02-Feb-2024

ସୋନପୁର (ମନୋରଞ୍ଜନ ତ୍ରିପାଠୀ): ବିଶିଷ୍ଟ ଚଳଚିତ୍ର ଅଭିନେତା ତଥା ନିର୍ଦ୍ଦେଶକ ସାଧୁ ମେହେରଙ୍କର ଗତକାଲି ଦେହାନ୍ତ ହୋଇଛି । ଏହି ଖବର ଶୁଣିବା ପରେ ବୌଦ୍ଧ ଜିଲ୍ଲା ଗୁଡଭେଲିପଦର ଜନ୍ମ ମାଟି ତଥା ସୋନପୁର ବୌଦ୍ଧ ଜିଲ୍ଲାରେ ଶୋକର ଛୟା ଖେଳି ଯାଇଛି । ତାଙ୍କ ମୃତ୍ୟୁ ଖବରରେ ସୋନପୁର ନାଟ ଅନୁଷ୍ଠାନ, ପଏଁରି ଓ ସାହିତ୍ୟ ସଂସଦ ପ୍ରମୁଖ ଅନୁଷ୍ଠାନ କର୍ମକର୍ତ୍ତା, ତଥା ଉଭୟ ଜିଲ୍ଲାର କଳାକାର ନାଟ୍ୟକାର ବୁଦ୍ଧିଜୀବୀ ମର୍ମାହତ ହୋଇ ପଡିଛନ୍ତି l ଅଭିନେତା ସାଧୁ ମେହେର ହିନ୍ଦି ସିନେମା 'ଅଙ୍କୁର' ରେ ତାଙ୍କର ବଳିଷ୍ଠ ନିଖୁଣ ଅଭିନୟ ପାଇଁ ନେସନାଲ ଆୱାର୍ଡ ପାଇଥିଲେ l  ଉଭୟ ହିନ୍ଦୀ ଓ ଓଡିଆ ଚଳଚ୍ଚିତ୍ରରେ ସେ ତାଙ୍କର ନିଖୁଣ ଅଭିନୟର ଛାପ ଛାଡି ଯାଇଛନ୍ତି। ସେ ହେଉଛନ୍ତି ଜାତୀୟ ଚଳଚ୍ଚିତ୍ର ପୁରସ୍କାରରେ ସମ୍ମାନିତ ହୋଇଥିବା ପ୍ରଥମ ଓଡିଆ ଅଭିନେତା । କଳା କ୍ଷେତ୍ରରେ ପାରଦର୍ଶିତା ପାଇଁ ଅନେକ ସମ୍ମାନ ଓ ପୁରସ୍କାରରେ ସେ ସମ୍ମାନିତ ହୋଇଛନ୍ତି। ୧୯୪୦ ମସିହା ଜାନୁଆରୀ ୧ତାରିଖରେ ବୌଦ୍ଧ ଜିଲ୍ଲାର ଗୁଡଭେଲିପଦର ଗ୍ରାମରେ ଜନ୍ମଗ୍ରହଣ କରିଥିଲେ । ତାଙ୍କ ପିତା ଜଣେ ବୁଣାକାର ଥିଲେ । ସୋନପୁର ସହରରେ ସେ ନିଜର ବିଦ୍ୟାଳୟ ଶିକ୍ଷା ଆରମ୍ଭ କରିଥିଲେ । ପିଲାଦିନରୁ ସେ ଅଭିନୟ ପ୍ରତି ଆକର୍ଷିତ ଥିଲେ । ଅଭିନୟରେ ସେ ଏପରି ମଗ୍ନ ଥିଲେ ଯେ, ମଞ୍ଚରେ ଅଭିନୟ କରୁଥିବା ସମୟରେ ତାଙ୍କୁ ପିତାଙ୍କ ମୃତ୍ୟୁଖବର ମିଳିଥିଲା, କିନ୍ତୁ ସେ ମଞ୍ଚଛାଡ଼ି ନଯାଇ ଅଭିନୟ ସମାପ୍ତ କରିଥିଲେ ।  ଯାହାକି ଯୁବ କଳାକାରଙ୍କୁ ପ୍ରେରଣା ଦେବ ନିଶ୍ଚିତ l ସ୍ନାତକ ଶିକ୍ଷାପରେ ସେ  ଅଭିନୟରେ ଡିପ୍ଲୋମା କରିବା ପାଇଁ କଲିକତାର ରବୀନ୍ଦ୍ର ଭାରତୀ ଯାଇଥିଲେ l

ସେଠାରେ, ମଞ୍ଚ ଓ ସିନେମା ପ୍ରଭାବରେ ତାଙ୍କ ଜୀବନର ଗତିପଥ ପରିବର୍ତ୍ତନ ହୋଇଥିଲା । ସେ ପୁନାର ଫିଲ୍ମ ଏଣ୍ଡ ଟେଲିଭିଜନ ଇନଷ୍ଟିଚ୍ୟୁଟ ଅଫ ଇଣ୍ଡିଆ ଯାଇ ଅଭିନୟରେ ଡିପ୍ଲୋମା ହାସଲ କରିଥିଲେ । ତାପରେ ସେ ଥିଏଟରରେ ଯୋଗଦେଲେ ଓ ସତ୍ୟଦେବ ଦୁବେଙ୍କ ନିର୍ଦ୍ଦେଶନାରେ ଅନେକ ନାଟକରେ ଅଭିନୟ କରିଥିଲେ । ସମୁଦାୟ ୫୦ ଗୋଟି ଚଳଚିତ୍ର ରେ ସେ ଅଭିନୟ କରିଥିବା ବେଳେ 'ଭୂକା' ଫିଲ୍ମରେ ସେ ସର୍ବ ଭାରତୀୟ ସ୍ତର ରେ ସେ ଜିଜନ ଆୱାର୍ଡ ପାଇଥିଲେ l ୨୦୧୭ ରେ ପଦ୍ମଶ୍ରୀ ସମ୍ମାନ ଏଵଂ ରାଷ୍ଟ୍ରୀୟ ନାଟ ସମ୍ମାନ ରେ ସମ୍ମାନିତ ହୋଇ ଦୀର୍ଘ ବର୍ଷ ଧରି ସେ ନାଟ ର ରାଷ୍ଟ୍ରୀୟ ଅଧ୍ୟକ୍ଷ ଦାୟିତ୍ବରେ ରହି କଳାକାରଙ୍କ ପ୍ରେରଣlଦାତା ଥିଲେ l