28-Jul-2024

ନକଟିଦେଉଳ(କନ୍ଦର୍ପ ବେହେରା ): ରେଢ଼ାଖୋଲ ଥାନା ଘୋଷରାମାଲ ପଂଚାୟତ ର ପାଣ୍ଡୁରିଶିଲା ଗ୍ରାମରେ ଶୋଇ ଥିବା ଅବସ୍ଥାରେ ସ୍ୱାମୀ ଓ ସ୍ତ୍ରୀ ଙ୍କୁ ନୃଶଂସ ଭାବରେ କେହି ହତ୍ୟା କରି ଥିବା ଖବର ହସ୍ତଗତ ହୋଇଛି । ପୋଲିସ ଘଟଣା ସ୍ଥଳରେ ପହଂଚି ଛାନଭିନ କରୁଛି ।
ପ୍ରକାଶ ଯେ, ସମ୍ବଲପୁର ଜିଲ୍ଲା ରେଢ଼ାଖୋଲ ଥାନା ପାଣ୍ଡୁରିଶିଲା ଗ୍ରାମର ଆବ୍ରାହମ କୁଜୁର ( ୩୫) ଓ ତାଙ୍କ ସ୍ତ୍ରୀ କୁଆଁରୀ କୁଜୁର (୨୫) ରାତିରେ ଖିଆପିଆ ସାରି ଶୋଇ ଥିଲେ । ପରିବାର ର ଅନ୍ୟ ସଦସ୍ୟ ମାନେ ମଧ୍ୟ ଶୋଇ ପଡ଼ିଥିଲେ ।
 

ମୃତକ ଆବ୍ରାହମ ଘରର ବାହାର ବାରଣ୍ଡାରେ ଶୋଇ ଥିବା ବେଳେ ଝିଅ ଓ ପତ୍ନୀ ଭିତର ବାରଣ୍ଡାରେ ଶୋଇ ଥିଲେ ।କିନ୍ତୁ ବଡ ଭାଇ ଓ ଭାଉଜ, ଓ ବୁଢ଼ୀ ମା ଘରର ଅନ୍ୟ କୋଠରୀରେ ଶୋଇ ଥିଲେ । ତଦନ୍ତରୁ ଯାହା ଜଣାପଡୁଛି ହତ୍ୟା କାରି ପ୍ରଥମେ ଆବ୍ରାହାମ ଙ୍କୁ କୌଣସି ମାରଣାସ୍ତ୍ର ରେ ମୁଣ୍ଡ ଓ ବେକରେ ଆକ୍ରମଣ କରି ହତ୍ୟା କରିବା ପରେ ପତ୍ନୀ ଜାଣିପାରିବାରୁ ଜୀବନକୁ ବଞ୍ଚାଇବା ପାଇଁ

ପଳାଉଥିବା ବେଳେ ହତ୍ୟା କାରି ଘର ଭିତରେ ଗୋଡ଼ାଇ ଗୋଡ଼ାଇ ହତ୍ୟା କରିଥିବା ଅନୁମାନ କରାଯାଉଛି ।ମୃତକ କୁଆଁରୀ ର ମୁଣ୍ଡ ଓ ବେକରେ ଗଭୀର ଆଘାତ ଲାଗିଛି । ଘଟଣା ସ୍ଥଳରେ ପୋଲିସ ପହଂଚି ତଦନ୍ତ କରୁଛି । 
ସମ୍ବଲପୁର ରୁ ସାଇଣ୍ଟିଫିକ ଟିମ ଆସି ତଦନ୍ତ କଲା ପରେ ଶବ ବ୍ୟବଚ୍ଛେଦ କରା ଯିବ ବୋଲି ଜଣା ପଡିଛି ।