27-Nov-2024

ବଲାଙ୍ଗୀର (ପ୍ରେରଣା ଖବର):  ସ୍ଥାନୀୟ ଗୋଣ୍ଡୱାନା ଭବନ ଠାରେ ସମ୍ବିଧାନ ଦିବସ ପାଳିତ ହୋଇ ଯାଇଛି, ଭାରତର ସମ୍ବିଧାନ ହେଉଛି ପୃଥିବୀର ସର୍ବ ବୃହତ୍ ଓ ସଜୀବ | ଏହାର ଉପଯୋଗିତା ହିଁ ଦେଶକୁ ସମୃଦ୍ଧ ଓ ସଶକ୍ତ କରିବ | ଏହାର ପରିଚାଳନା ଉପରେ ଲୋକଙ୍କ ଚିନ୍ତାଧାରା ନିର୍ଭର କରିଥାଏ, ଆମେ ଯେମିତି ପ୍ରୟୋଗ କରିବା, ସେମିତି ଫଳ ମିଳିବ | ନ୍ୟାୟ, ସମତା , ସ୍ଵାଧୀନତା ଓ ଭାତୃତ୍ବ ହେଉଛି ସମ୍ବିଧାନର ମୂଳ | ପ୍ରସ୍ତାବନାରେ ଉଲ୍ଲିଖିତ ବିଷୟ ହିଁ ସମ୍ବିଧାନର ଆତ୍ମା | ଏଭଳି ବିଭିନ୍ନ ମତ ଉପସ୍ଥିତ ବ୍ୟକ୍ତିଗଣ ପ୍ରଦାନ କରିଥିଲେ | ଡ଼. କୌତୁକ ପନ୍ଦର ମୁଖ୍ୟବକ୍ତା ଭାବେ ଯୋଗ ଦେଇ ସମ୍ବିଧାନ ପାଳନର ଉଦ୍ଦେଶ୍ୟ ଓ ଏହାର ପ୍ରଚାର ପ୍ରସାର ପାଇଁ ସମସ୍ତ ଜନତା ଆଗେଇ ଆସିବା ଉଚିତ ବୋଲି କହିଥିଲେ, ମୌଳିକ ଅଧିକାରକୁ ଯୋର୍ ଦେବା ସହିତ ମୌଳିକ କର୍ତ୍ତବ୍ୟକୁ ପାଳନ କଲେ ସମ୍ବିଧାନ ପ୍ରଣେତାମାନଙ୍କ ପ୍ରତି ଉଚିତ୍ ଶ୍ରଦ୍ଧାଞ୍ଜଳି ହେବ ବୋଲି ପ୍ରକାଶ କରିଥିଲେ, ଦେଶର ବିଭିନ୍ନ ଅଂଶରୁ ଆସିଥିବା ବିଶିଷ୍ଟ ବୁଦ୍ଧିଜୀବୀ ତଥା ବଲାଙ୍ଗିରରୁ ପ୍ରତିନିଧିତ୍ଵ କରିଥିବା ଯୁଧିଷ୍ଠିର ମିଶ୍ରଙ୍କୁ ମନେ ପକାଇଥିଲେ | ଅଜିତ୍ କୁମାର ଭୋଇଙ୍କ ସଭାପତିତ୍ବରେ ଅନୁଷ୍ଠତ ଏହି ସଭାରେ ସମ୍ବିଧାନ ଓ ବାବା ସାହେବ୍ ଭୀମ ରାଓ ଆମ୍ବେକରଙ୍କ ଫୋଟୋରେ ପୁଷ୍ପମାଲ୍ୟ ଦେଇ ସଭା କାର୍ଯ୍ୟ ଆରମ୍ଭ ହୋଇଥିଲା, ପ୍ରଥମେ ସମ୍ବିଧାନର ପ୍ରସ୍ତାବନାକୁ ଉପସ୍ଥିତ ସମସ୍ତ ବ୍ୟକ୍ତି ଶପଥ ପାଠ କରିଥିଲେ | ସଭାକୁ ନୀଳକଣ୍ଠ ସୁନା ପରିଚାଳନା କରିଥିବା ବେଳେ ହୋଲିଶ୍ୱର ଧରୁଆ ଧନ୍ୟବାଦ୍ ଅର୍ପଣ କରିଥିଲେ | ଅକ୍ଷୟ କୁମାର ସେଠ୍, ସଦାନନ୍ଦ ମଲ୍ଲିକ, ହୃଷୀକେଶ ଦାସ, କମଳ ଲୋଚନ ବିଶ୍ଵାଳ, ରବୀନ୍ଦ୍ର ସୁନା, ସହଦେବ ଧରୁଆ, ଛବିନ୍ଦ୍ର ବେହେରା, ସୁରେନ୍ଦ୍ର ସେଠ୍, ଦହିତ ଧରୁଆ, ବିଶ୍ଵାମିତ୍ର ନାଗ, ମହେନ୍ଦ୍ର ବାଗ ବୃନ୍ଦାବନ ନାଗ ପ୍ରମୁଖ ଯୋଗ ଦେଇଥିଲେ |