06-Dec-2024

ବିନିକା(ହିମାଂଶୁ ଶେଖର ପୁଟେଲ): କଳା,ସଂସ୍କୃତି ଓ ଅଞ୍ଚଳର ଭାଷାକୁ ନେଇ ଯିଏ ବିଶ୍ଵ ଦରବାରରେ ପରିଚିତ କରାଇବାରେ ପ୍ରମୁଖ ଭୂମିକା ଗ୍ରହଣ କରିଥିଲେ ।ସେହି  ବିନିକା ମାଟିର ସୁଯୋଗ୍ୟ ସନ୍ତାନ ସ୍ବର୍ଗତ ଅଟଳ ବିହାରୀ ପଣ୍ଡାଙ୍କ ଦେହାନ୍ତ ହେବାର ଇତି ମଧ୍ୟରେ ୩ବର୍ଷ ଅତିକ୍ରାନ୍ତ ହୋଇଥିଲେ ମଧ୍ୟ ତାଙ୍କ ଜନ୍ମ ମାଟି ବିନିକାରେ ଅଦ୍ୟାବଧି ତାଙ୍କର ପ୍ରତିମୂର୍ତ୍ତି ଟିଏ ନିର୍ମାଣ ହୋଇପାରିନାହିଁ। ଯାହା ଫଳରେ କଳା,ସଂସ୍କୃତି ପ୍ରତି ଆନୁଗତ୍ୟ ଥିବା ବ୍ୟକ୍ତି ବିଶେଷ ମହଲରେ ଅସନ୍ତୋଷ ପ୍ରକାଶ ପାଇଛି।ସୂଚନା ଯୋଗ୍ୟ ଯେ ଶ୍ରୀପଣ୍ଡାଙ୍କ ପରଲୋକ ଗମନ ପରେ ସେହି ସମୟରେ ସ୍ଥାନୀୟ ପ୍ରଶାସନ ଠାରୁ ଆରମ୍ଭ କରି ଜିଲ୍ଲା ପ୍ରଶାସନ ପର୍ଯ୍ୟନ୍ତ ଥିବା ଅଧିକାରୀ ମାନେ ପ୍ରତିମୂର୍ତ୍ତି ନିର୍ମାଣ ନେଇ ନିର୍ଭର ପ୍ରତିଶୃତି ଦେଇଥିଲେ ।କିନ୍ତୁ ଅତ୍ୟନ୍ତ ଦୁଃଖ ଏବଂ ପରିତାପରର ବିଷୟ ଯେ ଦେଖୁ ଦେଖୁ ୩ବର୍ଷ ଅତିକ୍ରାନ୍ତ କରି ଗଲାଣି ।ହେଲେ ଅଦ୍ୟାବଧି ସ୍ବର୍ଗତ ପଣ୍ଡାଙ୍କ ପ୍ରତିମୂର୍ତ୍ତି ଟିଏ ଜନ୍ମ ମାଟି ବିନିକାରେ ନିର୍ମାଣ ହୋଇପାରିନାହିଁ। ମାଟିର ସୁଯୋଗ୍ୟ ସନ୍ତାନ ଅଟଳ ବିହାରି ପଣ୍ଡାଙ୍କ ପ୍ରତିମୂର୍ତ୍ତି   ନିର୍ମାଣ ପାଇଁ ପ୍ରଶାସନିକ ଅଧିକାରୀ ମାନେ ସତରେ କଣ  କୁମ୍ଭକର୍ଣ୍ଣ ନିଦ୍ରା ପରି ଶୋଇରହିଛନ୍ତି କି କଳା ପ୍ରେମୀ ମହଲରେ ପ୍ରଶ୍ନବାଚୀ ସୃଷ୍ଟି କରୁଛି।ଅନ୍ୟ ପକ୍ଷରେ ଜିଲ୍ଲାସ୍ତର ଓ ସଦର ମହକୁମାରେ କଳା ଏବଂ କଳାକାରଙ୍କୁ ସମ୍ମାନ ଦେବାର ପ୍ରଥା ଚାଲି ଆସୁଥିବା ବେଳେ ଜିଲ୍ଲାର ଅନ୍ୟ କୌଣସି ଅଂଚଳରେ କଳା ଏବଂ କଳାକାରଙ୍କୁ ସମ୍ମାନ ଦେବା ଜିଲ୍ଲା ପ୍ରଶାସନ ଶିଖି ନାହିଁ  କିମ୍ବା ମାନସିକତା ବି ନାହିଁ ବୋଲି ସାଧାରଣରେ ଆଲୋଚନା ହେଉଛି । ଆମ ଅଂଚଳର କଳା ସଂସ୍କୃତି ଓ ଭାଷାକୁ ନେଇ ବିଶ୍ୱ ଦରବାରରେ ପରିଚିତ କରେଇବାରେ ପ୍ରମୁଖ ଭୂମିକା ଗ୍ରହଣ କରିଥିବା ଓ ଏକାଧାରରେ ସମ୍ବଲପୁରୀ ଲେଖକ,କବି,ଗାଳ୍ପିକ, ଔପନ୍ୟାସିକ,ନାଟ୍ୟକାର ଏବଂ ଅଭିନେତା ଭାବେ ରାଜ୍ୟ ଚଳଚିତ୍ର ପୁରସ୍କାର ପାଇଥିବା "ଶଲା ବୁଢା" ଅଟଳ ବିହାରୀ ପଣ୍ଡା ଜଣେ କଳାକାର ନୁହନ୍ତି କି ?  ନ ହେଲେ ତାଙ୍କର ଅଵର୍ତମାନରେ ସାମାନ୍ୟ ଆବକ୍ଷ୍ୟ ପ୍ରତିମୁର୍ତି ଟିଏ ପାଇଁ ଏତେ ବର୍ଷ ଅପେକ୍ଷା କରିବାକୁ ପଡନ୍ତା ନାହିଁ । ଇତି ମଧ୍ୟରେ ରାଜ୍ୟ ଶାସନରେ ସରକାର ବଦଳିଛି ହେଲେ ପ୍ରଶାସନିକ ଅଧିକାରୀ ବଦଳି ନାହାନ୍ତି ଯିଏ ଯାହାର କାର୍ଯ୍ୟ ତୁଲାଉଛନ୍ତି ।ଆଗ ଅପେକ୍ଷା କିଛି ମାତ୍ରାରେ ପ୍ରଶାସନିକ ଅଧିକାରୀ ମାନେ କାର୍ଯ୍ୟରେ ତତ୍ପର ଥିବା ଜଣାପଡିଛି ।ଦେଖା ଯାଉ ପ୍ରତିମୂର୍ତ୍ତି ନିର୍ମାଣ ନେଇ ପ୍ରତିଶ୍ରୁତି ଦେଇଥିବା ପ୍ରଶାସନିକ ଅଧିକାରୀ ମାନେ ଏ ଦିଗରେ ଆଗକୁ କି ପଦକ୍ଷେପ ନେବେ ନା ଚୁପ ରହି ପୁଣି ବର୍ଷ ଗଡ଼ାଇବେ ତାହା ସମୟ ହିଁ କହିବ ।ସେ ଯାହା ବି ହେଉ ବିନିକା ଅଂଚଳର ଗର୍ବ ଗୌରବ ସ୍ବର୍ଗତ ଅଟଳ ପଣ୍ଡାଙ୍କର ପ୍ରତିମୁର୍ତି କେବେ ନିର୍ମାଣ ହେବ ସେହି ଦିନକୁ କଳା ପ୍ରେମୀ ଅପେକ୍ଷା କରିଛନ୍ତି ।