02-Aug-2024

କଣ୍ଟାମାଳ《ଜୟକୁମାରମହାରଣା》: କଣ୍ଟାମାଳ ବ୍ଲକ ଖୁଣ୍ଟିଗୋରା ସରପଞ୍ଚଙ୍କ ୩ଟି ସନ୍ତାନ ଥିବାରୁ ପ୍ରତିପକ୍ଷ କରିଥିବା ଅଭିଯୋଗର ଶୁଣାଣି କରି ମାନ୍ୟବର କୋର୍ଟ ସରପଞ୍ଚଙ୍କୁ ପଦଚ୍ୟୁତ କରିଛନ୍ତି । ସୂଚନା ଅନୁସାରେ ଗତ ୨୦୨୨ରେ ଅନୁଷ୍ଠିତ ତ୍ରିସ୍ତରୀୟ ପଞ୍ଚାୟତ ନିର୍ବାଚନରେ କଣ୍ଟାମାଳ ବ୍ଲକ ଖୁଣ୍ଟିଗୋରା ପଞ୍ଚାୟତର ସରପଞ୍ଚ ରୂପେ  ଶ୍ରୀମତୀ ସୁନୀତା ମାଝୀ ବିଜୟ ଲାଭ କରିଥିଲେ । ଶ୍ରୀମତୀ ମାଝୀଙ୍କୁ ସରପଞ୍ଚ ଭାବରେ ପ୍ରଶାସନ ବିଜୟ ଘୋଷଣା କଲା ପରେ ପ୍ରତିଦ୍ବନ୍ଦୀ ପ୍ରାର୍ଥୀନୀ ଶ୍ରୀମତୀ ପ୍ରଭାସିନୀ ଖଟୁଆ କଣ୍ଟାମାଳ କୋର୍ଟର ଦ୍ବାରସ୍ଥ ହୋଇ ଏକ ମାମଲା ଦାୟର କରିଥିଲେ । ଇଲେକ୍ସନ କେସ ନଂ ୧/୨୦୨୨ରେ ଶ୍ରୀମତୀ ଖଟୁଆ ସମସ୍ତ ପ୍ରମାଣପତ୍ର ସହ ଅଭିଯୋଗ କରିଥିଲେ ଯେ ଖୁଣ୍ଟିଗୋରା  ସରପଞ୍ଚ ଶ୍ରୀମତୀ ମାଝୀଙ୍କର ୩ ଗୋଟି ସନ୍ତାନ ଅଛନ୍ତି । ଯାହାକି ଆଇନ ଅନୁସାରେ ଅସିଦ୍ଧ । ମାନ୍ୟବର ସିଭିଲଜର୍ଜ କମ୍ ଇଲେକ୍ସନ ଟ୍ରିବୁନାଲ କୋର୍ଟ ସାକ୍ଷୀମାନଙ୍କ ବୟାନ ଏବଂ ଗୁରୁତ୍ଵପୂର୍ଣ୍ଣ ଦସ୍ତାବିଜକୁ ଅଧାର କରି ଶ୍ରୀମତୀ ସୁନୀତା ମାଝୀଙ୍କୁ ଅଯୋଗ୍ୟ ଘୋଷଣା କରିଥିଲେ । ପ୍ରତିଦ୍ବନ୍ଦୀ ପ୍ରାର୍ଥୀନୀ ଶ୍ରୀମତୀ ଖଟୁଆଙ୍କୁ ଖୁଣ୍ଟିଗୋରା ପଞ୍ଚାୟତ ସରପଞ୍ଚ ଭାବେ ଘୋଷଣା କରିଥିଲେ । କୋର୍ଟଙ୍କ ରାୟ ଉପରେ ସୁନୀତା ମାଝୀ ମାନ୍ୟବର ହାଇକୋର୍ଟରେ ରିଟ ପିଟିସନ ଦାୟର କରିଥିଲେ । ଏହାର ଶୁଣାଣି କରି ମାନ୍ୟବର ହାଇକୋର୍ଟ ମାମଲାକୁ ଖାରଜ କରି ଖୁଣ୍ଟିଗୋରା ସରପଞ୍ଚ ପଦବୀକୁ ଅସିଦ୍ଧ ଘୋଷଣା କରିଥିଲେ ! ହାଇକୋର୍ଟଙ୍କ ଏହି ଆଦେଶକୁ ଭିତ୍ତିକରି ଆଜି ବୌଦ୍ଧ ଜିଲ୍ଲାପାଳ ଜେ ସୋନାଲ ଆଗାମୀ ସରପଞ୍ଚ ନିର୍ବାଚନ ହେବା ପର୍ଯ୍ୟନ୍ତ ଖୁଣ୍ଟିଗୋରା ପଞ୍ଚାୟତର ନାଏବ ସରପଞ୍ଚ ରବିଚନ୍ଦ୍ର ମହାକୁଡଙ୍କୁ ସରପଞ୍ଚ ଦାୟିତ୍ଵ ତୁଲାଇବାକୁ ନିର୍ଦ୍ଦେଶ ଦେଇଛନ୍ତି । ଅଭିିଯୋଗକାରୀ ଶ୍ରୀମତୀ ଖଟୁଆଙ୍କ ସମେତ ଖୁଣ୍ଟିଗୋରା ପଞ୍ଚାୟତବାସୀ ଏହି ରାୟକୁ ସମ୍ମାନ ଜଣାଇ ଧର୍ମର ଜୟ ହେଲା ବୋଲି  କହିଛନ୍ତି ।