06-Feb-2021

ଚେନ୍ନାଇ (ପ୍ରେରଣା ଖବର ବ୍ୟୁରୋ) : ଅଧିନାୟକ ଜୋ ରୁଟ୍‌ଙ୍କ ଦ୍ଵିଶତକ ବଳରେ ଭ୍ରମଣକାରୀ ଇଂଲଣ୍ଡ ଚେନ୍ନାଇରେ ଖେଳା ଯାଉଥିବା ପ୍ରଥମ ଟେଷ୍ଟରେ ନିଜର ସ୍ଥିତି ମଜବୁତ କରି ନେଇଛି। ଅନ୍ୟପଟେ ଭାରତର ମୁସ୍କିଲ ବଢି ଯାଇଛି। ଜୋ ରୁଟ୍‌ଙ୍କ ୨୧୮ ରନର ଦମଦାର ଇନିଂସ ଓ ବେନ ଷ୍ଟୋକ୍ସଙ୍କ ୮୨ ରନ ଇନିଂସ ବଳରେ ଦ୍ଵିତୀୟ ଦିନର ଖେଳ ଶେଷ ସୁଦ୍ଧା ଇଂଲଣ୍ଡ ୮ ଓ୍ଵିକେଟ୍  ହରାଇ ୫୫୫ ରନର ବିଶାଳ ସ୍କୋର କରିଛି। ଡୋମିନିକ୍ ବେସ୍ ୨୮ ଓ ଜ୍ୟାକ୍ ଲିଚ୍‌ ୬ ରନ କରି ଖେଳୁଛନ୍ତି। ପ୍ରଥମ ଦିନ ପରି ଦ୍ଵିତୀୟ ଦିନରେ ମଧ୍ୟରେ ଓ୍ଵିକେଟ୍ ପାଇଁ ଭାରତୀୟ ବୋଲରଙ୍କୁ ନାକେଦମ  ହେବାକୁ ପଡିଛି। ପ୍ରଥମ ଦୁଇ ଦିନରେ ଭାରତୀୟ ବୋଲର ପ୍ରଭାବହୀନ  ରହିଛନ୍ତି। ଦ୍ଵିତୀୟ ଦିନ ଖେଳ ରୁଟ୍ ଓ ଷ୍ଟୋକ୍ସଙ୍କ ନାମରେ ରହିଛି।

ପ୍ରଥମ ଦିନର ଅସମାପ୍ତ ଖେଳ ୩/୨୬୩ରୁ ଇଂଲଣ୍ଡ ଦ୍ଵିତୀୟ ଦିନର ବ୍ୟାଟିଂ ଆରମ୍ଭ କରିଥିଲା। ଅଧିନାୟକ ଜୋ ରୁଟ୍ ୧୨୮ ରନ କରି ଅପରାଜିତ ଥିଲେ। ସେ ବେନ ଷ୍ଟୋକ୍ସଙ୍କୁ ସାଥୀ କରି ଦଳର ସ୍କୋରକୁ ଆଗକୁ ବଢାଇଥିଲେ। ପ୍ରଥମ ଦିନରେ ଡୋମିନିକ ସିବଲିଙ୍କ ସହ ୨୦୦ ରନ ଭାଗିଦାରୀ କରିଥିବା ରୁଟ୍ ଷ୍ଟୋକ୍ସଙ୍କ ସହ ମିଶି ଭାରତର ଚିନ୍ତା ବଢାଇଥିଲେ। ପ୍ରଥମ ସେସନରେ ଦୁଇ ବ୍ୟାଟମ୍ୟାନ ଭାରତକୁ କୌଣସି ସୁଯୋଗ ଦେଇନଥିଲେ। ଉଭୟ ଚତୁର୍ଥ ଓ୍ଵିକେଟ୍‌ରେ ୧୨୪ ରନ   ଯୋଡି ଦଳର ସ୍କୋରକୁ ୩୮୭ରେ ପହଞ୍ଚାଇଥିଲେ। ବେନଷ୍ଟୋକ୍ସଙ୍କୁ ଆଉଟ୍ କରି ନଦୀମ ଭାରତକୁ ଚତୁର୍ଥ ସଫଳତା ଦେଇଥିଲେ। ଷ୍ଟୋକ୍ସ ୮୨ ରନ କରି ଆଉଟ୍ ହୋଇଥିଲେ। ଟେଷ୍ଟରେ ଏହା ତାଙ୍କର ୨୩ ତମ ଅର୍ଦ୍ଧଶତକ।

