16-Mar-2026

କଣ୍ଟାମାଳ(ଜୟ କୁମାର ମହାରଣା): ବୌଦ୍ଧ ଜ଼ିଲ୍ଲା କଣ୍ଟାମାଲ ବ୍ଲକ ଖଟଖଟିଆ ଶ୍ରୀ ଜଗନ୍ନାଥ ସରକାରୀ ଉଚ୍ଚ ବିଦ୍ୟାପୀଠର ପ୍ରାକ୍ତନ ଛାତ୍ରଛାତ୍ରୀଙ୍କ ଦ୍ୱାରା ପ୍ରତିଷ୍ଠାତା ଶିକ୍ଷକ ଓ କର୍ମଚାରୀ ସମ୍ମାନ ସମାରୋହ କାର୍ଯ୍ୟକ୍ରମ ଅନୁଷ୍ଠିତ ହୋଇଯାଇଛି | ଏହି ଅବସରରେ ବିଦ୍ୟାଳୟର ଅନୁଷ୍ଠିତ ସାଧାରଣ ସଭାରେ ବିଦ୍ୟାଳୟର ୧୯୮୬ ମାଟ୍ରିକ ବ୍ୟାଚର   ଛାତ୍ରୀ ସନ୍ଧ୍ୟାରାଣୀ ପ୍ରଧାନଙ୍କ ସଭାପତିତ୍ୱ କରିଥିବାବେଳେ ପ୍ରତିଷ୍ଠାତା ପ୍ରଧାନ ଶିକ୍ଷକ ଶ୍ରୀଯୁକ୍ତ ସତ୍ୟବାନ ବସ୍ତିଆ ପ୍ରତିଷ୍ଠାତା ବିଜ୍ଞାନ ଶିକ୍ଷକ  ବିଜୟ ପ୍ରଧାନ ହିନ୍ଦୀ ଶିକ୍ଷକ ନରେନ୍ଦ୍ର ପ୍ରଧାନ , ସଂସ୍କୃତ ଶିକ୍ଷକ ଜୟକୃଷ୍ଣ ପ୍ରଧାନ ଇତିହାସ ଶିକ୍ଷକ ଭୁବନେଶ୍ୱର ବସ୍ତିଆ ଖେଳ ଶିକ୍ଷକ ପଞ୍ଚାନନ ପ୍ରଧାନ ଜୟନ୍ତ ପ୍ରଧାନ , ପ୍ରତିଷ୍ଠାତା କ୍ଲାର୍କ  ତରଣୀସେନ ବସ୍ତିଆ , କର୍ମଚାରୀ ପ୍ରଦୀପ ଖେତୀ ପ୍ରମୁଖ ଯୋଗ ଦେଇ ବିଦ୍ୟାଳୟର ପ୍ରତିଷ୍ଠାତା ତଥା ଏ ଅଞ୍ଚଳର ଜଣାଶୁଣା ରାଜନୈତିକ ବ୍ୟକ୍ତିତ୍ୱ ତଥା ସମାଜସେବୀ ସ୍ବର୍ଗତ ସୋମନାଥ ବସ୍ତିଆ ଭୂମିଦାନ କରିବା ସଂଗେ ସଂଗେ ଏହି ଅଞ୍ଚଳ ଶିକ୍ଷାକ୍ଷେତ୍ରରେ ଆଗକୁ ବଢାଇବା ପାଇଁ ଅଂଚଳର କେତେକ ବିଶିଷ୍ଟ ବ୍ୟକ୍ତିଙ୍କ ସହଯୋଗ ରେ ବିଦ୍ୟାଳୟଟିକୁ  ୧୯୮୩ ମସିହାରେ ପ୍ରତିଷ୍ଠିତ ହୋଇଥିଲା | ଏଥିରେ   ତାଙ୍କ ଗୁରୁତ୍ୱପୂର୍ଣ୍ଣ  ଭୂମିକାକୁ  ଭୁୟସୀ ପ୍ରସଂଶା କରିଥିଲେ | ଏବଂ ସେହି ସମୟରେ ବିଦ୍ୟାଳୟର ଶୈଖିକ ମାହୋଲ କେମିତିଥିଲା ତାହା ବଖାଣିଥିଲେ | ପରେ  ପୁରାତନ ଛାତ୍ରଛାତ୍ରୀମାନେ ବିଦ୍ୟାଳୟରେ ପଢ଼ୁଥିବା ସମୟରେ ଘଟିଥିବା ସ୍ମରଣୀୟ ମୁହୂର୍ତ୍ତ ଗୁଡିକୁ ମାନେ ପକାଇଥିଲେ | ଫଳରେ ବିଦ୍ୟାଳରେ ଶିକ୍ଷକ ଓ ପ୍ରାକ୍ତନ ଛାତ୍ରଛାତ୍ରୀଙ୍କ ଭିତରେ ଏକ ଭାବବିହ୍ଵଳପୂର୍ଣ୍ଣ ପରିବେଶ ଦେଖିବାକୁ ମିଳିଥିଲା |  ଏହି  ଅବସରରେ ବିଦ୍ୟାଳୟର ପ୍ରତିଷ୍ଠାତା ସଭାପତି ହରିହର ପ୍ରଧାନ , ସମ୍ପାଦକ ଦେବରାଜ ବସ୍ତିଆ , ସଭ୍ୟ ପଞ୍ଚାନନ ଅମାତ , ଲିଙ୍ଗରାଜ ପ୍ରଧାନ ସମେତ ଅନେକ ଶିକ୍ଷକ ଶିକ୍ଷୟିତ୍ରୀ ଯୋଗଦେଇ ଏଭଳି କାର୍ଯ୍ୟକ୍ରମ ପାଇଁ ପ୍ରାକ୍ତନ ଛାତ୍ରଛାତ୍ରୀଙ୍କ ଭୁୟସୀ ପ୍ରସଂଶା କରିଥିଲେ | 
 ପରେ ପ୍ରତିଷ୍ଠାତା ଶିକ୍ଷକ ଓ କର୍ମଚାରୀଙ୍କୁ ସମ୍ମାନ ପତ୍ର ଓ ଉପଢୌକନ ଦେଇ ସମ୍ମାନିତ କରାଯାଇଥିଲା | ଏବଂ  ଶେଷରେ ସମସ୍ତ ଶିକ୍ଷକଙ୍କୁ ନେଇ ଏକ ଶୋଭାଯାତ୍ରାରେ ଗ୍ରାମପରିକ୍ରମା କରାଯାଇଥିଲା | ବିଦ୍ୟାଳୟର ପ୍ରାକ୍ତନ ଛାତ୍ର ସଂଜୀବ କୁମାର ବସ୍ତିଆଙ୍କ ଅବାହକତ୍ୱରେ ଅନୁଷ୍ଠିତ ଏହି କାର୍ଯ୍ୟକ୍ରମରେ କୋଷାଧକ୍ଷ ଭାବେ ପ୍ରାକ୍ତନ ଛାତ୍ର କାଶୀ ବିଶ୍ୱନାଥ କର୍ଣ୍ଣ କୋଷାଧକ୍ଷ ଦାୟିତ୍ୱ ତୁଲାଇଥିଲେ | ପ୍ରାକ୍ତନ ଛାତ୍ର ଭାର୍ଜନ ପ୍ରଧାନ ସ୍ୱାଗତ ଭାଷଣ ଦେଇଥିବା ବେଳେ ରଞ୍ଜନ ପାତ୍ର  ଅତିଥି ପରିଚୟ  ପ୍ରଦାନ କରିଥିଲେ | ରଂଯୁ ଅମାତ ମଂଚ ପରିଚାଳନା କରିଥିବାବେଳେ ପ୍ରାକ୍ତନ ଛାତ୍ରୀ ତଥା  ବିଦ୍ୟାଳୟର ବର୍ତ୍ତମାନ ର ଭାରପ୍ରାପ୍ତ ପ୍ରଧାନ ଶିକ୍ଷୟିତ୍ରୀ ଯାଜ୍ଞସେନୀ ଖେତୀ ଧନ୍ୟବାଦ ଅର୍ପଣ କରିଥିଲେ |  ଏହି କାର୍ଯ୍ୟକ୍ରମରେ ବିଦ୍ୟାଳୟର ବର୍ତ୍ତମାନ ର ଶିକ୍ଷକ , କର୍ମଚାରୀ ସମେତ  ସମସ୍ତ ପୁରାତନ ଓ ବର୍ତ୍ତମାନ ର ଛାତ୍ରଛାତ୍ରୀ ଉପସ୍ଥିତ ରହି ସମସ୍ତ ପ୍ରକାର ସହଯୋଗ କରିଥିଲେ | ବିଦ୍ୟାଳୟର ପ୍ରାକ୍ତନ ଛାତ୍ରଛାତ୍ରୀମାନେ ଏହି ଅବସରରେ ବହୁ ଦିନ ପରେ ନିଜ ଶିକ୍ଷକଙ୍କ ସମେତ ନିଜ ବ୍ୟାଚ ର ବନ୍ଧୁ ମାନଙ୍କ ଭେଟ ହୋଇଥିବାରୁ ଏବଂ ଏହି ମୁହୂର୍ତ୍ତକୁ ସ୍ମରଣୀୟ କରିବା ପାଇଁ ପରସ୍ପର ସହିତ  ଫୋଟୋ ଉଠାଉଥିବା ଦେଖିବାକୁ ମିଳିଥିଲା |