18-Apr-2024

ବଲାଙ୍ଗୀର  :  ( ମଳୟ ମିଶ୍ରଙ୍କ ରିପୋର୍ଟ ) ଚଳିତ ନିର୍ବାଚନରେ ଦୀର୍ଘଦିନ ଧରି ଝୁଲାଇ ରଖିବା ପରେ ଏକାଧିକ ଦୃଢଦାବିଦାର ଥିବା ସତ୍ତ୍ବେ ଶେଷରେ ସବୁ କଳ୍ପନାଜଳ୍ପନାର ଅନ୍ତଘଟାଇ ଦୁଇ ପ୍ରମୁଖଦଳର ପ୍ରାର୍ଥୀ ଘୋଷଣା ପରେ ଶେଷରେ ବିଜେଡି ମୁଖ୍ୟମନ୍ତ୍ରୀ ନବୀନ ପଟ୍ଟନାୟକଙ୍କୁ ପୂର୍ବରୁ ପଶ୍ଚିମଓଡିଶାର  ବିଜେପୁର ପରି ତାଙ୍କର ନିଜ ବିଧାନସଭା ଗଞ୍ଜାମର ହିଞ୍ଜଳି ସହ ବଲାଙ୍ଗୀର କଣ୍ଟାବାଞ୍ଜି ଆସନରେ ପ୍ରାର୍ଥୀ ଘୋଷଣା କରିଛି । 

ଏହି ଘୋଷଣା ପରେ ଜିଲ୍ଲା ରାଜନୀତିରେ ଆଲୋଡନ ସୃଷ୍ଟିହେବା ସହିତ ପ୍ରମୁଖ ବିରୋଧୀଦଳ ଭାଜପାରେ କମ୍ପନ ଖେଳିଯାଇଛି ।  ଫଳତଃ ପଶ୍ଚିମଓଡିଶା ବନାମ ବଲାଙ୍ଗୀର ଜିଲ୍ଲାରେ ବିଜେଡିର ଶକ୍ତିବୃଦ୍ଧି ହୋଇଥିବା କୁହାଯାଉଛି ।

 ବଲାଙ୍ଗୀର ସଦର ବିଧାନସଭା ଆସନରେ ପୂର୍ବରୁ ଦଳରୁ ଥରେ ବିଧାୟକ ଓ ଦୁଇଥର ସାଂସଦ ଓ ଏବେ ଷ୍ଟେଟ ହାଉସିଂ ବୋର୍ଡ  ଅଧ୍ୟକ୍ଷ ରହିଥିବା ରାଜପରିବାରର କଳିକେଶ ନାରାୟଣ ସିଂଦେଓ ବଲାଙ୍ଗୀର ବିଧାନସଭା ଆସନରେ ଲଢୁଥିବାବେଳେ , ପାଟଣାଗଡ ଆସନରେ ଦଳର ବିଧାୟକ ତଥା ବିଧାନସଭାର ଉପ-ମୁଖ୍ୟ ସଚେତକ ଥିବା ସରୋଜ ମେହେର , ଟିଟିଲାଗଡ ଆସନରେ ପୂର୍ବରୁ ଦୁଇଥର ମନ୍ତ୍ରୀଥିବା ଟୁକୁନି ସାହୁ ଏଥର  ପ୍ରାର୍ଥୀ ହୋଇଥିବା ସହ ପିସିସି ସଭାପତି ଶରତ ପଟ୍ଟନାୟକଙ୍କ ଗାଁ' ବନାମ ଏକା ଗାଁ' ଓ କଣ୍ଟାବାଞ୍ଜିର କଂଗ୍ରେସ ବିଧାୟକ ସନ୍ତୋଷ ସିଂ  ସାଲୁଜାଙ୍କ ଯୋଡି  ସଇଁନ୍ତଳାର ପୂର୍ବବିଧାୟକ ତଥା ଟିଟିଲାଗଡ ଆସନରେ ଆଗରୁ କଂଗ୍ରେସର ବିଧାୟକ ପ୍ରାର୍ଥୀ ତଥା ପୂର୍ବତନ ମନ୍ତ୍ରୀ ସୁରେନ୍ଦ୍ର ସିଂଭୋଇ କଂଗ୍ରେସରୁ ଇସ୍ତଫାଦେଇ ଏଥର ଶେଷମୁହୂର୍ତ୍ତରେ ବିଜେଡି ଟିକେଟରେ ବଲାଙ୍ଗୀର ଲୋକସଭା ସାଂସଦ ପ୍ରାର୍ଥୀ ହୋଇଛନ୍ତି ।

 ତେଣୁ ଏବେ କଣ୍ଟାବାଞ୍ଜିରେ ମୁଖ୍ୟମନ୍ତ୍ରୀ ନବୀନ ପଟ୍ଟନାୟକଙ୍କ ପ୍ରାର୍ଥୀହେବା ଉଭୟ କଂଗ୍ରେସ ଓ ବିଶେଷକରି ବିଗତ ଚାରିଥରର ଭାଜପା ସାଂସଦ ରହିଆସିଥିବା ସହ ଏଥର ପଞ୍ଚମଥର ମଧ୍ୟ ଭାଜପାର ସାଂସଦ ପ୍ରାର୍ଥିନୀ ରାଣୀ ସଙ୍ଗୀତା ସିଂଦେଓ ଏବଂ ବିଗତ ପାଞ୍ଚଥରର ଭାଜପା ବିଧାୟକ ତଥା ମନ୍ତ୍ରୀ ଥିବା ପାଟଣାଗଡ ବିଧାନସଭା ଆସନରେ ଗତଥର ପରାଜିତ ହେବା ସତ୍ତ୍ୱେ ଏଥର ପୁଣି ଭାଜପାର ବିଧାୟକ ପ୍ରାର୍ଥୀ ହୋଇଥିବା ତାଙ୍କ ସ୍ବାମୀ ରାଜା କନକ ବର୍ଦ୍ଧନ ସିଂଦେଓଙ୍କ ବିପକ୍ଷ ଭାରି ପଡିଯାଇଥିବା କୁହାଯାଉଛି । 

