25-Jun-2024

(ମନୋରଞ୍ଜନ ତ୍ରିପାଠୀ )
ବାତଜ୍ବର ନିରାକରଣ ପାଇଁ ଆଗାମୀ ଅଗଷ୍ଟ ୧୦ ତାରିଖରୁ ସାମୁହିକ ଔଷଧ ସେବନ  କାର୍ଯ୍ୟକ୍ରମ ଅନୁଷ୍ଠିତ ହେବ । ଉଲୁଣ୍ଡା ଗୋଷ୍ଠୀ ସ୍ୱାସ୍ଥ୍ୟକେନ୍ଦ୍ର ତରଫରୁ ଏଥିପାଇଁ ବ୍ୟାପକ ପ୍ରସ୍ତୁତି ଆରମ୍ଭ ହୋଇଯାଇଛି । ଏହି ପରିପ୍ରେକ୍ଷୀରେ ଆଜି ଉଲୁଣ୍ଡା ଗୋଷ୍ଠୀ ସ୍ୱାସ୍ଥ୍ୟକେନ୍ଦ୍ର ସଭାଗୃହ ଠାରେ ଔଷଧ ପ୍ରଦାନକାରୀ ମାନଙ୍କର ଏକ ପ୍ରଶିକ୍ଷଣ ଶିବିର ଅନୁଷ୍ଠିତ ହୋଇଯାଇଛି । ଗୋଷ୍ଠୀ ସ୍ୱାସ୍ଥ୍ୟକେନ୍ଦ୍ରର ଅଧୀକ୍ଷକ ଡାକ୍ତର ସମୀର ଭୋଇଙ୍କ ଅଧ୍ୟକ୍ଷତାରେ ଅନୁଷ୍ଠିତ ଏହି ପ୍ରଶିକ୍ଷଣ ଶିବିରରେ   ଚଢ଼େଇପଙ୍କ, ଉଲୁଣ୍ଡା ଏବଂ କ୍ଷେମାଲୋଏ ସ୍ୱାସ୍ଥ୍ୟ ଉପକେନ୍ଦ୍ର ଅଧିନସ୍ଥ ଆଶାକର୍ମୀ, ଅଙ୍ଗନବାଡ଼ି କର୍ମୀ, ମହିଳା ସ୍ୱାସ୍ଥ୍ୟକର୍ମୀ ଏବଂ ସ୍ବେଚ୍ଛାସେବୀମାନେ ପ୍ରଶିକ୍ଷାର୍ଥୀ ଭାବେ ଯୋଗ ଦେଇଥିଲେ । ପ୍ରଶିକ୍ଷକ ଭାବେ ମ୍ୟାଲେରିଆ ପରିଦର୍ଶକ ବିଦ୍ୟୁତ ପ୍ରକାଶ ଖମାରୀ , ସ୍ୱାସ୍ଥ୍ୟକର୍ମୀ ବଟକୃଷ୍ଣ ପଣ୍ଡା ଏବଂ ରାଜେଶ କୁମାର ମେଣ୍ଡେଲି ଦାୟିତ୍ବ ନିର୍ବାହ କରିଥିଲେ । ଅନ୍ୟମାନଙ୍କ ମଧ୍ୟରେ ଜନସ୍ବାସ୍ଥ୍ୟ ସଂପ୍ରସାରଣ ଅଧିକାରୀ ପ୍ରଦ୍ୟୁମ୍ନ କୁମାର ସାହୁ ଏବଂ ବ୍ଲକ କାର୍ଯ୍ୟକ୍ରମ ପରିଚାଳକ  ସୁଧାଂଶୁ ଶେଖର ସେଠୀ ସଂଚ଼ାସୀନ ଥିଲେ।