24-Nov-2024

ବରଗଡ:(ନିରଞ୍ଜନ ତ୍ରିପାଠୀ)-ବରଗଡ଼ ଜିଲ୍ଲା ଆମ୍ବାଭୋନା ବ୍ଲକ ଅନ୍ତର୍ଗତ ବୁଗବୁଗି ଗ୍ରାମରେ ରବିବାର  ଜିଲ୍ଲା ସଙ୍କୀର୍ତ୍ତନ୍ୟ ପରିଷଦ ଆନୁକୁଲ୍ୟରେ ସଙ୍କୀର୍ତ୍ତନ୍ୟ ସଂସ୍କୃତି  ଜାଗରଣ କାର୍ଯ୍ୟକ୍ରମ ଅନୁଷ୍ଠିତ ହେବା ସହ ସଂପ୍ରତି  କୀର୍ତ୍ତନ ନାମ ରେ ଅଶାଳୀନ ନୃତ୍ୟ ଓ ଦୁଇ ଅର୍ଥ ବୋଧକ  ଗୀତ ପରିବେଷଣକୁ ବିରୋଧ କରି ଜନ ସଚେତନତା କାର୍ଯ୍ୟକ୍ରମ ଅନୁଷ୍ଠିତ ହୋଇଯାଇଛି ।ଜିଲ୍ଲା ସଙ୍କୀର୍ତ୍ତନ୍ୟ ପରିଷଦର କାର୍ଯ୍ୟକାରୀ ସଭାପତି ପ୍ରମୋଦ ଦାଶଙ୍କ ପ୍ରତ୍ୟକ୍ଷ ତତ୍ବାବଧାନରେ ଅନୁଷ୍ଠିତ ଏହି କାର୍ଯ୍ୟକ୍ରମ ପ୍ରାରମ୍ଭରେ ରାଧା ମାଧବ ଙ୍କ ପୂଜା ଅର୍ଚ୍ଚନା ପରେ ଅମ୍ବାଭୋନା ବ୍ଲକ ସଂଯୋଜକ ଶିବ ନାରାୟଣ ଭୋଇ ଉଦ୍ଦେଶ୍ୟ ଜ୍ଞାପନ କରି ସ୍ଵାଗତ ଅଭିଭାଷଣ ପ୍ରଦାନ କରିଥିଲେ ସମ୍ମାନିତ ଅତିଥି ଭାବେ ପଶ୍ଚିମ ଓଡ଼ିଶା କଳାକାର ମହାସଂଘ ର ସଂପାଦକ ପଣ୍ଡିତ ଗୋପବନ୍ଧୁ ପୁରୋହିତ, ସାମ୍ବାଦିକ ବିଶ୍ୱଜିତ ଦାଶ ,ସଙ୍କୀର୍ତ୍ତନ୍ୟ ଗାୟକ ପରମେଶ୍ବର ଭୋଇ , ମୌଜି ଲାଲ ସାହୁ ,ମନୋହର ପ୍ରଧାନ ରାମ ଚନ୍ଦ୍ର ସାହୁ ,ଭରତ ପ୍ରଧାନ ପ୍ରମୁଖ  ଯୋଗ ଦେଇ ବ୍ୟାପକ ଜନ ସଚେତନତା ରେ ହିଁ ଅଶ୍ଲୀଳ ସଙ୍କୀର୍ତ୍ତନ୍ୟ ପରିବେଷଣ ବନ୍ଦ ହୋଇ ପାରିବ ବୋଲି ମତ ବ୍ୟକ୍ତ କରିଥିଲେ ।ଏଥି ସହିତ  ସଂପ୍ରତି ବିଭିନ୍ନ ନାମ ଯଜ୍ଞ ମଣ୍ଡଳୀରେ ସଙ୍କୀର୍ତ୍ତନ୍ୟ ଦଳ ମାନଙ୍କ ଦ୍ଵାରା ପ୍ରଦର୍ଶିତ ବିଶୃଙ୍ଖଳିତ ନୃତ୍ୟ ଓ ବିକୃତ ସଙ୍ଗୀତ ସମାଜ ଉପରେ ଏହା କୁ ପ୍ରଭାବ ପକାଉଛି ବୋଲି ଉଲ୍ଲେଖ କରି ଆଗାମୀ ଦିନ ରେ ଏଭଳି ସଙ୍କୀର୍ତ୍ତନ ପରିବେଷଣ କୁ ବିରୋଧ କରିବା ପାଇଁ ନିଷ୍ପତି ଗୃହୀତ ହୋଇ ଥିଲା । ଜିଲ୍ଲା ର ବିଭିନ୍ନ ବ୍ଲକ ରେ ଏଭଳି ସଚେତନ ଧର୍ମୀ କାର୍ଯ୍ୟକ୍ରମ ମାନ ଆୟୋଜନ କରାଯାଉଥିବା ବେଳେ ଅମ୍ବାଭୋନା ବ୍ଲକ ସ୍ତରୀୟ ଏହି କାର୍ଯ୍ୟକ୍ରମରେ ବିଭିନ୍ନ ଗ୍ରାମର  ଶତାଧିକ ସଙ୍କୀର୍ତ୍ତନ୍ୟ କଳାକାର ଏକତ୍ରିତ ହୋଇ  ଅଶ୍ଲୀଳ କୀର୍ତ୍ତନ୍ୟ କୁ ବିରୋଧ କରିବା ସହ ଭାବ ଭକ୍ତିର ସଙ୍କୀର୍ତ୍ତନ୍ୟ ରେ ଏଭଳି ଅପସଂସ୍କୃତି କୁ ପ୍ରଶ୍ରୟ ନଦେବା ପାଇଁ ମିଳିତ ସଂକଳ୍ପ ନେଇଥିଲେ । ଆଗାମୀ ଦିନରେ  ଅଶ୍ଲୀଳ ସଙ୍କୀର୍ତ୍ତନ୍ୟ ଓ ଦୁଇ ଅର୍ଥ ବୋଧକ ସଙ୍ଗୀତ ପରିବେଷଣକୁ ବିରୋଧ କରାଯାଇ ଜିଲ୍ଲା ସ୍ତରରେ ଏକ ବିଶାଳ ଜନ ସଚେତନତା ଶୋଭାଯାତ୍ରାର ଆୟୋଜନ କରାଯିବ ବୋଲି କାର୍ଯ୍ୟକାରୀ ସଭାପତି ପ୍ରମୋଦ ଦାଶ ସୂଚନା ପ୍ରଦାନ କରିଥିଲେ ।କାର୍ଯ୍ୟକ୍ରମ ପରିଚାଳନାରେ ଧନେଶ୍ଵର ଦୁଆନ, ଯାଦବ ପ୍ରଧାନ,ଭଗବାନ ବାଗ,ଛବିଳ ବାରିକ, ବୁଦ୍ଧଦେବ ମଲ୍ଲିକ,ଟିକାରାମ ବାଗ, କେଶବ ସେଟ, ତେଜରାମ ଭୋଇ ,ମାଧବ ଭୋଇ,ହୃଷୀକେଶ ପ୍ରଧାନ, ନିରଞ୍ଜନ ଷଣ୍ଢ,  ଗୋବର୍ଦ୍ଧନ ଭୁଏ ପ୍ରମୁଖ ସକ୍ରିୟ ଅଂଶ ଗ୍ରହଣ କରିଥିଲେ ।