28-Mar-2025

ବଲାଙ୍ଗୀର(ପ୍ରେରଣା ଖବର): ବଲାଙ୍ଗୀର ଜିଲ୍ଲାରେ ଗତ କିଛିମାସ ହେଲା ପ୍ରଶାସନ ବାଲି ଚାଲାଣ କରୁଥିବା ଟ୍ରାକ୍ଟର ମାନଙ୍କୁ ଧରି ଫାଇନ ଆଦାୟ କରୁଛନ୍ତି । ଫଳରେ ଅନେକ ଲୋକ ଚଢାଦରରେ ବାଲିକିଣି ଘରକାମରେ ଲଗାଇବାକୁ ବାଧ୍ୟ ହେଉଛନ୍ତି । କିନ୍ତୁ ସେପଟେ ନଦୀରୁ ବେଆଇନ ଭାବରେ ଜେସିବି ଓ ହାଇୱାରେ ବାଲି ଚୋରା ଚାଲାଣ କରୁଥିବା ବାଲିମାଫିଆଙ୍କୁ ଖଣିଅଧିକାରୀ ନଧରି ତାଙ୍କ ସହିତ ଫିକ୍ସିଂ କରିଥିବା ଅଭିଯୋଗ ହୋଇଛି । ବଲାଙ୍ଗୀର ଖଣି ବିଭାଗର ଅଧିକାରୀଙ୍କୁ ସମୀକ୍ଷା ସମୟରେ ଅନେକଥର ତାଗିଦ କଲାପରେ ମଧ୍ୟ ନସୁଧୁରିବାରୁ ବଲାଙ୍ଗୀର ବିଧାୟକ ଅସନ୍ତୋଷ ପ୍ରକାଶ କରି ଖଣିଅଧିକାରୀଙ୍କ କାର୍ଯ୍ୟକଳାପର ଉଚ୍ଚସ୍ତରୀୟ ତଦନ୍ତ କରିବାକୁ ରାଜ୍ୟସରକାରଙ୍କ ଖଣିବିଭାଗର ମନ୍ତ୍ରୀଙ୍କୁ ଚିଠି କରିଛନ୍ତି । ବିଧାୟକ କଳିକେଶ ନାରାୟଣ ସିଂଦେଓ ଖଣିବିଭାଗ ଅଧିନରେ ଥିବା ବାଲିକ୍ୱାରୀର ତଦନ୍ତ ସହିତ ବଲାଙ୍ଗୀର ଖଣିଅଧିକାରୀଙ୍କ କାର୍ଯ୍ୟକଳାପର ତଦନ୍ତ କରାଇବାକୁ ଖଣି ଓ ଇସ୍ପାତମନ୍ତ୍ରୀଙ୍କୁ ଚିଠିଲେଖି ଅନୁରୋଧ କରିବା ସହିତ ଏହାର ନକଲ ମୁଖ୍ୟଶାସନ ସଚିବ, ଖଣିବିଭାଗ ର ସଚିବଙ୍କୁ ପ୍ରେରଣ କରିଛନ୍ତି । ବିଧାୟକ ତାଙ୍କ ଅଭିଯୋଗ ପତ୍ରରେ ଦର୍ଶାଇଛନ୍ତି ଯେ, ବାଲିଘାଟ ଲିଜନେଇଥିବା ଠିକାଦାରମାନେ ଜାଲ ଟ୍ରାନ୍‌ଜିଟପାସ ଦେଉଛନ୍ତି । ଗାଁ ଗହଳିରେ ଲୋକମାନେ ଘରନିର୍ମାଣ ପାଇଁ ଟ୍ରାକ୍ଟରରେ ଆଣୁଥିବା ବାଲିକୁ ଚଢାଉକରାଯାଇ ହଜାର ହଜାର ଟଙ୍କାର ଫାଇନ ଆଦାୟ କରାଯାଉଛି । କିନ୍ତୁ ସେପଟେ ବେଆଇନ ଭାବରେ ହାଇୱାରେ କୋଟି କୋଟି ଟଙ୍କାର ବାଲି ଚୋରାଚାଲାଣ କରାଯାଉଥିଲେ ହେଁ ତାକୁ ଖଣି ଅଧିକାରୀ ଧରୁନାହାଁନ୍ତି । ପ୍ରଶାସନର ଏଭଳି କାର୍ଯ୍ୟକଳପାରେ ଜନସାଧାରଣ ଅତିଷ୍ଠ ହୋଇପଡିଛନ୍ତି । ଲୋକମାନେ ଚଢାଦରରେ ବାଲି କିଣିବାକୁ ପଡୁଛି । ବାଲିଘାଟ ମାନଙ୍କରେ ଠିକଦାରମାନଙ୍କୁ ଯେତେ ପରିମାଣର ଲିଜ ଦିଆଯାଇଛି ତାଠୁ ଢେର ଅଧିକ ପରିମାଣରେ ବାଲି ଉଠାଇ ଚୋରାଚାଲାଣ କରାଯାଉଛି । ଖଣିଅଧିକାରୀ ବାଲି ମାଫିଆମାନଙ୍କ ସହିତ ମିଶିଥିବା ବିଧାୟକ ଅଭିଯୋଗ କରି ଏହାର ଏକ ଉଚ୍ଚସ୍ତରୀୟ ତଦନ୍ତ ଦାବି କରିଛନ୍ତି ।