13-Sep-2024

ଗୁଡଭେଲା(ପଞ୍ଚାନନ ନାଏକ) ବଲାଙ୍ଗୀର ଜିଲ୍ଲା ଗୁଡଭେଲା ବ୍ଲକର ୮ଟି ଗ୍ରାମପଞ୍ଚାୟତର ବିଭିନ୍ନ ଗ୍ରାମରେ ପ୍ରାୟ ୮ରୁ ୧୦ ଘଣ୍ଟା  ବିଦ୍ୟୁତଯୋଗାଣ ବନ୍ଦ ରହୁଥିବା ବେଳେ ବିଦ୍ୟୁତ ବିଳ ଆଦାୟ ଉପରେ ଗୁରୁତ୍ବ ହେଉଥିବା ଗୁଡଭେଲା ବ୍ଲକ ପୂର୍ବତନ ଅଧ୍ୟକ୍ଷ ଅଶୋକ ଚନ୍ଦ୍ର ଦୋରା ଗଣମାଧ୍ୟମ ଆଗରେ ଅଭିଯୋଗ କରିଛନ୍ତି। ଗମ୍ଭାରୀଗୁଡା, ଜାମୁଟ, ଘୂନା, ବିରାମୁଣ୍ଡା, ଗୁଡଭେଲା, ଦେଉଳଗୁଡି, ତେନ୍ତୁଳୀଖୁଣ୍ଟି,  ମାଢେକେଲା ଆଦି ଗ୍ରାମପଞ୍ଚାୟତ ରେ ସାମାନ୍ଯ ପବନ ହେଲେ ବିଦ୍ୟୁତ ସରବରାହ ଦିନ ଦିନ ଧରି ବନ୍ଦ ରହୁଥିବା ବେଳେ ଉପଭୋକ୍ତାଙ୍କୁ ସ୍ମାର୍ଟ ମିଟର ଲଗାଇବାକୁ କହୁଛନ୍ତି।  ଉକ୍ତ ମିଟରରେ ବିଦ୍ୟୁତ ବିଲ ଅଧିକ ଆସୁଥିବାରୁ ଲୋକଙ୍କ ମଧ୍ଯରେ ଭୟର ବାତାବରଣ ସୃଷ୍ଟି ହେବାରେ ଲାଗିଛି। ଅନ୍ୟ ପଟରେ ଉକ୍ତ ୮ଗୋଟି ଗ୍ରାମ ପଞ୍ଚାୟତର ଜନସାଧାରଣ ଏହି ଆଧୁନିକ ଯୁଗରେ ମଧ୍ଯ ଘଣ୍ଟା ଘଣ୍ଟା ଧରି ଅନ୍ଧାରରେ ରହିବାକୁ ପଡୁଛି। ଛାତ୍ରଛାତ୍ରୀମାନଙ୍କ ପାଠ ପଢାରେ ବ୍ୟାଘାତ ହେଉଥିବା ବେଳେ ମଶାର ପ୍ରଦୁର୍ଭାବ ବୃଦ୍ଧି ପାଇବା ସହ ଚୋରୀ ଭୟ ଲାଗିରହିଛି।  ଏନେଇ ବିଭିନ୍ନ ସମୟରେ ଅଞ୍ଚଳବାସୀ ରାସ୍ତା ଅବରୋଧ କରିବା ସହ ବିଭିନ୍ନ ଉଚ୍ଚ ଅଧିକାରୀଙ୍କୁ ଜଣାଇଥିଲେ ମଧ୍ଯ କିଛି ସୁଫଳ ମିଳୁ ନ ଥିବାରୁ ଅଞ୍ଚଳବାସୀଙ୍କ ମଧ୍ଯରେ ଅସନ୍ତୋଷ ବୃଦ୍ଧି ପାଇବାରେ ଲାଗିଛି। ଏ ସମ୍ପର୍କରେ ବିଦ୍ୟୁତ ବିଭାଗର ଏସଡିଓ ସଞ୍ଜୀବ ପାଢ଼ୀଙ୍କୁ ପଚାରିବାରୁ କହନ୍ତି ଯେ, ବିଦ୍ୟୁତ ଯୋଗାଣ ଠିକ ଠାକ ଚାଳିଛି ବୋଲି ସଫେଇ ଦେଇଥିଲେ । ଏଥି ପ୍ରତି ବିଭାଗୀୟ ଉଚ୍ଚ କର୍ତ୍ତୃପକ୍ଷ ଦୃଷ୍ଟି ଦେଇ ବିହିତ ପଦକ୍ଷେପ ନ ନିଅନ୍ତି ତେବେ ବଡ ଧରଣର ଆନ୍ଦୋଳନ ହେବାର ସମ୍ଭାବନାକୁ ଏଡାଇ ଦିଆଯାଇ ପାରିବ ନାହିଁ ।