29-Apr-2026

ସୁବର୍ଣ୍ଣପୁର (ମନୋରଞ୍ଜନ ତ୍ରିପାଠୀ )
 ବ୍ୟକ୍ତିଗତ ମାଲିକାନା ଭିତରେ ଅପୂଜା ରହୁଥିବା ବାବା ରୁଦ୍ରନାଥଙ୍କ ପାଇଁ ଦେବୋତ୍ତର ବିଭାଗକୁ ଦାନ ପତ୍ର ଭାବରେ ଆଜି ସମ୍ପୃକ୍ତ ଜମି ରେଜିଷ୍ଟ୍ରସନ କଲେ ସହର ର ସହୃଦୟ ବ୍ୟକ୍ତି ହୃଦାନନ୍ଦ ମେହେର । ସୂଚନା ଯୋଗ୍ୟ ଯେ ଅଷ୍ଟ ଶମ୍ବୁ, ଅଷ୍ଟ ଚଣ୍ଡୀ, ତଥା ଅଷ୍ଟ ବିଷ୍ଣୁ ଙ୍କ ସହର ସୁବର୍ଣ୍ଣପୁରରେ ଅଷ୍ଟଶମ୍ବୁ ଙ୍କ ମଧ୍ୟରୁ ଜଣେ ହେଉଛନ୍ତି ସୋନପୁର ଗଡ଼ ଭିତରେ ଥିବା ଶ୍ରୀ ରୁଦ୍ରନାଥ ବାବା । ବ୍ୟକ୍ତିଗତ ଜମି ମାଲିକଙ୍କ ଜମି ଭିତରେ ୧୯୮୦ ମସିହାରୁ ଆବଦ୍ଧ ହୋଇ ରହିଥିଲେ ଶ୍ରୀ ରୁଦ୍ରନାଥ ବାବା । ସୋନପୁର ବାସୀଙ୍କ ଠାରୁ ଅଭିଯୋଗ ପାଇବା ପରେ ସୁବର୍ଣ୍ଣପୁର ଜିଲ୍ଲାପାଳ ଡ଼ .ନୃପରାଜ ସାହୁ ଙ୍କ ନିର୍ଦ୍ଦେଶ କ୍ରମେ ସୋନପୁର ଉପଜିଲ୍ଲାପାଳ ଡ଼. ସୋମ୍ୟରୂପା ରଥ ଏହି ବିଷୟରେ ତଦନ୍ତ କରି ସମସ୍ୟାର ସମାଧାନ କରିବା ପାଇଁ ସ୍ଥାନୀୟ ସମାଜସେବୀ ଗୋବିନ୍ଦ ମହାରଣାଙ୍କ ସହଯୋଗରେ ଉକ୍ତ ଜମି ମାଲିକ ଶ୍ରୀ ହୃଦାନନ୍ଦ ମେହେର ଓ ତାଙ୍କ ପୁଅ ଶ୍ରୀ ରାମକୃଷ୍ଣ ମେହେର ଙ୍କୁ ନିଜ କାର୍ଯ୍ୟାଳୟ କୁ ଡକାଇ ଆଲୋଚନା ତଥା ବୁଝାସୁଝା କରିଥିଲେ । ଏହାର ଦୁଇ ଦିନ ପରେ ଅପ୍ରେଲ ୧୦ ତାରିଖ ଦିନ ଜମି ମାଲିକ ଗୋବିନ୍ଦ ବାବୁଙ୍କ ସହ ନିଜେ ଉପଜିଲ୍ଲାପାଳ କାର୍ଯ୍ୟାଳୟ କୁ ଆସି ସ୍ୱତଃ ପ୍ରବୁତ୍ତ ଭାବେ ରୁଦ୍ରନାଥ ମନ୍ଦିରକୁ ରାସ୍ତା ଦେବା ପାଇଁ ରାଜି ହୋଇଥିଲେ । ସେହିଦିନ ଅପରାହ୍ନ ୪ଟା ବେଳେ ସୁବର୍ଣ୍ଣପୁର ଜିଲ୍ଲାପାଳ, ଉପଜିଲ୍ଲାପାଳ, ଗୋବିନ୍ଦ ମହାରଣା ତଥା ଜମି ମାଲିକଙ୍କ ଉପସ୍ଥିତିରେ ରୁଦ୍ରନାଥ ବାବାଙ୍କ ମନ୍ଦିରକୁ ସିନେମା ହଲ ଦେଇ ଗଛପତ୍ର ସଫା କରାଯାଇ ବାଟ ଫିଟାଯାଇଥିଲା । ସୋନପୁର ପୌର ପରିଷଦ ଅଧିକାରୀ ଶ୍ରୀ ଋଷି ମାଝୀ ଓ ଜିଲ୍ଲା ଅଗ୍ନିଶମ ଅଧିକାରୀ ଶ୍ରୀ ଭବେନ୍ଦ୍ର ଦେ ତାଙ୍କର କର୍ମଚାରୀ ମାନଙ୍କୁ ପଠାଇ ମନ୍ଦିର ଚାରିପାଖରେ ସଫା କରାଇଥିଲେ । ସୋନପୁର ରାଜସ୍ବ ନିରୀକ୍ଷକ ସୁଧୀର ପାଣ୍ଡିଆ, ଆସିଷ୍ଟାଣ୍ଟ ଆରଆଇ ଓ ଅମିନ ମାଧ୍ୟମରେ ଜମି ମାପ କରାଯାଇଥିଲା । ନିକଟରେ ଥିବା ଶ୍ରୀ ଗୋପାଳଜୀ ମନ୍ଦିରର ପ୍ରାଚୀର ମଧ୍ୟ ଦେଇ ରୁଦ୍ରନାଥ ବାବା ଙ୍କ ମନ୍ଦିର ପର୍ଯ୍ୟନ୍ତ ଗୋଟିଏ ରାସ୍ତା ଫିଟେଇ ବାକୁ ନିଷ୍ପତି ନିଆଯାଇଥିଲା ଫଳରେ ଶ୍ରୀ ରୁଦ୍ରନାଥ ବାବାଙ୍କ ଦୈନନ୍ଦିନ ପୂଜାର୍ଚ୍ଚନା ହେବା ସହିତ ସାଧାରଣ ଭକ୍ତ ମାନଙ୍କ ର ଦର୍ଶନ ନିମନ୍ତେ ଦ୍ୱାର ଉନ୍ମୁକ୍ତ ହୋଇ ପାରିବ ବୋଲି ଉପଜିଲ୍ଲାପାଳ ତଥା ସୋନପୁର ଦେବୋତ୍ତର ବିଭାଗର କାର୍ଯ୍ୟ ନିର୍ବାହୀ ଅଧିକାରୀ ଡ଼ ସୋମ୍ୟରୂପା ରଥ ପ୍ରକାଶ କରିଥିଲେ । ଏଥିପାଇଁ ଜିଲ୍ଲାପାଳ ଡ଼. ସାହୁ ଏବଂ ଉପଜିଲ୍ଲାପାଳ ଡ. ରଥ ଙ୍କ ସମେତ ସହରବାସୀ ସମସ୍ତ ବିଭାଗୀୟ କର୍ମଚାରୀ ଜନସାଧାରଣ ତଥା ଏହି ଦେବ କାର୍ଯ୍ୟରେ ନିଜର ମହତ ଯୋଗଦାନ ତଥା ଆଜି ଦେବୋତ୍ତର ବିଭାଗକୁ ଦାନ ପତ୍ର ଭାବରେ ଦାନ କରିଥିବା ଜମି ମାଲିକ ଶ୍ରୀ ହୃଦାନନ୍ଦ ମେହେର ତଥା ତାଙ୍କ ପୁତ୍ର ବିଶିଷ୍ଟ ବ୍ୟବସାୟୀ ଶ୍ରୀ ରାମକୃଷ୍ଣ ମେହେରଙ୍କୁ ବିଶେଷ କୃତଜ୍ଞତା ଜ୍ଞାପନ କରିଛନ୍ତି । ସେପଟେ ଦୀର୍ଘ ୪୬ ବର୍ଷ ପରେ ରୁଦ୍ରନାଥଙ୍କୁ ଦର୍ଶନ ପାଇଁ ସହରବାସୀ ଭବବିହ୍ୱଳ ହୋଇଯାଇଛନ୍ତି ।