ଗୀର(ପ୍ରେରଣା ଖବର): ଗନ୍ଧମାର୍ଦ୍ଦନ ଜୈବ ବିବିଧତା ର ସୁରକ୍ଷା ସମୟର ଆହ୍ବାନ। ଜନଜୀବନ ସହ ଅଙ୍ଗାଅଙ୍ଗୀ ଭାବେ ଜଡ଼ିତ ଏହି ପର୍ବତମାଳା ରୁ ବାହାରି ଥିବା ଶତାଧିକ ଝରଣା ତଥା ଜଳ ଜମି ଜଙ୍ଗଲ ର ସୁରକ୍ଷା ପାଇଁ ସାମଗ୍ରିକ ଏକତା ଆବଶ୍ୟକ। ଶିଳ୍ପ ବିକାଶ ଆଳରେ ଜନସାଧାରଣଙ୍କ ପାଇଁ ଅତ୍ୟନ୍ତ ସମ୍ବେଦନଶୀଳ ଏବଂ ସାଂସ୍କୃତିକ ତଥା ଐତିହାସିକ ଦୃଷ୍ଟିରୁ ଗୁରୁତ୍ୱପୂର୍ଣ୍ଣ ଏହି ଅଞ୍ଚଳରେ ଖଣି ଖନନ ର ମସୁଧା ଦୁର୍ଭାଗ୍ୟଜନକ ବୋଲି ମତ ପ୍ରକାଶ ପାଇଛି। ଜିଲ୍ଲା ଲେଖକ ପରିଷଦ ବଲାଙ୍ଗିର ଆନୁକୂଲ୍ୟରେ ହରିଶଙ୍କର ପର୍ଯ୍ୟଟନ ସ୍ଥଳୀ ଠାରେ 'ଭାବର୍ ଭୂଇଁ ଗନ୍ଧମାର୍ଦ୍ଦନ' ଶୀର୍ଷକ ଆଲୋଚନାଚକ୍ର ରେ ବକ୍ତା ଓ ପ୍ରବକ୍ତା ମାନଙ୍କର ମତ ପ୍ରକାଶ ପାଇଛି । ପରିଷଦର ସଭାପତି ଜୟକୁମାର ଆଚାର୍ଯ୍ୟ ଙ୍କ ଅଧ୍ୟକ୍ଷତାରେ ଅନୁଷ୍ଠିତ ପ୍ରଥମ ଅଧିବେଶନରେ ପରିଷଦ ର ସମ୍ପାଦକ କବି ସୁଶାନ୍ତ ବାଗ ପ୍ରାରମ୍ଭିକ ସୂଚନା ଦେଇଥିଲେ। ଉପସଭାପତି ବରିଷ୍ଠ ଅଧିବକ୍ତା ଆଶିଷ ଚନ୍ଦନ ସ୍ବାଗତ ଅଭିଭାଷଣ ପ୍ରଦାନ କରିଥିଲେ।ଆଲୋଚକ ଭାବେ ଆଦିବାସୀ ସଂସ୍କୃତି ଗବେଷକ ଅଜିତ କୁମାର ଭୋଇ, ସଂଗଠକ ଗୋରଖନାଥ ସାହୁ, ଡଃ ଗୋବର୍ଦ୍ଧନ ନାଏକ, ଅଞ୍ଚଳର ଜଣାଶୁଣା କୋଶଲ'ବାଦୀ ନେତା ତଥା ସମାଜସେବୀ ସୁଶିଲ ଗୁରୁ ମଞ୍ଚାସୀନ ଥିବା ବେଳେ ସାମାଜିକ କାର୍ଯ୍ୟକର୍ତ୍ତା ମୃତ୍ୟୁଞ୍ଜୟ କୁମାର ସଭା ସଂଯୋଜନା କରିଥିଲେ । କବି ହେମନ୍ତ ଦଳପତି ପ୍ରତିରୋଧ କାହିଁକି ଆବଶ୍ୟକ ସେ ବିଷୟରେ କହିଥିଲେ । କବି ଭିକାରୀ ମିଶ୍ର ଧନ୍ୟବାଦ ଅର୍ପଣ କରିଥିଲେ। ଦ୍ବିତୀୟ ଅଧିବେଶନରେ କବି ସଂଯୁକ୍ତା ପରିଚ୍ଛା ଙ୍କ ଅଧ୍ୟକ୍ଷତାରେ କବିତା ଆସର ଅନୁଷ୍ଠିତ ହୋଇଥିଲା । କବି ଅର୍ଜୁନ କୁମାର ସାହୁ, ସଂଯୁକ୍ତା ଚନ୍ଦନ ଓ ରତ୍ନମୟ ତ୍ରିପାଠୀ ଓ ମୀନା ମହାରଣା ଙ୍କ ସଂଯୋଜନାରେ ମଧୁସୂଦନ ଦାସ, ସନାତନ ଠାକୁର, ରାଜେଶ ଦଣ୍ଡସେନା, ପ୍ରମୁଖ ୫୦ ରୁ ଉର୍ଦ୍ଧ କବି କବିତା ପଠନ କରିଥିଲେ । ଧରମ ସିଂ ଧରୁଆ ଓ ଗୁପ୍ତେଶ୍ୱର କୁଅଁର ସହଯୋଗ କରିଥିଲେ ।