06-Aug-2024

ବରଗଡ଼(ନିରଞ୍ଜନ ତ୍ରିପାଠୀ) ବରଗଡ଼ ଜିଲ୍ଲାର ପ୍ରମୁଖ ସମସ୍ୟା ଉପରେ ଅଭିଯୋଗ କରିବା ପାଇଁ ଆମ୍ ଆଦମୀ ପାର୍ଟି ଜିଲ୍ଲାପାଳଙ୍କ ପାଖକୁ ଯାଇଥିବା ବେଳେ ଭେଟ ହେବାକୁ ମନା କରିଦେଇ ଥିଲେ। ତାପରେ ଆପ୍ କାର୍ଯ୍ୟକର୍ତ୍ତା ମାନେ ପ୍ରତିବାଦ କରିବାରୁ ଅତିରିକ୍ତ ଜିଲ୍ଲାପାଳ ଆସି ଅଭିଯୋଗ ପତ୍ର ନେବା ସହ ଆଲୋଚନା କରିଥିଲେ। ବରଗଡ଼ ସହରର ଏକ ପ୍ରମୁଖ ସମସ୍ୟା ତଥା ସାଧାରଣ ଜନତା ଙ୍କ ଦାବୀ କୁହାଯାଉଥିବା ଲେଙ୍ଗୁ ମିଶ୍ର ଛକରୁ ଜୀରା ବ୍ରିଜ ରାସ୍ତା ପ୍ରଶସ୍ତିକରଣ ଓ ଜବର ଦଖଲ ଉଛେଦକୁ ବର୍ଷେ ପୁରି ଥିଲେ ସୁଦ୍ଧା ଏହି ଅଭିଯାନ ଏବେ ସମ୍ପୂର୍ଣ ଠପ ହୋଇ ଯାଇଛି ଯାହାକୁ ନେଇ ସାଧାରଣ ରେ ଅସନ୍ତୋଷ ଦେଖା ଦେଇଛି ବୋଲି ଆମ୍ ଆଦମୀ ପାର୍ଟି ପକ୍ଷରୁ ଅଭିଯୋଗ ହୋଇଛି। ସେହିପରି ଚାଷୀ ବହୁଳ ଜିଲ୍ଳାରେ ନକଲି ସାର ଓ ବିହନ ଅବାଧରେ ବିକ୍ରି ଚାଲୁଥିବା ବେଳେ କୌଣସି ପ୍ରକାର କାର୍ଯ୍ୟାନୁଷ୍ଠାନ ହେଉ ନଥିବା ଓ ଜିଲ୍ଲାର ବହୁ ସଂଖ୍ୟାରେ ବୁଢ଼ା ବୁଢ଼ୀ ଙ୍କ ବୟସଗତ ଯୋଗ୍ୟତା ହେବା ସତ୍ୱେ ଭତ୍ତା ପାଇବାରୁ ବଂଚିତ ହେଉଛନ୍ତି ବୋଲି ଆପ୍ ଜିଲ୍ଲା ଆବାହକ ଭବାନୀ ସାହୁ ଜିଲ୍ଲାପାଳଙ୍କ ଅଫିସ ରେ ଅଭିଯୋଗ କରିଛନ୍ତି । ବରଗଡ଼ ର ଏହି ଜବର ଦଖଲ ଉଛେଦ କୁ ତ୍ୱରାନ୍ୱିତ କରିବା, ଜିଲ୍ଲାରେ ନକଲି ସାର ଓ ବିହନ ବିକ୍ରି କୁ ବନ୍ଦ କରିବା ଓ ପେଣ୍ଡିଙ୍ଗ ଥିବା ବାର୍ଦ୍ଧକ୍ୟ ଭତ୍ତା ଆବେଦନକାରୀ ଙ୍କୁ ଶୀଘ୍ର ଭତ୍ତା ପ୍ରଦାନ କରିବା ପାଇଁ ଆମ୍ ଆଦମୀ ପାର୍ଟି ଦାବୀ କରିଛି ଏହା ପୂରଣ ନହେଲେ ଆଗାମୀ ଦିନରେ ବରଗଡରେ ଜନ ଆନ୍ଦୋଳନ ସୂତ୍ରପାତ ହେବ ଏବଂ ସେଥିପାଇଁ ପ୍ରଶାସନ ଓ ସରକାର ଦାୟୀ ରହିବେ ବୋଲି  ସାହୁ ଚେତାବନୀ ଦେଇଛନ୍ତି। ଏଥିରେ ଜିଲ୍ଲା ସମ୍ପାଦକ ସ୍ୱରୂପ ଭୋଇ, ଯୁବ ସଂଗଠନ ଜିଲ୍ଲା ସଭାପତି ଅବିନାଶ ବାଗ, ଅସିତ ସାହୁ, ମିଲୁ ନାଗ, ଦିଲ୍ଲୀପ ବାର୍ଲା, ଅଙ୍କେଶ ସାହୁ ଓ ଅନ୍ୟମାନେ ଉପସ୍ଥିତ ଥିଲେ। ଅତିରିକ୍ତ ଜିଲ୍ଲାପାଳ ଦାବୀ ପତ୍ର ଗ୍ରହଣ କରିବା ସହ ସମାଧାନ ପାଇଁ ନିର୍ଭର ପ୍ରତିଶୃତି ଦେଇଥିବା  ସାହୁ କହିଛନ୍ତି।