19-Jan-2021

ବଲାଙ୍ଗୀର, (ପ୍ରେରଣା ଖବର)-ବିଶିଷ୍ଟ ଶ୍ରମିକ ନେତା ଲଳିତ କୁମାର ନାୟକଙ୍କ ଅକାଳ ବିୟୋଗରେ ବଲାଙ୍ଗୀର ଜିଲ୍ଲା ଓକିଲ ସଂଘ ପକ୍ଷରୁ ଏକ ଶୋକ ସଭା ଅନୁଷ୍ଠିତ ହୋଇଥିଲା । ଓକିଲ ସଂଘର ସଭାପତି ପ୍ରବୀଣ ମିଶ୍ରଙ୍କ ଆବାହକତ୍ୱରେ ଅନୁଷ୍ଠିତ ଏହି ଶୋକ ସଭାରେ ପ୍ରଥମେ ଲଳିତ ନାୟକଙ୍କ ବିୟୋଗରେ ଦୁଇ ମିନିଟ ନୀରବ ପ୍ରାର୍ଥନା କରାଯାଇଥିଲା । ଏଥିରେ ସଂଘର ବହୁ ସଭ୍ୟ/ସଭ୍ୟା ଯୋଗ ଦେଇ ବଲାଙ୍ଗୀରରେ ହାଇକୋର୍ଟର ସ୍ଥାୟୀ ବ୍ୟଞ୍ଚ ଆନ୍ଦୋଳନରେ ଲଳିତ ନାୟକଙ୍କ ଭୂମିକା ଓ ବିଧାନସଭାରେ  ଓକିଲ ମାନଙ୍କ ଆନ୍ଦୋଳନ ସମୟରେ ତାଙ୍କ ସାଂଗଠନିକ ଦକ୍ଷତା ସଂପର୍କରେ ମନେ ପକାଇ ଥିଲେ । ଓକିଲ ମାନଙ୍କ ହାଇକୋର୍ଟ ବେଂଚ ଆନ୍ଦୋଳନ ର କଥା ଯେତେବେଳେ ବି ଉଠିବ, ସେତେବେଳେ ଲଳିତ ନାୟକ ମାନେ ପଡିବେ ବୋଲି ମତପ୍ରକାଶ ପାଇଥିଲା l ଗିରିବ ଓ ଅବହେଳିତଙ୍କ ସ୍ୱର ଲଳିତ ନାୟକ ସବୁବେଳେ ଓକିଲ ସଂଘର ଦାବିକୁ ନିଜର ଦାବି ବୋଲି ଭାବୁଥିଲେ ଓ ବଂଚିଥିବା ପର୍ଯ୍ୟନ୍ତ ସେ ଏଥିପାଇଁ ନିସ୍ୱାର୍ଥପର ଭାବରେ ଲଢ଼େଇ କରି ଆସୁଥିଲେ ବୋଲି ଓକିଲ ମାନେ ମତ ଦେଇଥିଲେ । ଅନ୍ୟ ମାନଙ୍କ ମଧ୍ୟରେ ଏଡଭୋକେଟ୍ ପ୍ରମୋଦ ମିଶ୍ର, ଭବାନୀ ଶଙ୍କର ଶତପଥୀ, ରତନ ମହାରଣା ପ୍ରମୁଖ ସ୍ମୃତିଚାରଣ କରିଥିଲେ ।  ଶେଷରେ ଓକିଲ ସଂଘର ସଂପାଦକ ବାସୁଦେବ ରଥ ଧନ୍ୟବାଦ ଜ୍ଞାପନ କରିଥିଲେ ।