ଏହା ପରେ ରୁଟ୍ ଓ ଓଲି ପପଙ୍କ ମଧ୍ୟରେ ଆଉ ଏକ ଅର୍ଦ୍ଧଶତକୀୟ ଭାଗିଦାରୀ ଭାରତର ଚିନ୍ତାକୁ ଆହୁରି ବଢାଇଥିଲା। ଉଭୟ ପଞ୍ଚମ ଓ୍ଵିକେଟ୍‌ରେ ୮୬ ରନ ଯୋଡିଥିଲେ। ଓଲି ପପ ୩୪ ରନ କରି ଅଶ୍ଵିନଙ୍କ ବଲରେ ଏଲବିଡବ୍ଲ୍ୟୁ ହୋଇଥିଲେ। ଜୋ ରୁଟ୍ ଦମଦାର ବ୍ୟାଟିଂ କରି ଟେଷ୍ଟ କ୍ୟାରିୟରରେ ପଞ୍ଚମ ଦ୍ଵିଶତକ ପୂରଣ କରିଥଲେ।  ରୁଟ୍ ନିଜର ୨୧୮ ରନର ଇନିଂସ ଜରିଆରେ ଅନେକ ରେକର୍ଡ ନିଜ ନାମରେ କରିଛନ୍ତି। ଏହା ପରେ ଦିନର ଶେଷ ସେସନରେ  ହିଁ ଭାରତୀୟ  ବୋଲରକୁ ସଫଳତା ମିଳିଥିଲା। ଏହି ସେସନରେ ଭାରତକୁ ୪ ସଫଳତା ମିଳିଛି। ରୁଟ୍ ୨୧୮ ରନ କରି ନଦୀମଙ୍କ ବଲ୍‌ରେ ଏଲବିଡବ୍ଲ୍ୟୁ ହୋଇ ପାଭିଲିୟନ ଫେରିଥିଲେ। ପରେ ଜୋସ୍ ବଟଲର(୩୦ ରନ) ଇଶାନ୍ତ ଶର୍ମାଙ୍କ ଶିକାର ହୋଇଥିଲେ। ଜୋଫ୍ରା ଆର୍ଚର ଖାତା ଖୋଲିବା ପୂର୍ବରୁ ଇଶାନ୍ତଙ୍କ ବଲ୍‌ରେ କ୍ଲିନ ବୋଲ୍ଡ  ହୋଇଥିଲେ। ଦିନର ଖେଳ ଶେଷ ସୁଦ୍ଧା ଇଂଲଣ୍ଡ ୮ ଓ୍ଵିକେଟ୍‌ରେ ୫୫୫ ରନ କରିଛି। କ୍ରିଜରେ ଡୋମିନିକ୍ ବେସ୍ ୨୮ ଓ ଜ୍ୟାକ୍ ଲିଚ୍‌ ୬ ରନ କରି ଖେଳୁଛନ୍ତି।
ଭାରତ ପକ୍ଷରୁ ଇଶାନ୍ତ ଶର୍ମା, ଯଶପ୍ରୀତ ବୁମରା, ରବି ଚନ୍ଦ୍ରନ ଅଶ୍ଵିନ ଓ ଶାହବାଜ ନଦୀମ ପ୍ରତ୍ୟେକ ଦୁଇଟି ଲେଖାଏଁ ଓ୍ଵିକେଟ୍ ନେଇଛନ୍ତି।