23-Mar-2025

ରିପୋର୍ଟ: ଆକାଶ ମିଶ୍ର(ଅତାବିରା)

ଶ୍ରୀକ୍ଷେତ୍ରରୁ ଶ୍ରଦ୍ଧାଳୁଙ୍କ ପାଇଁ  ପହଞ୍ଚିଲା ଅଭଡ଼ା

 ଏକତା, ସମାନତା ଓ ବିଶ୍ୱ  ଭାତୃତ୍ବ  ଜଗନ୍ନାଥ ସଂସ୍କୃତିର  ମୂଳ ଲକ୍ଷ୍ୟ । ଏହି ସଂସ୍କୃତି ସାର୍ବଜନୀନ ।ଯାହାର  ବାସ୍ତବତା ଦେଖିବାକୁ ମିଳିଥିଲା  ଅତାବିରା ଜଗନ୍ନାଥ ମନ୍ଦିର  ର ସୁବର୍ଣ୍ଣ ଜୟନ୍ତୀ ମହୋତ୍ସବ ରେ । ଜାତି , ଧର୍ମ ,ବର୍ଣ୍ଣ ,ନିର୍ବିଶେଷରେ ସମସ୍ତେ ଏକାକାର ହୋଇ  ସ୍ଵତଃ ସ୍ପୁର୍ତ୍ତ ଭାବରେ ନିଜକୁ  ଜଗନ୍ନାଥ ଙ୍କ ସେବକ ମନୋବୃତ୍ତି ନେଇ  ସେବା ଯୋଗାଇ ମହୋତ୍ସବ କୁ ସଫଳ କରିବା ସହିତ ଏକତାର ମନ୍ତ୍ରରେ ଅଭିମନ୍ତ୍ରୀତ ହୋଇ ସମସ୍ତେ ନିଜକୁ  ସାମିଲ କରିନେଇ ଥିଲେ । ମହୋତ୍ସବ କୁ ଶାନ୍ତିପୂର୍ଣ୍ଣ ଭାବରେ ସଫଳତାର  ସହ ସମ୍ପନ୍ନ କରିବା ପାଇଁ   ମୁଖ୍ୟ ପରିଚାଳନା କମିଟି, ଅଭ୍ୟର୍ଥନା , ମୀନା ବଜାର , ଶାନ୍ତି ଶୃଙ୍ଖଳା , ସଫେଇ , ସାଂସ୍କୃତିକ, ପୂଜା , ଅନ୍ନଭୋଗ , ଦୋକାନ ବଜାର ଆଦି କମିଟି ମାନ ଗଠନ କରାଯାଇ ଥିଲା ଓ ସମସ୍ତେ ସକ୍ରିୟ ହୋଇ ଦାୟିତ୍ଵ ସମ୍ପନ୍ନ କରିଥିଲେ ।ତିନି ଦିନ ଧରି ଚାଲିଥିବା ଏହି ସୁବର୍ଣ୍ଣ ଜୟନ୍ତୀ ମହୋତ୍ସବ ର ଅନ୍ତିମ ଦିବସରେ ଆଜି ଗୀତା ଯଜ୍ଞ, ବିଷ୍ଣୁ ସହସ୍ର ନାମ ହବନ, ନୃସିଂହ  ସହସ୍ର ନାମ  ହବନ  , ଅପରାହ୍ନ ୪ ଟାରେ ପୂର୍ଣ୍ଣାହୁତି ସହ  ଆରତୀ ସହ ସମ୍ପନ୍ନ ହୋଇଥିଲା ଯଜ୍ଞ କର୍ମ ରୀତି ।ଏହା ପରେ  ଶ୍ରୀରାଧା କୃଷ୍ଣ ଙ୍କ ନଗର ପରିକ୍ରମା କରାଯାଇ ରାତ୍ର ୯ ଘଣ୍ଟା ସମୟରେ ଶ୍ରୀ ରାଧା କୃଷ୍ଣ ଙ୍କ ରତ୍ନ ସିଂହାସନ ରେ ବିଜେ କଲାପରେ ମହା ଆରତୀ ସହ  ସମ୍ପନ୍ନ ହୋଇଥିଲା ସୁବର୍ଣ୍ଣ ଜୟନ୍ତୀ ମହୋତ୍ସବ । ଆଜି ଅନ୍ତିମ ଦିବସରେ ବିଭିନ୍ନ ଗ୍ରାମରୁ ପାହୁର ଭାର   ପ୍ରଭୁ ଜଗନ୍ନାଥ ଙ୍କ ପାଖକୁ ପହଞ୍ଚିଥିଲା । ଏହି ଅବସରରେ ବିଭିନ୍ନ ପ୍ରକାର ଦାନ କରିଥିବା ୫୬ ଜଣ ବଦାନ୍ୟ ବ୍ୟକ୍ତି ଙ୍କୁ ସମ୍ବର୍ଦ୍ଧନା କରାଯାଇଥିଲା ସୁବର୍ଣ୍ଣ ଜୟନ୍ତୀ କମିଟି ପକ୍ଷରୁ ।ଏହା ବ୍ୟତୀତ ଆଜି ସମସ୍ତ ଶ୍ରଦ୍ଧାଳୁ ଙ୍କ ପାଇଁ ଶ୍ରୀକ୍ଷେତ୍ର ପୁରୀ ରୁ  ଅଭଡ଼ା ପହଞ୍ଚିଥିଲା  ଅତାବିରାକୁ । ହଜାର ହଜାର ଶ୍ରଦ୍ଧାଳୁ ଭକ୍ତଙ୍କୁ  ଏହି ଅଭଡ଼ା  ବଣ୍ଟନ କରିଥିଲେ ଗ୍ରାମର  ଯୁବତୀ ମାନେ । ସତେ ଯେମିତି ସ୍ଥାନଟି ଶ୍ରୀକ୍ଷେତ୍ର ପୁରୀ ର ଆନନ୍ଦ ବଜାର ପାଲଟି ଯାଇଥିଲା  ଆଜି। ତିନି ଦିନ ଧରି ଆନ୍ଧ୍ର ସମ୍ପ୍ରଦାୟ ର ମହିଳା ମାନେ, ଅତାବିରା  ସତ୍ୟ ସାଇ ସେବା ସମିତି ର  ଭାଇ ଭଉଣୀ ମାନେ  ଅନ୍ନ ପ୍ରସାଦ ବଣ୍ଟନ ସହ ଅନ୍ୟାନ୍ୟ ସେବା ଯୋଗାଇଥିଲେ ।  ଅପରାହ୍ନ ରେ  ବନ୍ଦିତା ନାଏକଙ୍କ ପାରାୟଣ,  ସନ୍ଧ୍ୟାରେ
 

