04-May-2024

ବାଲାଙ୍ଗୀର/ଟିଟିଲାଗଡ(ପ୍ରେରଣା ଖବର): ଟିଟିଲାଗଡ ବିଧାନସଭା କ୍ଷେତ୍ରରେ ନିର୍ବାଚନୀ ପ୍ରଚାର ଯୋରଧରିଛି । ବିଜେଡି ଦଳରୁ ଜଳସଂମ୍ପଦ ଓ ପରିବହନ ମନ୍ତ୍ରୀ ଟୁକୁନୀ ସାହୁ ପ୍ରାର୍ଥିନୀ ଥିବା ବେଳେ ଚଳିତଥର ତାଙ୍କୁ କଡାଟକ୍କର ଦେଉଛନ୍ତି ବିଜେପି ଦଳରୁ ପ୍ରାର୍ଥି ହୋଇଥିବା ପୌରାଧ୍ୟକ୍ଷା ମମତା ଜୈନଙ୍କ ସ୍ୱାମୀ ନବୀନ ଜୈନ । ତେବେ ମନ୍ତ୍ରୀ ଟୁକୁନୀ ସାହୁଙ୍କୁ ବିରୋଧ କରି ଏକ ବଡ ଗୋଷ୍ଠୀ ବିଜେଡିକୁ ଝଟକା ଦେଇଛନ୍ତି । ବିଜେଡିର ହେଭିୱେଟ ନେତାଗଣ ଦଳଛାଡି ଆଜି ବିଜେପି

ଦଳରେ ଯୋଗ ଦେଇଛନ୍ତି । ଦେଶରେ ମୋଦୀ ହାୱା ବହୁଥିବା ବେଳେ ଟିଟିଲାଗଡ ନିର୍ବାଚନମଣ୍ଡଳିରେ ଏହି ହାୱା ଦ୍ୱିଗୁଣିତ ହୋଇଯାଇଛି । ଟିଟିଲାଗଡ ସହରର ଜଣାଶୁଣା ଯୁବସଂଗଠକ ପ୍ରମୋଦ ପଧାନ, ପଞ୍ଚାନନ ସାହୁ, ରାଜ୍ୟ ସରପଞ୍ଚ ସଂଘର ସଭାପତି ବୀରବର ସାହୁ, ନାରୀନେତ୍ରୀ ରଂଞ୍ଜୁ ରାଇମନ ପ୍ରମୁଖ ଆଜି ତାଙ୍କର ହଜାର ହଜାର ସମର୍ଥକଙ୍କ ସହ କେନ୍ଦ୍ରମନ୍ତ୍ରୀ ଧର୍ମେନ୍ଦ୍ର ପ୍ରଧାନ, ସାଂସଦପ୍ରାର୍ଥି ସଂଗୀତାକୁମାରୀ ସିଂଦେଓଙ୍କ ଠାରେ ବିଜେପିଦଳରେ ଯୋଗଦେଇଛନ୍ତି । ଆଜି ଦିନ ୧୦ଟାରୁ ଟିଟିଲାଗଡ ସହରର ଐତିହାସିକ ମଦନଜାଲ ଛକରେ ଟିଟିଲାଗଡର ପ୍ରଥମ ବିଜେପି କାଉନସିଲର ସ୍ୱର୍ଗତ ମଦନଜାଲଙ୍କ ପ୍ରତିମୂର୍ତ୍ତିରେ ମାଲ୍ୟାର୍ପଣ କରି ଏକ ବିଶାଳ ଶୋଭାଯାତ୍ରା ଆରମ୍ଭ ହୋଇଥିଲା । ଟିଟିଲାଗଡ ବିଧାୟକ ପ୍ରାର୍ଥି ନବୀନ ଜୈନ, ପୌରାଧ୍ୟକ୍ଷା ମମତା ଜୈନ, ସଂଗଠକ ପ୍ରମୋଦ ପଧାନ, ନଗରସଭାପତି ପ୍ରଶାନ୍ତ ଷଢଙ୍ଗୀ, ଅଶ୍ୱିନୀ ସାହୁ, ପୂର୍ବତନ ପୌରାଧ୍ୟକ୍ଷ ଶୁଭ୍ରାଂଶୁଶେଖର ଦାସ, ସରପଞ୍ଚସଂଘ ସଭାପତି ବୀରବର ସାହୁ, ପଞ୍ଚାନନ ସାହୁ, ବରିଷ୍ଠନେତା ମହେନ୍ଦ୍ର ଠାକୁର, ଅଶୋକ ଦୋରା, ଚ୍ୟାରମେନ ବାଗ, ସୁଦାମ ମହାରଣା ପ୍ରମୁଖଙ୍କ ନେତୃତ୍ୱରେ ପ୍ରାୟ ୧୦ହଜାର ସମର୍ଥକ ଶୋଭାଯାତ୍ରାରେ ସାମିଲ ହୋଇଥିଲେ । ଟିଟିଲାଗଡ ସହରର ମଦନଜାଲ ଛକଠାରୁ ଶୋଭାଯାତ୍ରା ଆରମ୍ଭ ହୋଇ ବ୍ୟାଙ୍କଛକ, ବିଜୁପଟ୍ଟନାୟକଙ୍କ, ଉପଜିଲ୍ଲାପାଳଙ୍କ କାର୍ଯ୍ୟାଳୟ ଦେଇ ହାଇସ୍କୁଲପାଖରେ ଥିବା ସଭାସ୍ଥଳରେ ପହଞ୍ଚିଥିଲେ । ସେଠାରେ ବିଜେପିର ଜିଲ୍ଲା ଉପସଭାପତି ଶ୍ରୀବତ୍ସ ବେହେରାଙ୍କ ସଂଯୋଜନାରେ ଅନୁଷ୍ଠିତ କାର୍ଯ୍ୟକ୍ରମରେ କେନ୍ଦ୍ରମନ୍ତ୍ରୀ ଧର୍ମେନ୍ଦ୍ର ପ୍ରଧାନ, ବଲାଙ୍ଗୀର ସାଂସଦପ୍ରାର୍ଥି ସଂଗୀତା କୁମାରୀ ସିଂଦେଓ, ବଲାଙ୍ଗୀର ଜିଲ୍ଲା ସଭାପତି ଶିବାଜୀ ମହାନ୍ତି । ଟିଟିଲାଗଡ ବିଧାୟକପ୍ରାର୍ଥି ନବୀନ ଜୈନ, ପୌରାଧ୍ୟକ୍ଷା ମମତା ଜୈନ, ବରିଷ୍ଠନେତା ମହେନ୍ଦ୍ର ଠାକୁର, ଅଶୋକ ଦୋରା, ପୂର୍ବତନ ପୌରାଧ୍ୟକ୍ଷ ଶୁଭ୍ରାଂଶୁ ଶେଖର ଦାସ ପ୍ରମୁଖ ଯୋଗଦେଇ ରାଜ୍ୟସରକାରଙ୍କୁ କଡା ସମାଲୋଚନା କରିଥିଲେ । 
 କେନ୍ଦ୍ରମନ୍ତ୍ରୀ ଶ୍ରୀ ପ୍ରଧାନ ତାଙ୍କ ବକ୍ତବ୍ୟରେ ମୁଖ୍ୟମନ୍ତ୍ରୀଙ୍କୁ ଟାର୍ଗେଟ କରି କହିଲେ ଯେ,ଗତ ୨୫ବର୍ଷଧରି ଓଡିଶାରେ ଶାସନ କରୁଥିବା ବିଜେଡି ସରକାରଙ୍କ ଯୋଗୁଁ ଏହି ଅଞ୍ଚଳର ଯୁବକମାନେ ନିଯୁକ୍ତି ପାଉନାହାଁନ୍ତି ଓ ବାହାର ରାଜ୍ୟକୁ ଦାଦନ ଖଟିବାକୁ ଯାଉଛନ୍ତି । ଆଜି ଓଡିଆ ଅସ୍ମିତା ବିପଦରେ ରହିଛି । ରାଜ୍ୟକୁ ଜଣେ ଅଣଓଡିଆ ଶାସନ କରୁଛନ୍ତି। ମନ୍ତ୍ରୀ ତାଙ୍କ ବକ୍ତବ୍ୟରେ ଜଳବାୟୁ ପରିବର୍ତ୍ତନ ଯୋଗୁଁ ବଢୁଥିବାତାପମାତ୍ରାକୁ ନେଇ  ମଧ୍ୟ ଉଦବେଗ ପ୍ରକାଶ କରିଥିଲେ । ଆଗାମୀ ଦିନରେ ବଲାଙ୍ଗୀର ଜିଲ୍ଲା ମରୁଭୂମୀ ହେବାକୁ ଯାଉଥିବା ନେଇ ରିପୋର୍ଟ ପ୍ରକାଶ ପାଉଛି । ରାଜ୍ୟସରକାର ଏହାକୁ ମୁକାବିଲା କରିବାରେ ବିଫଳ ହୋଇଛନ୍ତି । ମୁଖ୍ୟମନ୍ତ୍ରୀ ମିଛ କହି ଲୋକଙ୍କୁ ଭ୍ରମିତ କରୁଛନ୍ତି । ତେଣୁ ରାଜ୍ୟରେ ଥିବା ସରକାର ବଦଳିବା ଦରକାର ଓ ଟିଟିଲାଗଡରେ ନବୀନ ଜୈନଙ୍କ ଭଳି ଜଣେ ଦକ୍ଷ ବିଧାୟକ ମଧ୍ୟ ଆବଶ୍ୟକ ବୋଲି କହିଥିଲେ । ଅନ୍ୟମାନଙ୍କ ମଧ୍ୟରେ 

