07-Feb-2021

ବଲାଙ୍ଗୀର,(ସନ୍ତୋଷ କୁମାର ଠାକୁର)- ଆଜି ସ୍ଥାନୀୟ ଯାଦବ ଭବନ ଠାରେ ଯୁବ କବି ତଥା ଲେଖକ ମୁରଲି ସିକାଙ୍କ କୋସଲୀ କାହାଣୀ ସଂକଳନ ‘କେନ୍ ଖେତର ଢ଼େଲ’ ଉନ୍ମୋଚିତ ହୋଇଯାଇଛି । ଏହି ଅବସରରେ ଅନୁଷ୍ଠିତ ଲୋକାର୍ପଣ ଉତ୍ସବରେ ମୁଖ୍ୟ ଅତିଥି ଭାବରେ ନାଟ୍ୟଭୂଷଣ ଜଗଦାନନ୍ଦ ଛୁରିଆ, ମୁଖ୍ୟ ବକ୍ତା ଭାବରେ କବି ଆନନ୍ଦ ଚନ୍ଦ୍ର ସାହୁ ଏବଂ ସମ୍ମାନିତ ଅତିଥି ଭାବରେ କବି ସୁଶାନ୍ତ ବାଗ ଓ ବି.ଇ.ଓ ନେପାଳ ଚନ୍ଦ୍ର ବାଗ ଯୋଗ ଦେଇ କୋସଲୀ ଭାଷାର ଉନ୍ନତି ଓ ପ୍ରଚାର ପ୍ରସାର ପାଇଁ ଏହି ଭାଷାରେ ବହୁ ସଂଖ୍ୟାରେ ପତ୍ରପତ୍ରିକା ପ୍ରକାଶିତ ହେବା ଆବଶ୍ୟକ ବୋଲି ମତ ଦେଇଥିଲେ । କୋସଲୀ ଭାଷା ଏକ ଉନ୍ନତ ଓ ସମୃଦ୍ଧ ଭାଷା ଏବଂ ପୂର୍ବରୁ ମଧ୍ୟ କୋସଲୀ ଭାଷା ଅନେକ ପତ୍ରପତ୍ରିକା ପ୍ରକାଶିତ ହୋଇ ଦୃତ ପାଠକୀୟ ଆଦୃତି ଲାଭ କରି ସାରିଛି । ତେଣୁ ଯୁବ କବି ମୁରଲୀ ସିକା ଙ୍କ ଏହି କାହାଣୀ ସଙ୍କଳନ ମଧ୍ୟ କୋସଲୀ ଭାଷାର ସମୃଦ୍ଧି ଦିଗରେ ସହାୟକ ହେବ ବୋଲି ଅତିଥି ମାନେ ଆଶା ବ୍ୟକ୍ତ କରିଥିଲେ । କବି ଅର୍ଜୁନ ସାହୁଙ୍କ ସଂଯୋଜନାରେ ଅନୁଷ୍ଠିତ ସଭା ପ୍ରାରମ୍ଭରେ ସମଲେଶ୍ୱରୀଙ୍କ ଫଟୋଚିତ୍ରରେ ଅତିଥି ମାନେ ପୁଷ୍ପମାଲ୍ୟ ଓ ଧୂପଦୀପ ପ୍ରଦାନ କରିଥିଲେ । କବି ରତ୍ନମୟ ତ୍ରିପାଠୀ ପ୍ରାରମ୍ଭିକ ସୂଚନା ପ୍ରଦାନ କରିଥିଲେ l ରାଜେନ୍ଦ୍ର ଦଣ୍ଡସେନା, ଗୋପିନାଥ ଦଣ୍ଡସେନା ଓ ଅନ୍ୟ ମାନେ ସହଯୋଗ କରିଥିଲେ । ଏହି ସାହିତ୍ୟ ସଭାରେ ସହରର ବହୁ କବି, ଲେଖକ, ଓ ସାହିତ୍ୟିକ ଯୋଗ ଦେଇଥିଲେ ।