25-Apr-2026

ସୁବର୍ଣ୍ଣପୁର,(ମନୋରଞ୍ଜନ ତ୍ରିପାଠୀ )
ସୋନପୁର କଲେଜ ଅର୍ଥନୀତି ଵିଭାଗର ଅଧ୍ୟାପକ ତଥା ପୁର୍ବତନ ଅଧ୍ୟକ୍ଷ ଶ୍ରୀ ପ୍ରଶନ୍ନ କୁମାର ଛୋଟରାୟ (୮୪)ଙ୍କ ବିୟୋଗରେ ଏକ ଶ୍ରଦ୍ଧାଞ୍ଜଳୀ ସଭା ତଥା ଶୋକସଭା ସୋନପୁର କଲେଜ ପୁରାତନ ଛାତ୍ରସଂଘ ପକ୍ଷରୁ ସୋନପୁର ପଞ୍ଚରଥ ମନ୍ଦିର ପ୍ରାଙ୍ଗଣ ରେ ଅନୁଷ୍ଠିତ ହୋଇଯାଇଛି । ଗତ ଏପ୍ରିଲ ୨୦ ତାରିଖ ଦିନ ସକାଳେ ତାଙ୍କ ଦେହାନ୍ତ ହୋଇଯାଇଛି । ଏହି ଖବର ଜଣାପଡ଼ିବା ପରେ ବ୍ରହ୍ମପୁର ଓ ସୋନପୁର ଅଞ୍ଚଳରେ ଶୋକର ଛାୟା ଖେଳିଯାଇଛି । ଶ୍ରୀ ଛୋଟରାୟ କଟକ ରେଭେନ୍ସା ବିଶ୍ୱବିଦ୍ୟାଳୟରେ ଅର୍ଥନୀତି ଵିଭାଗରେ ଶିକ୍ଷାଲାଭ କରି ନିଜ କ୍ୟାରିଅର ଗଢ଼ିଥିବା ବେଳେ ଓଡ଼ିଶାର ସ୍ୱାଭିମାନୀ ନେତା ତଥା ବିଧାୟକ ଶ୍ରୀ ବାଳ ଗୋପାଳ ମିଶ୍ର ଙ୍କ ସହପାଠୀ ତଥା କକ୍ଷପାଠୀ ଥିଲେ । ସେ ୧୯୬୪ ମସିହାରେ ସୋନପୁର କଲେଜ୍ ରେ ଅଧ୍ୟାପକ ଭାବରେ ଯୋଗ ଦେଇଥିବା ବେଳେ  ୧୯୯୦ ମସିହା ଯାଏ ସେ ଖୁବ୍ ନିଷ୍ଠା ଶୃଂଖଳା ର ସହ କାର୍ଯ୍ଯ ଭାର ତୁଲାଇ ଆସିଥିଲେ । ଅନେକ ସମୟରେ ଅଧ୍ୟକ୍ଷ ଭାବରେ ମଧ୍ୟ କାର୍ଯ୍ୟ ଭାର ଗ୍ରହଣ କରି କଲେଜ୍ ର ଶ୍ରେଣୀ ଗୃହ ଓ ଭିତ୍ତିଭୂମିର ବିକାଶ କରାଇ ବେଶ୍ ସୁନାମ ଅର୍ଜନ କରିଥିଲେ । ଶ୍ରୀ ଛୋଟରାୟ ଜଣେ ଛାତ୍ର ବତ୍ସଳ, ଶାନ୍ତ ପ୍ରିୟ ଓ ଅମାୟିକ ବ୍ୟକ୍ତିତ୍ୱ ଥିବା ବେଳେ ଶିକ୍ଷା ଓ ସାମଜିକ କ୍ଷେତ୍ରରେ ସୋନପୁରରେ ତାଙ୍କ ଉଲ୍ଲେଖନୀୟ ଅବଦାନ ରହିଛି । ତାଙ୍କର ଶହ ଶହ ଛାତ୍ରଛାତ୍ରୀ ନେସନାଲ ବ୍ୟାଙ୍କ ଓ ନାବାର୍ଡରେ ନିଯୁକ୍ତ ହୋଇଥିବା ବେଳେ ତାଙ୍କ ଶିକ୍ଷାଦାନ ବେଳେ ସୋନପୁର ଅର୍ଥନୀତି ଵିଭାଗର ଗୋଟେ ସୁବର୍ଣ୍ଣ ଯୁଗ ମନେ ହେଉଥିଲା ବୋଲି ପୁରାତନ ଛାତ୍ର ମାନେ ପ୍ରକାଶ କରିଛନ୍ତି ଓ ଅର୍ଥନୀତି ଵିଭାଗର ଏହି ଭଳି ଜଣେ ପ୍ରଧ୍ୟାପକଙ୍କ ବିୟୋଗରେ ଆମେ ମର୍ମାହତ ବୋଲି କହିଥିଲେ । ସୋନପୁରରୁ ବଦଳି ପରେ ସେ ଗୁଣୁପୁର ଗଞ୍ଜାମ ରେ ଅଧ୍ୟାପନା କରିବା ସହ ବାଲେଶ୍ୱର ଆଡ୍ଡା ରୋଡ କଲେଜ୍ ର ଅଧ୍ୟକ୍ଷ ଦାୟିତ୍ୱ ଗ୍ରହଣ କରିଥିଲେ ଓ ଶ୍ରୀ ଛୋଟରାୟ ସୋନପୁର କଲେଜ୍ ସମେତ ସବୁଠି ଏକ ଶୈକ୍ଷିକ ବାତାବରଣ ସୃଷ୍ଟି କରିଥିଲେ । ସବୁଠି ଯେମିତି ତାଙ୍କ ଆନ୍ତରିକତା ଥିଲା ତାଙ୍କ ପ୍ରତି ଛାତ୍ରଛାତ୍ରୀ ଅଭିଭାବକ ଓ କଲେଜ୍ କର୍ମଚାରୀଙ୍କ ଯଥେଷ୍ଟ ସମ୍ମାନ ମଧ୍ୟ ରହିଥିଲା । ଶ୍ରୀ ଛୋଟରାୟ ଙ୍କ ଅନେକ ସମୟରେ ସୋନପୁର ଅଞ୍ଚଳ ଉପରେ ଅନେକ ଲେଖା ବିଭିନ୍ନ ପତ୍ରପତ୍ରିକା ଓ ମାଗାଜିନରେ ପ୍ରକାଶ ପାଇଛି । ବ୍ରହ୍ମପୁର ବାସଭବନ ରେ ଶ୍ରୀ ଛୋଟରାୟ ଙ୍କ ମୃତ୍ୟୁ ସମୟରେ ତାଙ୍କ ଏକ ମାତ୍ର ପୁଅ ବିବେକାନନ୍ଦ (ବାପି) ଓ ତିନି ଝିଅ ଆତ୍ମୀୟ ସ୍ଵଜନ ଉପସ୍ଥିତି ଥିଲେ । ସ୍ଥାନୀୟ ସ୍ଵର୍ଗଦ୍ଵାର ଠାରେ ଅନ୍ତିମ ସଂସ୍କାରରେ ବାପି ମୁଖାଗ୍ନି ଦେଇଥିଲେ । ପୁରାତନ ଛାତ୍ର ସଂଘର ପକ୍ଷରୁ ଅନୁଷ୍ଠିତ ଶ୍ରଦ୍ଧାଞ୍ଜଳି ସଭାରେ ସଭାପତି ଡ ପ୍ରଫୁଲ୍ଲ କୁମାର ରଥ ଓ ସମ୍ପାଦକ ଭାରତ ଭୂଷଣ ଦାଶ ଙ୍କ ସମେତ ଅନେକ ପୁରାତନ ଛାତ୍ର ଉପସ୍ଥିତ ରହି ଶ୍ରୀ ଛୋଟରାୟ ଙ୍କ ଫଟୋ ଚିତ୍ରରେ ପୁଷ୍ପ ଅର୍ପଣ କରିଥିଲେ ।