13-Mar-2026

ସୁନ୍ଦରଗଡ଼(ଟୋନିସ ରୋହିଦାସ) ଲାଞ୍ଚ ନେଉଥିବା ବେଳେ ବଡ଼ଗାଁ ଥାନାର ଏଏସଆଇ ଅରୁପାନନ୍ଦ ଦାସ ଧରାପଡ଼ିଛନ୍ତି।
ସୂଚନା ଅନୁଯାୟୀ, ଆଜି ସଂଧ୍ୟା ପ୍ରାୟ ୬ଟା ୩୦ ମିନିଟ୍ ସମୟରେ ରାଉରକେଲା ଭିଜିଲାନ୍ସ ବିଭାଗ ଏହି ଚଢ଼ାଉ କରିଥିଲା। ବଡ଼ଗାଁର ରଞ୍ଜନ ଦାସ ଓରଫ ମୁନୁ କଲେଜ ଅଣ୍ଡରପାସ ନିକଟରେ ଏକ ଦୋକାନ ଖୋଲିଥିଲେ। ସେଠାରେ ମଦ ବ୍ୟବସାୟ କରିବାକୁ ଦେବା ପାଇଁ ଏଏସଆଇ ଅରୁପାନନ୍ଦ ଦାସ ପ୍ରତିମାସ ୨୫ ହଜାର ଟଙ୍କା ଲାଞ୍ଚ ଦାବି କରିଥିବା ଅଭିଯୋଗ ହୋଇଥିଲା।
ଏନେଇ ରଞ୍ଜନ ଦାସ ରାଉରକେଲା ଭିଜିଲାନ୍ସ ବିଭାଗରେ ଅଭିଯୋଗ କରିଥିଲେ। ଯୋଜନା ଅନୁଯାୟୀ ଆଜି ସଂଧ୍ୟାରେ ବଡ଼ଗାଁ ଥାନା ସମ୍ମୁଖରେ ଥିବା ବିହାରୀ ଚା ଦୋକାନରେ ରଞ୍ଜନ ଦାସ ୨୫ ହଜାର ଟଙ୍କା ଦେଉଥିବା ବେଳେ ଭିଜିଲାନ୍ସ ଟିମ୍ ମାଡ଼ି ବସି ଏଏସଆଇଙ୍କୁ ଟଙ୍କା ସହିତ ଧରିଥିଲା।
ଏହି ଚଢ଼ାଉରେ ରାଉରକେଲା ଭିଜିଲାନ୍ସ ଡିଏସପି ରଶ୍ମୀତା ଲାକ୍ରାଙ୍କ ନେତୃତ୍ୱରେ ଇନ୍ସପେକ୍ଟର ଶିବ ନାରାୟଣ ଭଦ୍ର, ଲକ୍ଷ୍ମୀକାନ୍ତ ପ୍ରଧାନ, ମାନସ ରଞ୍ଜନ ଭୋଇ ଓ ସୁନିତା ଓରାମ ସହ ଅନ୍ୟାନ୍ୟ ଅଧିକାରୀମାନେ ଏହି ଅଭିଯାନରେ ସମ୍ମିଳିତ ଥିଲେ।
ଅଭିଯୋଗକାରୀ ରଞ୍ଜନ ଦାସ କହିଛନ୍ତି ଯେ ଏଏସଆଇ ଅରୁପାନନ୍ଦ ଦାସ ବାରମ୍ବାର ଟଙ୍କା ମାଗିବା ସହ ତାଙ୍କୁ ମାନସିକ ଭାବେ ନିର୍ଯ୍ୟାତନା ଦେଉଥିଲେ। ଏହି କାରଣରୁ ସେ ଭିଜିଲାନ୍ସ ବିଭାଗର ସହାୟତା ନେଇଥିବା କଥା କହିଛନ୍ତି।
ଅନ୍ୟପଟେ କୁଆଁଟ ଅଞ୍ଚଳରେ ପୋଲିସ ଚଢ଼ାଉ କରି ୧ ଲକ୍ଷ ୫୭ ହଜାର ଟଙ୍କା ନଗଦ, ୫ ହଜାର ଆମେରିକୀୟ ଡଲାର ସହ ୧୫ଟି ଦେଶୀ ମଦ ବୋତଲ ଜବତ କରିଥିବା ସୂଚନା ମିଳିଛି।
ଏହି ଘଟଣା ପରେ ବଡ଼ଗାଁ ଅଞ୍ଚଳରେ ଚର୍ଚ୍ଚା ବଢ଼ିଛି।