16-Jun-2026

ବରପାଲି, (ସୁଦାମ ଦୀପ )ବରପାଲି ୧୪୯ତମ ମହାନ ଶୀତଳଷଷ୍ଠୀ ମହୋତ୍ସବ ସୂଭାରମ୍ଭ ହେବା ସହ  କନ୍ୟାପକ୍ଷରୁ ନଟରାଜ ଦେବଙ୍କ ଆନୟନ ଓ ସ୍ଥାପନ ପର୍ବ ସମାପନ ହୋଇଯାଇଛି। ସୋମବାର ପୁର୍ବାହ୍ନ ସମୟରେ ଶୀତଳ ଷଷ୍ଠୀ ମହୋତ୍ସବର ପ୍ରଥମ ଦିନ ଭକ୍ତି ଓ ଉତ୍ସାହଭରା ମାହୋଲ ମଧ୍ୟରେ ପରମ୍ପରାଗତ ଭାବରେ ସୂଭାରମ୍ଭ ହୋଇଥିଲା।ପୁର୍ବାହ୍ନରେ କନ୍ୟାପକ୍ଷ ହିମାଦ୍ରୀ ନଗରବାସୀ ବାଣ ଓ ବାଦ୍ୟର ତାଳରେ ଏକ ବିଶାଳ ଶୋଭାଯାତ୍ରା ପାର୍ବତୀମଣ୍ଡପ ପରିସରରୁ ବାହାରିଥିଲେ। ଶତାଧିକ ଶୈବଭକ୍ତ ଶୋଭାଯାତ୍ରା ରେ ସାମିଲ ହୋଇ ଶୀତଳ ଷଷ୍ଠୀ ଭଣ୍ଡାର ଗୃହ ସମ୍ମୁଖରେ ପହଞ୍ଚିଥିଲେ। ପରେ ପଣ୍ଡିତମାନଙ୍କ ଦ୍ୱାରା ବୈଦିକ ରୀତିନୀତି ଅନୁସାରେ ପୂଜାର୍ଚ୍ଚନା ଓ ବିଶେଷ ନୀତିକାନ୍ତି ମାନ ସମ୍ପନ୍ନ କରାଯାଇଥିଲା। ପୂଜାର୍ଚ୍ଚନା ବିଧିପରେ ଭଗବାନ ଶିବଙ୍କ ନଟରାଜ ସ୍ୱରୂପଙ୍କୁ ସୁସଜ୍ଜିତ ପାଲିଙ୍କିରେ ଭଣ୍ଡାର ଘରୁ  ଭକ୍ତମାନଙ୍କ ଜୟଧ୍ୱନି ମଧ୍ୟରେ ହିମାଦ୍ରୀ ନଗର ମଣ୍ଡପକୁ ଅଣାଯାଇଥିଲା। ମଣ୍ଡପରେ ପହଞ୍ଚିବା ପରେ ବିଧିବିଧାନ ପାଳନିୟ ଭାବରେ ନଟରାଜ ଦେବଙ୍କ ସ୍ଥାପନ କରାଯାଇଥିଲା।
ସମଗ୍ର କାର୍ଯ୍ୟକ୍ରମ ଭକ୍ତିମୟ ପରିବେଶ ମଧ୍ୟରେ ସମ୍ପନ୍ନ ହୋଇଥିବା ବେଳେ ଭକ୍ତମାନଙ୍କ ମଧ୍ୟରେ ଅପାର ଉତ୍ସାହ ଓ ଉଦ୍ଦିପନା ପରିଲକ୍ଷିତ ହୋଇଥିଲା। ଆଗାମୀ ଦିନ ଗୁଡ଼ିକ ମଧ୍ୟରେ ଆସନ୍ତା କାଲି ପତରପେଣ୍ଡି କନ୍ୟା ମନୋନୟନ ଉତ୍ସବ ପାଳିତ ହେବ। ମହାଦେବ ଓ ମାତା ପାର୍ବତୀଙ୍କ ଦିବ୍ୟ ବିବାହ ଉତ୍ସବ ସହ ବିଭିନ୍ନ ଧାର୍ମିକ ଓ ସାଂସ୍କୃତିକ କାର୍ଯ୍ୟକ୍ରମ ଆୟୋଜିତ ହେବ ବୋଲି ଆୟୋଜକ କମିଟି ସୂଚନା ଦେଇଥିଲେ।