07-Feb-2021

ବଲାଙ୍ଗୀର(ପ୍ରେରଣା ଖବର): ବଢୁଛି ବଲାଙ୍ଗୀର ସହର, ତା ସାଙ୍ଗକୁ ବଢୁଛି ସମସ୍ୟା। ବର୍ଷ ବର୍ଷ ଧରି ଭଙ୍ଗା ଦଦରା ହୋଇ ପଡିଥିବା ରାସ୍ତା ଗୁଡିକୁ ଏବେ ନିର୍ମାଣ କରାଯାଇଛି । ହେଲେ ରାସ୍ତାକୁ ଆଲୋକୀ କରଣ କରିବାକୁ ଭୁଲି ଯାଇଛି ପ୍ରଶାସନ। ଯାହାଫଳରେ କେଉଁଠି ଆଲୁଅ ତ ଆଉ କେଉଁଠି ଅନ୍ଧାର। ସହରର ଗାନ୍ଧୀ ମାର୍ଗ ଓ ୨୬ ନମ୍ବର ଜାତୀୟ ରାଜପଥକୁ ଛାଡି ଦେଲେ ବିଭିନ୍ନ ରାସ୍ତାରେ ଏବେ ଅନ୍ଧାର । ଯାହାକୁ ନେଇ ଅସନ୍ତୋଷ ପ୍ରକାଶ କରିଛନ୍ତି ସହରବାସୀ।

ବଲାଙ୍ଗୀର ସହର ଗାନ୍ଧୀମାର୍ଗ। ନିର୍ମାଣ ହେବା ପରେ ରାସ୍ତା କଡରେ ଏବେ ଝଲସୁଛି ସୁସଜ୍ଜିତ ଆଲୋକ ମାଳା। ବିଭିନ୍ନ ବିଦ୍ୟୁତ ଖୁଣ୍ଟରେ ରଙ୍ଗବେରଙ୍ଗର ଲିଚୁ ଲାଇଟ ବେଶ ସୁନ୍ଦର ଦେଖାଯାଉଛି। ହେଲେ ରାଜେନ୍ଦ୍ର ବିଶ୍ବ ବିଦ୍ୟାଳୟ , ଭିମଭୋଇ ମେଡିକାଲ କଲେଜ ରାସ୍ତା , ସହ ପାଟଣାଗଡ ଖରିଆରକୁ ଯିବା ଭଳି ମୂଖ୍ୟ ରାସ୍ତାର ଦୃଶ୍ୟ ଅନ୍ଧାର। ରାସ୍ତା ପ୍ରଶସ୍ତି କରଣ ହୋଇଛି। ରାସ୍ତାର ଡିଭାଇଡରରେ ଲାଗିଛି, ହେଲେ ରାତିରେ ଲୋକଙ୍କ ପାଇଁ ଆଲୋକ ଦେବାକୁ ଭଲି ଯାଇଛି ପ୍ରଶାସନ। ଦୀର୍ଘ ୨ ବର୍ଷ ହେଲାଣି ବିଦ୍ୟୁତ ଖୁଣ୍ଟ ଲାଗିବାକୁ ଭିତ୍ତିପ୍ରସ୍ତର ସ୍ଥାପନ କରାଯାଇଥିଲା । ମାତ୍ର ୪ ଟି ଖୁଣ୍ଟରେ ସରିଗଲା କାମ। ଆଉ ଏବେ ରାସ୍ତା କଡରେ କିଛି ଖୁଣ୍ଟ ଲଗାଯାଇ କାମ ଚଳାଇବା ଭଳି କାମ କରିଛି ପ୍ରଶାସନ । ଯାହାକୁ ନେଇ ଦେଖାଦେଇଛି ଅସନ୍ତୋଷ।

କେବଳ ଏତିକିରେ ସରିନି କଥା। ସହରର ରିଙ୍ଗରୋଡ, ଆରଟିଓ ଅଫିସ ରାସ୍ତା, ଆଠଗାଁ ରାସ୍ତା , ଖୁଜେଲ ପାଲି ରାସ୍ତା , ବିଭିନ୍ନ ରାସ୍ତାମାନଙ୍କରେ କୋଟି କୋଟି ଟଙ୍କାର ଏଲଇଡି ଲାଇଟ ମାନ ଲଗାଯାଇଥିବା ବେଳେ କେବେ ଜଳି ଥାଏ ତ ଆଉ ଦିନମାସ ମାସ ଧରି ବନ୍ଦ ହୋଇ ପଡିଥାଏ। ସେପଟେ କିଛି ରାସ୍ତାରେ ବିଦ୍ୟୁତ ଖୁଣ୍ଟ ଲାଗିଥିଲେ ବି ଲାଇଟର ଦେଖାନାହିଁ। ଯାହାକୁ ନେଇ ବିଭିନ୍ନ ସମୟରେ ଚୋରି ଡକାୟତି ସହ ଲୁଟ କରିବାକୁ ସୁଯୋଗ ପାଉଛନ୍ତି ଦୁର୍ବୃତ୍ତ। ସେପଟେ ଏନେଇ ପ୍ରଶାସନକୁ ବାରମ୍ବାର ଗୁହାରି କଲା ମଧ୍ୟ କେହି ଶୁଣୁନଥିବା ଅଭିଯୋଗ ଆସିଛି ।