ଗାୟିକା ପୁଷ୍ପାଞ୍ଜଳି ମେହେର ଙ୍କ ଦ୍ଵାରା ଓମ୍ ଜୟ ଶ୍ରୀ ରାମ କୃଷ୍ଣ ଗୁରୁ ଭଜନ  ଓ ରାତିରେ ସର୍ଗମ୍ ସିତିରା ଆର୍କେଷ୍ଟ୍ରା  ଆଶିଷ କୁମାର ଓ ସାଥିଙ୍କ ଦ୍ଵାରା ପରିବେଷିତ ହୋଇଥିଲା  ସାଂସ୍କୃତିକ କାର୍ଯ୍ୟକ୍ରମରେ , ଯାହା ଶ୍ରଦ୍ଧାଳୁ ଙ୍କ ମନ ମୁଗ୍ଧ କରି ଥିଲା । ମୁଖ୍ୟ ପରିଚାଳନା କମିଟିର ସଭାପତି ଦୈତାରି ପ୍ରଧାନ, ଉପ ସଭାପତି ସୁରେନ୍ଦ୍ର ସ୍ୱାଇଁ, ସମ୍ପାଦକ ଅମୃତ ପ୍ରଧାନ, ସହସମ୍ପାଦକ ସ୍ଵାଧୀନ ପ୍ରଧାନ , କୋଷାଧ୍ୟକ୍ଷ ମନୋଜ କୁମାର ବରାଈ, ସହ କୋଷାଧ୍ୟକ୍ଷ ଦେବେଶ ପ୍ରଧାନ , ଅତାବିରା ର ସମସ୍ତ ଅନୁଷ୍ଠାନ, ସମ୍ପ୍ରଦାୟ ଓ ଜନ ସାଧାରଣଙ୍କ ସହଯୋଗ ରେ ଏହି ମହୋତ୍ସବ ଶାନ୍ତିପୂର୍ଣ୍ଣ ଭାବରେ ସମ୍ପନ୍ନ ହୋଇଛି ।