30-Oct-2025

ବରପାଲି  (ସୁଦାମ ଦୀପ)
ବରପାଲି ବ୍ଲକ ଅର୍ନ୍ତଗତ କଳାଗ୍ରାମ କୁମ୍ଭାରୀରେ ମାଆ ବ୍ରଜେଶ୍ବରୀ ଦେବୀଙ୍କ ୧୭୬ତମ ବାର୍ଷିକ ସ୍ନାନ ମହୋତ୍ସବ ଉତ୍ସାହ ଉଦ୍ଦିପନା ମଧ୍ଯରେ ସମ୍ପନ୍ନ ହୋଇଯାଇଛି। ଏହି ଅବସରରେ ବ୍ରଜେଶ୍ୱରୀ ନାଟ୍ୟ ସଂସଦ ସଭାପତି କେତନ ସାହୁଙ୍କ ସଭାପତିତ୍ବରେ ଏକ ସାଂସ୍କୃତିକ ସଭାର ଆୟୋଜନ ହୋଇଥିଲା। ସଭାକାର୍ଯ୍ଯକୁ ପୂର୍ବତନ ଶିକ୍ଷକ ରାମଜୀ ପଧାନ ସଞ୍ଚାଳନ କରିଥିଲେ। ବାର୍ଷିକ ସ୍ନାନ ମହୋସବରେ ମୂଖ୍ୟଅତିଥି ଭାବରେ ବିଶିଷ୍ଟ ଶବ୍ଦନୃତ୍ଯ ବିଶାରଦ ପଦ୍ମଶ୍ରୀ ଭାଗବତ ପଧାନ ଯୋଗ ଦେଇଥିବା ବେଳେ ଅତିଥି ଭାବରେ ବିଶ୍ଵ ପ୍ରସିଦ୍ଧ ଧନୁଯାତ୍ରାର ପୂର୍ବତନ କଂସ ହୃଷୀକେଶ ଭୋଇ, ସାମ୍ବାଦିକ  ଚିତ୍ତରଞ୍ଜନ ସାହୁ, ଧନୁଯାତ୍ରା ମହାମନ୍ତ୍ରୀ ଗୋଲାପ ଦାଶ ପ୍ରମୁଖ ଯୋଗଦାନ କରିଥିଲେ। ମାଁ ଭଗବତୀ ବ୍ରଜେଶ୍ଵରୀ ଦେବୀଙ୍କ ସ୍ନାନ ମହୋତ୍ସବ    ଏକ ନିଆରା ପରମ୍ପରା ଭାବରେ ଶତାଧିକ ବର୍ଷ କ୍ରମାଗତ ଭାବରେ ଚାଲିଛି। ସ୍ନାନୋତ୍ସବ ସମୟରେ ପରମ୍ପରା ଅନୁସାରେ ବାହାରେ ରହୁଥିବା ଗ୍ରାମର ଝିଅ ଭଉଣୀ ଏବଂ ପରିବାର ଲୋକେ ନିଜ ଗ୍ରାମକୁ ଫେରି ଆସିଥା'ନ୍ତି। ମାଁଙ୍କ ଦର୍ଶନ ପାଇଁ ବାହାର ଜିଲ୍ଲା ସହିତ ଆଖପାଖ ଅଞ୍ଚଳର ହଜାର ହଜାର ମହିଳା ଓ ପୁରୁଷ ଭକ୍ତ ଦର୍ଶନର ଲାଭ ପାଇଥା'ନ୍ତି। ପରେ ବ୍ରଜେଶ୍ୱରୀ ନାଟ୍ୟ ସଂସଦ କଳାକାରମାନଙ୍କ ପକ୍ଷରୁ ଏକ ସାଂସ୍କୃତିକ କାର୍ଯ୍ୟକ୍ରମ ଅନୁଷ୍ଠିତ ହୋଇଥିଲା।