31-May-2026

ବିନିକା(ହିମାଂଶୁ ଶେଖର ପୁଟେଲ)ବିନିକା ବ୍ଲକ ଅନ୍ତର୍ଗତ ଫୁଲମୁଠି ମାଁ ମାହେଶ୍ୱରୀ ଉଚ୍ଚ ପ୍ରାଥମିକ ବିଦ୍ୟାଳୟରେ କାର୍ଯ୍ୟରତ ସହକାରୀ ଶିକ୍ଷକ ନିତାଇ ଚରଣ ପୂଜାରୀ ଆଜି ତାଙ୍କ ଚାକିରୀ ଜୀବନରୁ ଅବସର ନେଇଛନ୍ତି । ତାଙ୍କୁ ବିଦାୟ କାଳୀନ ସମ୍ବର୍ଦ୍ଧନା ଦେବା ପାଇଁ ଅଧ୍ୟୟନରତ ଛାତ୍ରଛାତ୍ରୀ ତଥା ପୁରାତନ ଛାତ୍ର ମାନଙ୍କ ତରଫରୁ ଡିଜେର ତାଳେ ତାଳେ ନାଚ ଗୀତର ଆୟୋଜନ କରାଯାଇ ଶୋଭାଯାତ୍ରା ମାଧ୍ୟମରେ ବିଦାୟ କାଳୀନ ସମ୍ବର୍ଦ୍ଧନା ଦିଆଯାଇଥିଲା ।ସ୍ଥାନୀୟ ସ୍କୁଲ ଠାରେ ପ୍ରାଥମିକ ବିଦ୍ୟାଳୟର ପ୍ରଧାନ ଶିକ୍ଷକ ରାମଚନ୍ଦ୍ର ପୂଜାରୀଙ୍କ ସଭାପତିତ୍ଵରେ ଆୟୋଜିତ ସଭାରେ ମୁଖ୍ୟ ଅତିଥି ଭାବେ ରାଷ୍ଟ୍ରପତି ପୁରସ୍କାରପ୍ରାପ୍ତ ଅବସର ଶିକ୍ଷକ ପ୍ରସନ୍ନ ରଥ ଯୋଗଦେଇ ଅବସର ଗ୍ରହଣ କରିବାକୁ ଯାଉଥିବା ଶିକ୍ଷକ ନିତାଇ ଚରଣ ପୂଜାରୀଙ୍କ କାର୍ଯ୍ୟ ଦକ୍ଷତା ଉପରେ ଆଲୋକପାତ କରିଥିଲେ।ସେହିପରି ସମ୍ମାନିତ ଅତିଥି ଭାବେ ସି ଆର ସି ସି ବିବେକାନନ୍ଦ ନାୟକ,ସ୍କୁଲ କମିଟି ସଭାପତି ବୃନ୍ଦାବନ ଦାସ,ଶିକ୍ଷକ ଜୟ ନାରାୟଣ ପୂଜାରୀ,ମୋ ସ୍କୁଲ ଅଭିଯାନ ସଭାପତି ଜଗତ ଜୀବନ ଦାସ,ୱାର୍ଡ ପ୍ରତିନିଧି ଆନନ୍ଦ ହୋତା,ସ୍ୱେଚ୍ଛାସେବୀ ନୀଳାମ୍ବର ସାହୁ,ରାମଚନ୍ଦ୍ର କର୍ଣ୍ଣ,ଶିକ୍ଷକ ସୁଧାଂଶୁ ପୂଜାରୀ,ରାମ ନାରାୟଣ ପୂଜାରୀ,ହିମାଂଶୁ ପୂଜାରୀ, ବିଭୂତି ତ୍ରିପାଠୀ ପ୍ରମୁଖ ଯୋଗଦେଇ ଶିକ୍ଷକ ନିତାଇ ଚରଣ ପୂଜାରୀ ୧୯୮୮ମସିହାରୁ ନିରବିଚ୍ଛିନ୍ନ ଭାବେ ଦୀର୍ଘ ସମୟ ଧରି ଏହି ସ୍କୁଲରେ ଚାକିରୀ କରି ଆଜି ମେ ୩୧ତାରିଖ ୨୦୨୬ ଅବସର ଗ୍ରହଣ କରିଛନ୍ତି ।ତେବେ ସ୍କୁଲରେ  ଅଧ୍ୟୟନରତ ଛାତ୍ରଛାତ୍ରୀଙ୍କୁ ଶିକ୍ଷାଦାନ,ସ୍କୁଲରେ ଠିକ ସମୟରେ ଉପସ୍ଥିତ,ବିଭିନ୍ନ କାର୍ଯ୍ୟ ସମ୍ପାଦନା ଏବଂ ତାଙ୍କ କର୍ତ୍ତବ୍ୟ ନିଷ୍ଠା ଉପରେ ଅତିଥି ଓ ପୁରାତନ ଛାତ୍ରଛାତ୍ରୀ ବର୍ଣ୍ଣନା କରିଥିଲେ ।ପ୍ରାରମ୍ଭରେ ସ୍କୁଲ ତରଫରୁ ଶିକ୍ଷୟତ୍ରୀ ରାତ୍ରହାତ ଯୁଆଡ଼ି,ପ୍ରଶାନ୍ତି ସେଠୀ ଅତିଥି ମାନଙ୍କୁ ଫୁଲମାଳ ଅର୍ପଣ କରିଥିଲେ। ଏକ ବିରାଟ ଶୋଭାଯାତ୍ରାରେ ଡିଜେ ଗାଡ଼ିର ସଙ୍ଗୀତରେ ପୁରାତନ ଓ ଅଧ୍ୟୟନରତ ଛାତ୍ରଛାତ୍ରୀ ମାନେ ତାଙ୍କ ପ୍ରିୟ ଶିକ୍ଷକ ଶ୍ରୀ ପୂଜାରୀଙ୍କୁ ଧରି ଗ୍ରାମ ପରିକ୍ରମା କରିଥିଲେ ।ପରିକ୍ରମା ବେଳେ ଗ୍ରାମର ବିଭିନ୍ନ ସ୍ଥାନରେ ମହିଳା ମାନେ କଳସ  ବସାଇ ପାଦ ଧୋଇବା ସହିତ ଉପହାର ଦେଇ ସମ୍ବର୍ଦ୍ଧିତ କରିଥିଲେ। ପୁରାତନ ଛାତ୍ରଛାତ୍ରୀଙ୍କ ତରଫରୁ ଅବସର ପ୍ରାପ୍ତ ଶିକ୍ଷକ ଶ୍ରୀ ପୂଜାରୀଙ୍କୁ ମାନପତ୍ର ପ୍ରଦାନ କରାଯିବା ସହ  ନିଜସ୍ୱ ଗ୍ରାମ ପୂଜାରୀ ସାହାଜବାହାଲକୁ ସମସ୍ତ ଛାତ୍ରଛାତ୍ରୀ,ଅଭିଭାବକ ଏବଂ ଗ୍ରାମବାସୀ ଯାଇ ତାଙ୍କ ବାସଭବନରେ ଛାଡ଼ିଥିଲେ ।