କଲ୍ୟାଣୀ ସାହୁ,କଲ୍ୟାଣୀ ଦାସ,ପ୍ରେମ ବିଶି,ରାଜେଶ ଅଗ୍ରୱାଲ ଓ ବହୁସଂଖ୍ୟାରେ ସରପଞ୍ଚଓ ସମିତିସଭ୍ୟ ମାନେ ବିଜେପି ଦଳରେ ଯୋଗଦେଇଥିଲେ । ଆଜି ଟିଟିଲାଗଡ ସହରରେ ୪୫ଡିଗ୍ରୀ ତାପମାତ୍ରା ଥିଲେ ହେଁ ଏତେ ସଂଖ୍ୟାରେ ନେତା ଓ ସମର୍ଥକ ଯୋଗଦେଇଥିବାରୁ ମନ୍ତ୍ରୀ ଧର୍ମେନ୍ଦ୍ର ପ୍ରଧାନ ଅଭିଭୁତ ହୋଇଯାଇଥିଲେ । କେନ୍ଦ୍ରମନ୍ତ୍ରୀ ଏହା ପୂର୍ବରୁ ନୂଆପଡାର ଖରିଆର  ଓ ବଲାଙ୍ଗୀର ଜିଲ୍ଲାର କଣ୍ଟାବାଞ୍ଜିଠାରେ ନିର୍ବାଚନ ସଭାରେ ଯୋଗଦେଇ ମୁଖ୍ୟମନ୍ତ୍ରୀଙ୍କୁ କଡା ସମାଲୋଚନା କରି ରାଜ୍ୟରେ ସରକାର ପରିବର୍ତ୍ତନ ଦରକାର ବୋଲି କହିଥିଲେ