21-Jun-2026

ନବରଙ୍ଗପୁର(ପ୍ରିୟଦର୍ଶିନୀ ପାତ୍ର)
ଡାବୁଗାଁ ବ୍ଲକ ଗୋଡ଼େଗାଁ ଗ୍ରାମର ମହିଳାମାନେ ମଦ ବିରୋଧୀ ଅଭିଯାନ ଆରମ୍ଭ କରୁଛନ୍ତି। ଗୋଡ଼େଗାଁ ଗ୍ରାମର ଶତାଧିକ ମହିଳା ଡାବୁଗାଁ ଥାନା ଏବଂ ଡାବୁଗାଁ ଅବକାରୀ ବିଭାଗ କାର୍ଯ୍ୟାଳୟ କୁ ଆସି ଗାଁରେ ବେଆଇନ ମଦ ବିକ୍ରି ବନ୍ଦ ପାଇଁ ଏକ ଦାବିପତ୍ର ପ୍ରଦାନ କରିଛନ୍ତି। ଡାବୁଗାଁ ଥାନା ଇନ୍ସପେକ୍ଟର ଲକ୍ଷ୍ମୀ ପରଜା ଏବଂ ଅବକାରୀ ଇନ୍ସପେକ୍ଟର ସମୀର କୌଶଲ୍ୟ ଅଭିଯୋଗ ଓ ଦାବିପତ୍ର ଗ୍ରହଣ କରିଛନ୍ତି । ଦାବିପତ୍ରରେ ଉଲ୍ଲେଖ କରାଯାଇଛି, ଗୋଡେଙ୍ଗା ଗ୍ରାମର ବେଆଇନ ମଦ ବିକ୍ରି ଏକ ଗୁରୁତର ସମସ୍ୟା ଭାବେ ଉଭାହୋଇଛି। ଗାଁର ବିଭିନ୍ନ ସ୍ଥାନରେ ଅବାଧରେ ଦେଶୀ ଓ ଭାଟି ମଦ ବିକ୍ରି ହେଉଥ‌ିବାରୁ ସେଠାରେ ମଦୁଆଙ୍କ ଭିଡ଼ ଲାଗି ରହୁଛି। ଏହାର କୁପ୍ରଭାବ କେବଳ ବ୍ୟକ୍ତିଗତ ଜୀବନରେ ନୁହେଁ, ସମଗ୍ର ଗାଁ ସମାଜ ଉପରେ ପଡ଼ୁଛି। ଯୁବପିଢ଼ି ଓ ନାବାଳକମାନେ ମଦ୍ୟପାନ ପ୍ରତି ଆକର୍ଷିତ ହେଉଛନ୍ତି । ଫଳରେ ସେମାନଙ୍କ ଶିକ୍ଷାI, ଚରିତ୍ର ଓ ଭବିଷ୍ୟତ ପ୍ରଭାବିତ ହେଉଛି। ଘରୋଇ ହିଂସା ମଧ୍ୟଯ ବଢୁଛି । ଅନେକ ପରିବାରରେ ସ୍ଵାମୀମIନେ ଦିନସାର ପରିଶ୍ରମକରି ଯାହା ରୋଜଗାର କରୁଛନ୍ତି, ତାହାର ବଡ଼ ଅଂଶ ମଦ ପିଇବାରେ ଖର୍ଚ୍ଚ କରିଦେଉଛନ୍ତି । ଫଳରେ ପରିବାରର ଆର୍ଥିକ ସ୍ଥିତି ଦୁର୍ବଳ ହେଉଛି। ଗାଁର ସାମାଜିକ ପରିବେଶ ମଧ୍ୟ ଏଥିପାଇଁ ନଷ୍ଟ ହେଉଛି। ମଦ ବିକ୍ରି ସ୍ଥାନଗୁଡ଼ିକରେ ଅସାମାଜିକ କାର୍ଯ୍ୟକଳାପ, ଝଗଡ଼ା, ଗାଳିଗୁଲଜ ଓ ଅଶାନ୍ତି ବଢୁଛି ଓ ମହିଳା, ଛାତ୍ରୀଛାତ୍ର ଓ ବୟସ୍କ ଲୋକମାନେ ଅସୁରକ୍ଷିତ ମନେକରୁଛନ୍ତି ବୋଲି ଗ୍ରାମର ମହିଳା ମାନେ କହିଛନ୍ତି ।ଦାବିପତ୍ର ଦେବା ପରେ ସ୍ଥାନୀୟ ପ୍ରଶାସନ ଏବଂ ଜିଲ୍ଲା ପ୍ରଶାସନ କଣ ପଦକ୍ଷେପ ନେଉଛି ତାହା ଦେଖିବାକୁ ବାକି ରହିଲା।