08-May-2024

ବଲାଙ୍ଗିର (ଚିତ୍ରସେନ ବେହେରା ): ଡାକ୍ତର ମାନଙ୍କୁ ମଣିଷ ରୂପୀ ଭଗବାନ ତଥା ଦ୍ୱିତୀୟ ଭଗବାନ ବୋଲି କୁହା ଯାଇଥାଏ। ଜଣେ ଦ୍ୱିତୀୟ ଭଗବାନ ହେବାର ସମସ୍ତ ଯୋଗ୍ୟତା ରହିଛି ଜଣାଶୁଣା ଡାକ୍ତର ସ୍ୱସ୍ତିରେଖା ନାୟକଙ୍କ ନିକଟରେ। ସେ କେବଳ ଡାକ୍ତର ନୁହନ୍ତି ଜଣେ ସମାଜସେବୀ ମଧ୍ୟ। ମାନବ ଜାତିର ସେବା କରିବା ପାଇଁ ତାଙ୍କର ତ୍ୟାଗ ଓ ନିଷ୍ଠାପର ମାନସିକତାକୁ ଯେତେ ପ୍ରଶଂସା କଲେ ବି କମ ହେଇଯିବ। ପ୍ରତ୍ୟକ୍ଷ ହେଉ ବା ପରୋକ୍ଷରେ ଜାରି ରହିଛି ତାଙ୍କର ସମାଜସେବା। ସର୍ବଦା ଦୁଃଖୀ ଦରିଦ୍ରଙ୍କର ସେବା ପାଇଁ ଆଗେଇ ଆସି ଜଣେ ଦରଦୀ ମଣିଷ ଭାବରେ ସେ ବେଶ ପରିଚିତ। ବଲାଙ୍ଗିର ଜିଲ୍ଲା ଆଗଲପୁର ବ୍ଲକର ଏକ ଉଚ୍ଚ ବିଦ୍ୟାଳୟରେ ଡିସେମ୍ବର ୨୦୨୨ ରେ ବାର୍ଷିକ କ୍ରୀଡା ଚାଲିଥିବା ବେଳେ ଜଣେ ନବମ ଶ୍ରେଣୀର ଛାତ୍ର ସଦାନନ୍ଦ ମେହେରଙ୍କ ବେକରେ ଜାଭଲୀନ ଗଳି ଯାଇଥିଲା। ସେହି ସମୟରେ ଭୀମ ଭୋଇ ମେଡିକାଲ କଲେଜ ହସ୍ପିଟାଲରେ କାର୍ଯ୍ୟରତ ଡାକ୍ତର ନାୟକ ପ୍ରଥମେ ପ୍ରାଥମିକ ଚିକିତ୍ସା କରିଥିଲେ ସେହି ଗୁରୁତର ଭାବରେ ଉଦ୍ଧାର ହେଇଥିବା ଛାତ୍ରଙ୍କୁ। ପରେ ଅପରେସନ ସମୟରେ ମଧ୍ୟ ଡାକ୍ତରୀ ଦଳରେ ସାମିଲ ରହି ସହାୟତା କରିଥିଲେ। ଡାକ୍ତରୀ ପାଠପଢା ସମୟରୁ ହିଁ ସେ ଅନେକ ଦୁର୍ଘଟଣାଗ୍ରସ୍ତଙ୍କୁ ରାସ୍ତାକଡରୁ ଉଦ୍ଧାର କରି ହସ୍ପିଟାଲରେ ଭର୍ତ୍ତି କରାଇ ମାନବିକତାର ଉଦାହରଣ ସାଜିଛନ୍ତି। ବଲାଙ୍ଗିରରେ କାର୍ଯ୍ୟରତ ଥିବା ସମୟରେ ନଭେମ୍ବର ୨୦୨୩ ରେ ଛତାମଖନା ନିକଟ ରାସ୍ତାକଡରେ ଦୁର୍ଘଟଣାଗ୍ରସ୍ତ ହୋଇ ହାତ ଭାଙ୍ଗି ପଡି ରହିଥିବା ସଦର ବ୍ଲକ ଅନ୍ତର୍ଗତ ମନହୀରା ଗ୍ରାମର ଗଜିନ ବାଗଙ୍କୁ ଉଦ୍ଧାର କରି ନିଜ ଗାଡିରେ ହସ୍ପିଟାଲ ଆଣିବା ଏବଂ ଗତ ଏପ୍ରିଲରେ ଶଙ୍କରଭୋଜି ନିକଟରେ ବାଇକ ଆରୋହି ଦମ୍ପତି ଦୁର୍ଘଟଣାଗ୍ରସ୍ତ ହୋଇ ଉଭୟଙ୍କ ଗୋଡ ଭାଙ୍ଗି ଯାଇ ରାସ୍ତାରେ ପଡି ରହିଥିବା ଦେଖି ଉଦ୍ଧାର କରି ହସ୍ପିଟାଲରେ ଭର୍ତ୍ତି କରି ଜୀବନ ରକ୍ଷକ ସାଜିଥିଲେ ଡାକ୍ତର ନାୟକ।

ବର୍ତ୍ତମାନ ସେ ନୂଆପଡା ଜିଲ୍ଲା ମୁଖ୍ୟ ଡାକ୍ତରଖାନାରେ କାର୍ଯ୍ୟରତ ରହିଛନ୍ତି। ବରଗଡ ଜିଲ୍ଲା ପାଇକମାଲ ଅନ୍ତର୍ଗତ ମାଣ୍ଡୋଶୀଲ ଗ୍ରାମର ଧନମତି ରଣାଙ୍କ ଜଙ୍ଘରେ ଏକ କାଠ ଗଳି ଯାଇ ଗୁରୁତର ଅବସ୍ଥାରେ ତାଙ୍କୁ ନୂଆପଡା ଜିଲ୍ଲା ମୁଖ୍ୟ ଡାକ୍ତରଖାନାରେ ଭର୍ତ୍ତି କରାଯାଇଥିଲା। ଡାକ୍ତରଖାନାରେ ଆନାସ୍ଥେସିଆ ଡାକ୍ତର ନଥିବା ବେଳେ ଲୋକାଲ ଆନାସ୍ଥେସିଆ ଦେଇ ବିନା ରକ୍ତସ୍ରାବରେ ସଫଳ ଅପରେସନ କରି ନିଜ ସାହସିକତାର ପରିଚୟ ଦେଇଥିଲେ ଡାକ୍ତର ସ୍ୱସ୍ତିରେଖା ନାୟକ। ଏହିପରି ଭାବରେ ମାନବିକତାର ଅନେକ ଉଦାହରଣ ରହିଛି ତାଙ୍କର ଡାକ୍ତରୀ ଜୀବନରେ।

ଯେକୌଣସି ଅସୁବିଧାକୁ ଖାତିର ନ କରି ମାନବସେବାକୁ ନିଜର ଧର୍ମ ବୋଲି ଧରି ନେଇ ମାନବିକତାର ପରିଚୟ ସୃଷ୍ଟି କରିଥିବା ସାହସୀ ଡାକ୍ତରାଣୀ ସ୍ୱସ୍ତିରେଖା ନାୟକଙ୍କ ବୀରତ୍ବର ପ୍ରୟାସକୁ ଅଭିବାଦନ ଜଣାଉଛି। ତାଙ୍କର ଚଲାପଥ କୁସୁମିତ ହେଉ, ଆଗାମୀ ଦିନରେ ଏହିପରି ସେବା ଜାରି ରହୁ ପରମାତ୍ମାଙ୍କ ନିକଟରେ ଏତିକି ପ୍ରାର୍ଥନା।