10-Nov-2026

ଟିଟିଲାଗଡ -  ବଲାଙ୍ଗୀର ଜିଲ୍ଲାର ସଇଁତଳା ପୋଲିସ ଷ୍ଟେସନ୍ ଗେଟ୍ ସମ୍ମୁଖରେ ରବିବାର ପାହାନ୍ତିଆରେ ଏକ ଭୟଙ୍କର ସଡ଼କ ଦୁର୍ଘଟଣା ଘଟିଥିଲା। ପୁରୀରୁ ନୂଆପଡ଼ା ଆସୁଥିଲା ଜଗନ୍ନାଥ ଏକ୍ସପ୍ରେସ ଭୋଲବୋ ବସ , ତେବେ ସଇଁନ୍ତଲା ଥାନା ସମ୍ମୁଖରେ ସାମ୍ନା ପଟୁ ଆସୁଥିବା ଗୋଟିଏ ଟ୍ରକ ସାଇଡରୁ ଅତିକ୍ରମ କରୁଥିବା ବେଳେ ଟ୍ରକର ଚକ ଫାଟି ଯିବା ଯୋଗୁଁ ଉଭୟ ଗାଡି ମଧ୍ୟରେ ଧକ୍କା ହୋଇଥିଲା। ଧକ୍କା ପରେ ଟ୍ରକର  ଡ୍ରାଇଭର ଲଟକି ରହିଥିବା ଦେଖିବାକୁ ମିଳିଥିଲା। ତେବେ ବସ ଭିତରେ ପାଞ୍ଚରୁ ଛଅ ଜଣ ଥିବା ଜଣାପଡ଼ିଥିବା ବେଳେ ଭୁବନେଶ୍ୱରରୁ ଶ୍ରୀମତି ସତ୍ୟଭାମା ସାହୁ ଟିଟିଲାଗଡ ଆସିବା ପାଇଁ ଏକ ନମ୍ବର ସିଟରେ ବସିଥିଲେ। ଏହି ଦୁର୍ଘଟଣାରେ ତାଙ୍କର ମୁଣ୍ଡରେ ଜୋର ଆଘାତ ଲାଗିଥିବା ବେଳେ ବଲାଙ୍ଗିର ଭୀମ ଭୋଇ ମେଡିକାଲକୁ ଯାଇ ଚିକିତ୍ସା କରାଇଥିବା ଟିଟିଲାଗଡ ପଦ୍ମନାଭପୁର ବାସିନ୍ଦା ଶ୍ରୀଯୁକ୍ତ ସୋମନାଥ ସାହୁ ଆଜି ଆମ ପ୍ରତିନିଧୀକୁ ଟିକେଟ ସହ ସମସ୍ତ ଘଟଣା ବିଷୟରେ ଜଣାଇଛନ୍ତି। ତେବେ କେହି ଆଘାତ ହୋଇ ନ ଥିବା ଗଣ ମାଧ୍ୟମରେ ଖବର ପ୍ରସାରଣ କରାଯାଇଥିବା ବେଳେ ଆଜି ସୋମନାଥ ସାହୁ ମୋ ଭଉଣୀର ମୁଣ୍ଡରେ ୧୬ ଟି ଷ୍ଟିଜ ହୋଇଥିବା ଅବଗତ କରାଇଛନ୍ତି।

ଖବର ପାଇ ପୋଲିସ ପ୍ରଶାସନ ଓ ଅଗ୍ନିଶମ ବାହିନୀ ଘଟଣାସ୍ଥଳରେ ପହଞ୍ଚି ଡ୍ରାଇଭରଙ୍କୁ ଉଦ୍ଧାର କରିବା ସହ ଚିକିତ୍ସା ପାଇଁ ପଠାଇଥିଲେ । ଘଟଣାକୁ ନେଇ ପୋଲିସ ପକ୍ଷରୁ ତଦନ୍ତ ଜାରି ରହିଛି। ତେବେ ରାଜ୍ୟ ସରକାରଙ୍କ ଭୋଲବୋ ବସର ସାମ୍ନା କାଚ ଭାଙ୍ଗିବା ସହ ସାଇଡ ପଟୁ ଘଷି ହୋଇଥିବା ଦେଖିବାକୁ ମିଳିଥିଲା। ତେବେ ଦୁର୍ଘଟଣାର ଶିକାର ହୋଇଥିବା ସତ୍ୟଭାମାଙ୍କୁ ସରକାରଙ୍କ ପକ୍ଷରୁ କୌଣସି ସହାୟତା ପ୍ରଦାନ କରାଯାଇ ନ ଥିବା ଅଭିଯୋଗ ହୋଇଛି।