18-Apr-2024

ବଲାଙ୍ଗୀର(ପ୍ରେରଣା ଖବର) ବିଜେଡି ସଦ୍ୟତମ ପ୍ରାର୍ଥୀ ତାଲିକାରେ ବଲାଙ୍ଗିର ଲୋକସଭା ନିର୍ବାଚନ ମଣ୍ଡଳୀ ଅନ୍ତର୍ଗତ କଂଟାବାଞ୍ଜି ବିଧାନସଭା ନିର୍ବାଚନ ମଣ୍ଡଳୀରୁ ପ୍ରାର୍ଥୀ ହେବେ ବୋଲି ଘୋଷିତ ହୋଇଛି । ଯାହା ଜଣା ପଡୁଛି ରାଜନୈତିକ କରାଣରୁ ମୁଖ୍ୟମନ୍ତ୍ରୀ ଏଠାରେ ପ୍ରାର୍ଥୀ ହେବାକୁ ମନସ୍ଥ କରିଛନ୍ତି । ପୂର୍ବରୁ ଏହିଭଳି ମାନ୍ୟବର ମୁଖ୍ୟମନ୍ତ୍ରୀ ହିଂଜିଳୀ ସହ ବିଜେପୁର ନିର୍ବାଚନ ମଣ୍ଡଳୀର ନିର୍ବାଚନ ଲଢି ଜିତିଥିଲେ । କିନ୍ତୁ ପରେ ବିଜେପୁର ନିର୍ବାଚନ ମଣ୍ଡଳୀକୁ ଛାଡି ଦେବାକୁ ସେଠାରେ ଉପ ନିର୍ବାଚନ ହୋଇଥିଲା । ତେଣୁ ଏଥର ମୁଖ୍ୟମନ୍ତ୍ରୀ ଯଦି କଂଟାବାଞ୍ଜି ରୁ ଜିତନ୍ତି ତେବେ ତାକୁ ରଖିବେ କି ଛାଡିଦେବେ ତାହା ଭୋଟରଙ୍କ ମନରେ ପ୍ରଶ୍ନବାଚୀ ସୃଷ୍ଟି କରୁଛି । ତେଣୁ ଦଳୀୟ ସ୍ୱାର୍ଥ ଦୃଷ୍ଟିରୁ ଏଭଳି ନିର୍ବାଚନ ଲଢି ପରେ ଛାଡିଦେବା ଦ୍ୱାରା ସଂପୃକ୍ତ ନିବାଚନ ମଣ୍ଡଳୀ ପାଇଁ ଉଚିତ ହେଉନାହିଁ ବୋଲି ଲୋକେ କୁହାକୁହି ହେଉଛନ୍ତି । ଏହା ଛଡା ମୁଖ୍ୟମନ୍ତ୍ରୀ ବିଜେପୁର ନିର୍ବାଚନ ସମୟରେ କରିଥିବା ଘୋଷଣା ଓ ପ୍ରତିଶୃତି ମାନ ଆଜିଯାଏ କାର୍ଯ୍ୟକାରୀ ହୋଇ ନ ଥିବା ବେଳେ କଂଟାବାଂଜି ନିର୍ବାଚନ ମଣ୍ଡଳୀର ଲୋକେ ସେଭଳି ଠକାମୀର ଶିକାର ହେବେ ନାହିଁ ତ ବୋଲି ଆଶଂକା ପ୍ରକାଶ ପାଉଛି । ତେଣୁ ବିଜେପୁର ନିର୍ବାଚନ ମଣ୍ଡଳୀ ପାଇଁ ମୁଖ୍ୟମନ୍ତ୍ରୀ କଣ କରିଛନ୍ତି ଓ କଂଟାବାଞ୍ଜିରେ ଜିତିଲେ ନିର୍ବାଚନ ମଣ୍ଡଳୀ ରେ କଣ କରିଛନ୍ତି ଓ ବଲାଙ୍ଗିର ଲୋକ ସଭା ନିର୍ବାଚନ ମଣ୍ଡଳୀ ରେ କଣ କରିବେ ମାନ୍ୟବର ମୁଖ୍ୟମନ୍ତ୍ରୀ ଏକ ଶ୍ୱେତପତ୍ର ଜାରି କରିବା ଦରକାର ବୋଲି ବିଶିଷ୍ଟ କୋଶଲବାଦୀ ନେତା ପ୍ରମୋଦ କୁମାର ମିଶ୍ର ଏକ ସାଂବାଦିକ ସମ୍ମିଳନୀରେ ମତ ପ୍ରକାଶ କରିଛନ୍ତି । ଏହା ଛଡା ଦାଦନ ପ୍ରବଣ ବଲାଙ୍ଗିର ଜିଲ୍ଲାର ଉପାନ୍ତ ନିର୍ବାଚନ ମଣ୍ଡଳୀ କଂଟାବାଞ୍ଜି ର ଅବସ୍ଥା ଅତୀବ ଶୋଚନୀୟ । ଦାଦନ ରାଜଧାନୀ ରୂପେ ପରିଚିତ ଏହି ଅଂଚଳର ତୁରେକେଲା, ବଙ୍ଗୋମୁଣ୍ଡା ଓ ମୁରିବାହାଲ ଅଂଚଳର ଜନସାଧାରଣଙ୍କ ଅର୍ଥନୈତିକ ଅବସ୍ଥା ଅତିବ ଶୋଚନୀୟ । ଏହା ଛଡା କଂଟାବାଞ୍ଜି ଅଂଚଳ ଅତୀତରେ ଅନେକ ସ୍କାମ ପାଇଁ ପ୍ରସିଦ୍ଧି ଲାଭ କରିଥିଲା । ତେଣୁ ଏ ସମସ୍ତ ବିଷୟ ରେ ମୁଖ୍ୟମନ୍ତ୍ରୀଙ୍କ ଆଭିମୁଖ୍ୟ କଣ ତାହା ଜାଣୀବାକୁ ଜନସାଧାରଣ ଉଦ୍‌ବେଗ ଅଛନ୍ତି । ଏଥି ସହିତ ବଲାଙ୍ଗିର ଜିଲ୍ଲାର ଦାବି ୨ୟ କୃଷି ବିଶ୍ୱ ବିଦ୍ୟାଳୟ, ବିଜୟାନନ୍ଦ ସୁଗର ଫେକ୍ଟ୍ରୀ ର ତାଲା ଖୋଲିବା, ପୁରୀ - ରାୟପୁର ରେଳପଥ ନିର୍ମାଣ, ଉଡାନ ଯୋଜନାରେ ତୁଷୁରା କୁ ସାମିଲ କରିବା, ରାଜେନ୍ଦ୍ର ବିଶ୍ୱ ବିଦ୍ୟାଳୟ ର ପୂର୍ଣ୍ଣାଙ୍ଗୀକରଣ, ବେଲପଡା - ପାଟଣାଗଡ - କଂଟାବାଞ୍ଜି ଅଂଚଳରେ କଟନ କରିଡର ସ୍ଥାପନ, ବଲାଙ୍ଗିର, ପାଟଣାଗଡ, ବେଲପଡା, କଂଟାବାଞ୍ଜି ପ୍ରଭୃତିର ବାଇପାସ ନିର୍ମାଣ, କଂଟାବାଞ୍ଜି କଲେଜର ସରକାରୀ କରଣ, କଂଟାବାଞ୍ଜି- ଟିଟିଲାଗଡ ଜିଲ୍ଲା ଦାବୀ ପ୍ରଭୃତି ସଂପର୍କରେ ମୁଖ୍ୟମନ୍ତ୍ରୀଙ୍କ ଆଭିମୁଖ୍ୟ ମଧ୍ୟ ସ୍ପଷ୍ଟ ହେବା ଦରକାର । ଏହା ଛଡା ଏହି ଜିଲ୍ଲାରେ ମନରେଗା ଯୋଜାନାର ବିଫଳତା, ମରୁଡି ସମସ୍ୟାର ସ୍ଥାୟୀ ସମାଧାନ, ସ୍ଥାନୀୟ ନିଯୁକ୍ତି ର ସୁଯୋଗ ସୃଷ୍ଟି, କୁଟୀର ଶିଳ୍ପର ଉନ୍ନତି, ଚାଷୀ ଓ ଚାଷର ଉନ୍ନତି ପ୍ରଭୃତି ବିଷୟ ବସ୍ତୁ ଉପରେ ମଧ୍ୟ ମାନ୍ୟବର ମୁଖ୍ୟମନ୍ତ୍ରୀଙ୍କ ସ୍ପଷ୍ଟ ଆଭିମୁଖ୍ୟ କୁ ଜନସାଧାରଣ ଅପେକ୍ଷା କରିଛନ୍ତି । ଏଥି ସହିତ ବଲାଙ୍ଗିର ଜିଲ୍ଲାର ଜମି ମହାଦୁର୍ନୀତି, କଂଟାବାଞ୍ଜି ଅଂଚଳର ଲୋକଙ୍କ ଜମି ପଟ୍ଟା ପ୍ରଦାନ ସମସ୍ୟାର ସମାଧାନ, କ୍ରାଇମ କେପିଟାଲ ବଲାଙ୍ଗିର ରୁ ଅପରାଧ ବିଲୋପ କରିବା ଇତ୍ୟାଦି ସମସ୍ୟା ର ସ୍ଥାୟୀ ସମାଧାନ ପାଇଁ ମୁଖ୍ୟମନ୍ତ୍‌ୀ କଣ ମନ୍ତ୍ର ରଖିଛନ୍ତି ଜନସାଧାରଣ ଜାଣିବା ଦରକାର । ଏହା ଛଡା ଏ ଜିଲ୍ଲାର ଆଦିବାସୀ, ଦଳିତ, ଉଚ୍ଚ ବର୍ଗର ଓ ଓବିସି ମାନଙ୍କ ମଧ୍ୟରେ ଥିବା ଦରିଦ୍ର ଲୋକଙ୍କ ପାଇଁ ସରକାର ନିର୍ଦ୍ଦିଷ୍ଟ ଭାବରେ କଣ କରିବେ ମୁଖ୍ୟମନ୍ତ୍ରୀ କହିବା ଦରକାର । ଏ ସମସ୍ତ ସମସ୍ୟାର ସମାଧାନ ର ରାସ୍ତା ତିଆରି ନ କରି କେବଳ ପ୍ରତିଶୃତି ପାହାଡ ତୋଳି ନିର୍ବାଚନ ଲଢିଲେ ଏ ଅଂଚଳ ଏକ ରାଜନୈତିକ ଉପନିବେଶ ଛଡା ଅନ୍ୟ କିଛି ରେ ପରିଣତ ହେବ ନାହିଁ ବୋଲି ଶ୍ରୀ ମିଶ୍ର ମତ ଦେବା ସହ ଜନସାଧାରଣ ଏ ପ୍ରସଂଙ୍ଗରେ ବିତର୍କ କରିବାକୁ ଶ୍ରୀ ମିଶ୍ର ଆହ୍ୱାନ ଦେଇଛନ୍ତି ।