ଅପରତଃ  ନକଲିଔଷଧଠୁଁ ଆରମ୍ଭ କରି କିଛିମାସତଳେ ଖୁଦବେପାର ଓ ଆଇପିଏଲ୍ ଜୁଆ ଇତ୍ୟାଦି ସହ ଅନ୍ୟାନ୍ୟ ନକଲିସାମଗ୍ରୀର ରାଜଧାନୀ ଅପଖ୍ୟାତ ଜିଲ୍ଲାର ଏକ ବ୍ୟବସାୟିକ ପେଣ୍ଠ କଣ୍ଟାବାଞ୍ଜି ଦାଦନଚାଲାଣର ମଧ୍ୟ ଗଡ । ପ୍ରତିବର୍ଷ ମୁଖ୍ୟତଃ ଏଇ କଣ୍ଟାବାଞ୍ଜି , ତୁରେକେଲା ଓ ସଂଲଗ୍ନ ବେଲପଡାର କୋଟିପତି ପାଲଟି ଯାଇଥିବା ଦାଦନସର୍ଦ୍ଦାରଙ୍କ ଜରିଆରେ ଏହିଠାରୁ ରାଜ୍ୟ ବାହାରର ଆନ୍ଧ୍ର , ତାମିଲନାଡୁ , କର୍ଣ୍ଣାଟକ ଆଦି ରାଜ୍ୟର ଇଟାଭାଟି ସେଠ୍ ମାନେ ଆସି ଡେରାପକାଇ ଜିଲ୍ଲା ଓ ଆଖପାଖ ଅଞ୍ଚଳରୁ ଲକ୍ଷାଧିକ ସଂଖ୍ୟାରେ ଦାଦନଶ୍ରମିକ ଚାଲାଣ କରିଆସୁଛନ୍ତି । ଏହି ବେଆଇନ୍ ଦାଦନଚାଲାଣ ଓ ନାମମାତ୍ର ଲାଇସେନ୍ସ କରି ଶ୍ରମିକଚାଲାଣ କରିଆସୁଥିବା  ଅଞ୍ଚଳର ସର୍ଦ୍ଦାର ଓ ସେଠ୍ ମାନଙ୍କ ଦ୍ବାରା ଦାଦନଶ୍ରମିକ ଶୋଷଣ ଓ ନିର୍ଯାତନାର କାହାଣୀ ଓ ମାମଲା ଗଣମାଧ୍ୟମରେ ପରମ୍ପରାରେ ପରିଣତ ହୋଇଥିବା ସହ ଏପରି ମଣିଷବେପାରରୁ କୋଟିପତି ପାଲଟିଥିବା ସର୍ଦ୍ଦାରମାନେ ଏବେ ରାଜନୀତିରେ ଅନୁପ୍ରବେଶ କରିଗଲେଣି । ପଞ୍ଚାୟତ , ବ୍ଲକ୍ ରେ ସେମାନେ ନିର୍ବାଚିତ ଲୋକପ୍ରତିନିଧି ହେଇ କ୍ଷମତା ଉପଭୋଗ କରୁଥିବା ସହିତ ବିଧାୟକ ମଧ୍ୟ ହେଲେଣି ଓ  ଗତ କେତେବର୍ଷ ହେଲା ଉଦ୍ୟମରତ । ସେମାନେ ଏତେ ନିରଙ୍କୁଶ ହୋଇପଡିଛନ୍ତି ଯେ , ଧରପଗଡରେ ଗିରଫ ହେଉଥିବା ରାଜ୍ୟ ବାହାରର ସେଠ୍ ବା ଅଭିଯୁକ୍ତ ସର୍ଦ୍ଦାରଙ୍କ ପାଇଁ ଥାନାରେ ଲବି ଓ ଘେରାଉ କରିବାର ନଜିର୍ ରହିଛି । ମଧ୍ୟ ଏହି ନିର୍ବାଚନ ମଣ୍ଡଳୀ ଓ ଆଖପାଖ ଅଞ୍ଚଳରେ ଏଭଳି ଅନେକ ଦୃଷ୍ଟାନ୍ତ ରହିଛି । ଏଭଳି ଏକ ଦାଦନପ୍ରବଣ , ମାଓପ୍ରବଣ ନିର୍ବାଚନ ମଣ୍ଡଳୀରେ ପଦପାତ ଓ ପ୍ରତିନିଧିତ୍ବ କରି ମୁଖ୍ୟମନ୍ତ୍ରୀ କେତେ ସଫଳ ହେବେ , ଦେଖିବାକୁ ବାକିରହିଲା ବୋଲି ଲୋକଙ୍କ ମଧ୍ୟରେ ଚର୍ଚ୍ଚା ହେଉଛି ।

ତେବେ ସବୁଠାରୁ ଗୁରୁତ୍ୱପୂର୍ଣ୍ଣ ଯେ , ଏହି ଟିଟିଲାଗଡ ଉପଖଣ୍ଡରେ ଦୀର୍ଘ ଦଶନ୍ଧିଧରି ଟିଟିଲାଗଡ ଜିଲ୍ଲାଦାବି ହୋଇଆସୁଥିବା ସହ ଗତ ବିଧାନସଭାରେ ଏହା ଏକ ପ୍ରସଙ୍ଗ ହୋଇଥିଲା ।  ଦ୍ବିତୀୟତଃ କଣ୍ଟାବାଞ୍ଜିକୁ ମଧ୍ୟ ଜିଲ୍ଲା କରାଯାଉ ବୋଲି କ୍ରିୟାନୁଷ୍ଠାନ କମିଟି ଗଠନ କରାଯାଇ ଦାବିଆନ୍ଦୋଳନ କରାଯାଇ ଆସୁଛି । ମୁଖ୍ୟମନ୍ତ୍ରୀଙ୍କ ପରୋକ୍ଷ ସଙ୍କେତକୁ ଭରସା କରି ଟିଟିଲାଗଡ ବିଧାୟିକା ତଥା ମନ୍ତ୍ରୀ ଟୁକୁନି ସାହୁ ଏହି ଟିଟିଲାଗଡ ଜିଲ୍ଲାଦାବି ଆନ୍ଦୋଳନକୁ ନିଶ୍ଚୟ ପୂରଣ ହେବ ବୋଲି ଆଶ୍ବାସନା ଦେଇଆସିଥିବା ବେଳେ ଏବେ କଣ୍ଟାବାଞ୍ଜିରେ ଖୋଦ୍ ମୁଖ୍ୟମନ୍ତ୍ରୀ ପ୍ରାର୍ଥୀ ହୋଇଥିବାରୁ କଣ୍ଟାବାଞ୍ଜିର ଲୋକେ ଅଧିକ ଆଶାୟୀ ହୋଇପଡିବା ସ୍ବାଭାବିକ୍ । ଯଦି ଏଠାକାର ଭୋଟରମାନେ ପ୍ରାର୍ଥୀ ନବୀନପଟ୍ଟନାୟକଙ୍କ ଆଗରେ ଏହି ଜିଲ୍ଲାଦାବି ର ସର୍ତ୍ତ ରଖନ୍ତି , ନବୀନବାବୁ ତାଙ୍କ ତଣ୍ଟିରୁ ଏହି କଣ୍ଟାବାଞ୍ଜି କଣ୍ଟାକୁ କେମିତି କାଢିବେ , ଲୋକେ ଚର୍ଚ୍ଚା କଲେଣି । ବଲାଙ୍ଗୀର ଜିଲ୍ଲାରେ ଟିଟିଲାଗଡ ନା କଣ୍ଟାବାଞ୍ଜି ମଧ୍ୟରୁ କେଉଁଟି ଜିଲ୍ଲା ଘୋଷିତ ହେବ ନା ପଦ୍ମପୁର ପରି ଅଦାଲତି ପେଞ୍ଚ ଖେଳି ଭୋଟରଙ୍କୁ ବଣା କରି ଦିଆଯିବ , ଆଗକୁ ଦେଖିବାକୁ ବାକି ରହିଲା । 

ଅନ୍ୟ ଏକ ଆଲୋଚନାରେ ନବୀନଙ୍କୁ ମାତ୍ ଦେବାକୁ ଏଠାକୁ ମୋଦୀ ନିର୍ବାଚନୀପ୍ରଚାରରେ ଆସିପାରନ୍ତି ବୋଲି ମଧ୍ୟ କୁହାଯାଉଛି । ତେବେ କେତେକ ସ୍ଥାନୀୟ ସମୀକ୍ଷକଙ୍କ ମତରେ ଆଗରୁ ବିଜେପୁରକୁ ମୋଦୀ ଆସି ନଥିବା , ଚଳିତ ନିର୍ବାଚନର ଅବ୍ୟବହିତ ପୂର୍ବରୁ ମୋଦୀଙ୍କ  ପ୍ରାକ୍ ନିର୍ବାଚନୀ ଓଡିଶାଗସ୍ତରେ ସଭାମଞ୍ଚରେ ମୋଦୀ-ନବୀନ ବନାମ ପ୍ରଧାନମନ୍ତ୍ରୀ- ମୁଖ୍ୟମନ୍ତ୍ରୀଙ୍କ କୋଳାକୋଳିରୁ ମେଣ୍ଟହେବା ଚର୍ଚ୍ଚା ଯୋର୍ ଧରି ଶେଷରେ ବିପକ୍ଷରେ ଜାଣିଶୁଣି ଦୁର୍ବଳ ପ୍ରତିଦ୍ଵନ୍ଦୀ ପ୍ରାର୍ଥୀ ଖଞ୍ଜାଯିବା ଇତ୍ୟାଦି ଘଟଣା ସହ ନବୀନ ଏଭଳି ଦ୍ବୈତପ୍ରାର୍ଥୀ ହୋଇଥିବା ଅଞ୍ଚଳରେ କେତେ କ'ଣ ବିକାଶ ହୋଇଛି ବୋଲି ପ୍ରଶ୍ନ ପ୍ରକାଶ ପାଇଛି । 

ଏଣୁ ସମୟ କହିବ , କଣ୍ଟାବାଞ୍ଜିରେ ନବୀନପଟ୍ଟନାୟକଙ୍କ ଏହି ବିଧାନସଭା ପ୍ରାର୍ଥୀତ୍ବ କେତେ ଦୂରଦୃଷ୍ଟିସମ୍ପନ୍ନ ଥିଲା  ?