22-Mar-2025

ଚୋରାବିଦ୍ୟୁତ୍ ତାର ଲଗାଇ ବାର୍ହା ମାରିଲେ

ବଲାଙ୍ଗୀର  :  ସଇଁନ୍ତଳା ବଡମାଳ ଗୋଳାବାରୁଦ କାରଖାନା ପରିସରରେ ଅବୈଧ ବନ୍ୟପ୍ରାଣୀଙ୍କୁ ଚୋରାଶିକାରୀମାନେ ରୀତିମତ ଶିକାର କରୁଥିବା ଜଣାଯାଇଛି ।  କିଛିବର୍ଷ ତଳେ କାରଖାନା ପାଚେରୀ ନିକଟସ୍ଥ ଏକ ଗାଆଁରେ ଏକ ବାଘୁଣୀକୁ ଗ୍ରାମବାସୀମାନେ ପିଟି ପିଟି ମାରିଦେବା ଘଟଣାରେ ସ୍ଥାନୀୟ ତତ୍କାଳୀନ ଟିଟିଲାଗଡ ବନବିଭାଗ ରେଞ୍ଜର ଅଡୁଆରେ ପଡିଥିବା ଘଟଣା ପରେ ଗତକାଲି ରାତିରେ କାରଖାନାର ପୋଷ୍ଟ ଅଫିସ ନିକଟରେ ଚୋରା ବିଦ୍ୟୁତ୍ ତାର ଲଗାଇ ଗୋଟିଏ  ଜଙ୍ଗଲି ବାର୍ହା ଶିକାର ଧରାପଡିଛି । 

ସିକ୍ୟୁରିଟି ଗାର୍ଡମାନେ ଉକ୍ତ ମୃତବାର୍ହାଟି ସମେତ ଚୋରାତାର ଇତ୍ୟାଦିକୁ ଜବତ କରି ବନବିଭାଗକୁ ହସ୍ତାନ୍ତର କରିଛନ୍ତି । 

ଉଲ୍ଲେଖଯୋଗ୍ଯ ଯେ , ଘଟଣା ସମୟରେ ବଡମାଳ ଫରେଷ୍ଟର ବଡମାଳରେ ଅନୁପସ୍ଥିତ  ଥିଲେ । ଏ ସମ୍ପର୍କରେ ଫରେଷ୍ଟର  ବିମ୍ବାଧର ବେହେରାଙ୍କୁ ପଚାରିବାରୁ ସେ  ଏଇ ୧୦/ ୧୫ ଦିନ ହେଲା ସେଠାକୁ ବଦଳି ହୋଇ ଆସିଥିବା , ଗତକାଲି ବିଶ୍ବ ବନଦିବସପାଳନ ଓ କୋର୍ଟ ଡିଉଟି ପାଇଁ ବଲାଙ୍ଗୀରରେ ଥିଲେ ଓ ଆଜି ବଡମାଳ  ଯାଉଥିବାର କହିଛନ୍ତି । ଏହି ମାମଲାରେ ନିକଟସ୍ଥ ଖାସ୍ ବାହାଲ- ନୂଆପଡା ଗ୍ରାମର ଦଶମୋଜ ସାହୁ ଏବଂ ପ୍ରମୋଦ ସାହୁ ନାମକ ୨ ଜଣ ଚୋରାଶିକାରୀଙ୍କୁ ବନବିଭାଗ  ଦ୍ବାରା ଗିରଫ କରାଯାଇ କୋର୍ଟ ଚାଲାଣ  କରାଯାଇଥିବା ପ୍ରକାଶ  । ଟିଟିଲାଗଡ ରେଞ୍ଜର ସଚ୍ଚିଦାନନ୍ଦ ସୁବୁଦ୍ଧିଙ୍କ ଦ୍ବାରା ମାମଲାର  ତଦନ୍ତ  କରାଯାଉଥିବା ଜଣାଯାଇଛି ।