12-Jan-2025

ବରଗଡ:(ନିରଞ୍ଜନ ତ୍ରିପାଠୀ)-ସରକାରୀ ବାଳିକା ଉଚ୍ଚ ବିଦ୍ୟାଳୟ ବରଗଡ ପରିସରରେ ଜିଲ୍ଲା ପ୍ରଶାସନ ଓ ଜିଲ୍ଲା ଶିକ୍ଷା ବିଭାଗର ମିଳିତ ଆନୁକୁଲ୍ୟରେ ବାଲ ଧନୁଯାତ୍ରା ମସୋତ୍ସବ ଅନୁଷ୍ଠିତ ହୋଇଯାଇଛି। ଜିଲ୍ଲା ଶିକ୍ଷା ଅଧିକାରୀ ଶ୍ରୀମାନ ରାଧାକାନ୍ତ ଛତ୍ରୀଙ୍କ ପ୍ରତ୍ୟକ୍ଷ ତତ୍ବାବଧାନରେ ଅନୁଷ୍ଠିତ ବାଲ ଧନୁଯାତ୍ରାର ଉଦଯାପନୀ ସଭାରେ ମୁଖ୍ୟ ଅତିଥି ଭାବେ ଖୋଲା ରଙ୍ଗମଞ୍ଚରେ ପ୍ରଦର୍ଶିତ ଧନୁଯାତ୍ରାରେ ଅଭିନୟ କରୁଥିବା କଂସ ମହାରାଜ ଯୋଗଦାନ କରି ଛାତ୍ରୀ ମାନଙ୍କ ଉଚ୍ଚକୋଟୀର ଅଭିନୟକୁ ପ୍ରଶଂସା କରିବା ସହ ମହିଳା ମାନେ ସବୁ କ୍ଷେତ୍ରରେ ଏବେ ସମତୁଲ୍ୟ ବୋଲି ମତବ୍ୟକ୍ତ କରିଥିଲେ।କଂସ ମହାରାଜ ଆଗାମୀ ଧନୁଯାତ୍ରା ମସୋତ୍ସବରେ ମହିଳା ମାନେ ମଧ୍ୟ କଂସ ଭୂମିକାରେ ଅଭିନୟ କରି ପାରିବେ ବୋଲି ଆଶା ବ୍ୟକ୍ତ କରିଥିଲେ। ସମ୍ମାନୀତ ଅତିଥି ଭାବେ ବରଗଡ଼ ସବ କଲେକ୍ଟର ପ୍ରଶନ୍ନ କୁମାର ପାଣ୍ଡେ , ଜିଲ୍ଲା ଶିକ୍ଷା ଅଧିକାରୀ  ରାଧାନାଥ ଛତ୍ରୀ, ଅତିରିକ୍ତ ଜିଲ୍ଲା ଶିକ୍ଷା ଅଧିକାରୀ ଜ୍ୟୋତି ରଂଜନ ସାହୁ, ସରକାରୀ ଉଚ୍ଚ ବାଳିକା ବିଦ୍ୟାଳୟ ବରଗଡ଼ର ପ୍ରଧାନ ଶିକ୍ଷୟିତ୍ରୀ ସୁଶ୍ରୀ ଶାନ୍ତି ସୁନା, ବରଗଡ଼ ଗୋଷ୍ଠୀ ଶିକ୍ଷା ଅଧିକାରୀ ସୁରେନ୍ଦ୍ର କୁମାର ସାହୁ, ଭେଡେନ ଗୋଷ୍ଠୀ ଶିକ୍ଷା ଅଧିକାରୀ ମଚ୍ଛିନ୍ଦ୍ର ମଲ୍ଲିକ, ଏବଂ ସୋହେଲା ଗୋଷ୍ଠୀ ଶିକ୍ଷା ଅଧିକାରୀ ଅମୃତା ସାହୁ ଯୋଗଦାନ କରି ଛାତ୍ରୀ ମାନଙ୍କୁ ଉତ୍ସାହିତ କରିଥିଲେ। ଶଙ୍କର ପଟ୍ଟନାୟକ, ନକୁଳ ବାଦୀ, ସୁଗ୍ରୀବ ବିଶି, ଗୋପାଳ ମିଶ୍ର,ତୁଲାରାମ ମହାନନ୍ଦ ଏବଂ ନେସନାଲ ସ୍କୁଲ ଅଫ୍ ଡ୍ରାମାର ରାମଚନ୍ଦ୍ର ସାହୁ, ଗଜେନ୍ଦ୍ର ଜାଲଙ୍କ ନିର୍ଦ୍ଦେଶନାରେ ବାଳିକା ସରକାରୀ ଉଚ୍ଚ ବିଦ୍ୟାଳୟର ପ୍ରାୟ ୪୦ ଜଣ ଛାତ୍ରୀ ନିଖୁଣ ଅଭିନୟ କରି ଦର୍ଶକ ମାନଙ୍କୁ ମନମୁଗ୍ଧ କରି ପାରିଥିଲେ। ଏହି ଉଦଯାପନୀ ସଭାରେ ଫେନ୍ସି ଡ୍ରେସ୍ ପ୍ରତିଯୋଗୀତା ପ୍ରଦର୍ଶିତ ହୋଇଥିଲା। ତାହା ସହିତ ସ୍ଥାନୀୟ ବିଭିନ୍ନ ବିଦ୍ୟାଳୟରୁ କଂସ କୃଷ୍ଣ ରାଧା ଭୂମିକାରେ ଭାଗ ନେଇଥିଲେ। ସ୍ଥାନୀୟ ବିଦ୍ୟାଳୟର ସମସ୍ତ ଶିକ୍ଷକ ଶିକ୍ଷୟିତ୍ରୀ କର୍ମଚାରୀ ବୃନ୍ଦଙ୍କ ସହଯୋଗରେ ବାଲ ଧନୁଯାତ୍ରା ତିନି ଦିନ ବ୍ୟାପି ଅନୁଷ୍ଠିତ ହୋଇ ଉଦଯାପିତ ହୋଇଯାଇଛି।