24-Nov-2023

 ବିନିକା(ହିମାଂଶୁ ଶେଖର ପୁଟେଲ): ଓଡ଼ିଶାର ପ୍ରବାଦ ପୁରୁଷ ସ୍ବର୍ଗତ ବିଜୁ ପଟ୍ଟନାୟକଙ୍କ ପରିଚିତ ତଥା ବିନିକା ସାମ୍ବାଦିକ ସଂଘର ସମ୍ପାଦକ ଅଶୋକ ପଣ୍ଡାଙ୍କ ପିତା ନିରଞ୍ଜନ ପଣ୍ଡା(୭୬)ଙ୍କ ଆଜି ସକାଳରେ ପରଲୋକ ଘଟିଛି।ଏହି ଦୁଃଖଦ ଖବର ପାଇବା ପରେ ପରିବାର ତଥା ତାଙ୍କର ଆତ୍ମୀୟ ମହଲରେ ଶୋକର ଲହରୀ ଖେଳିଯାଇଛି।ତାଙ୍କ ଶେଷ ଦର୍ଶନ ପାଇଁ ବନ୍ଧୁ ବର୍ଗ ଓ ଆଖ ପାଖର ବହୁ ମାନ୍ୟଗଣ୍ୟ ବ୍ୟକ୍ତି ବିଶେଷ ଘରକୁ ଆସିଥିଲେ ।ସୂଚନା ଯୋଗ୍ୟ ଯେ ସ୍ବର୍ଗତ ନିରଞ୍ଜନ ପଣ୍ଡା ପ୍ରବାଦ ପୁରୁଷ ବିଜୁ ପଟ୍ଟନାୟକଙ୍କ ଅତି ପରିଚିତ ଥିଲେ।୧୯୮୨ମସିହାରେ ଯେତେବେଳେ ବିଜୁ ପଟ୍ଟନାୟକ   ପଦଯାତ୍ରାରେ ବିନିକା ଆସିଥିଲେ ସେତେବେଳେ ନିରଞ୍ଜନ ଦକ୍ଷତାର ସହିତ   ତାଙ୍କର ସେବା କରିଥିଲେ ।ବିଜୁ ବାବୁ ତାଙ୍କ ଘରକୁ ଆସି କିଛି ସମୟ ବିତାଇ ଲାଲ  'ଚା' ପିଇବା ସହିତ ସତ ସାହାସିକତା ପ୍ରଦର୍ଶନ ପୂର୍ବକ କାର୍ଯ୍ୟ କରିବାକୁ ପରାମର୍ଶ ଦେଇଥିଲେ।ପରେ ବିଜୁ ବାବୁ ଅସୁସ୍ଥ ନିରଞ୍ଜନଙ୍କୁ ନିଜ ଜିପ ଗାଡିରେ ବସାଇ ରାମପୁର ଡାକ୍ତରଖାନାକୁ ଆଣି ଭର୍ତି କରି ଡାକ୍ତର କୃପାସିନ୍ଧୁ ବଡ଼ପଣ୍ଡାଙ୍କ ଠାରେ ଦେଖାଇ ଘରେ ଛାଡ଼ିଥିଲେ ।ନିରଞ୍ଜନଙ୍କ ଦକ୍ଷତା ଓ ସାହସିକତାକୁ ଦେଖି  ରାଜନୀତି ଜୀବନର ଉଜ୍ଜଳ ଭବିଷ୍ୟତ ପାଇଁ ଭୁବନେଶ୍ୱର ବାସଭବନକୁ ଆସିବାକୁ କହି ଚାଲିଯାଇଥିଲେ।ହେଲେ ସେହି ସମୟରେ ଘରର ଆର୍ଥିକ ସ୍ଥିତି ସ୍ୱଚ୍ଛଳ ନଥିବାରୁ ନିରଞ୍ଜନ ବିଜୁ ବାବୁଙ୍କ ପାଖକୁ ଯାଇ ପାରିନଥିଲେ ।ସେହିପରି  ନିରଞ୍ଜନ ବିନିକାରେ ମାରୱାଡ଼ି ଦଙ୍ଗା ସମୟରେ ସାମିଲ ହୋଇ ବିନିକା ମାଟି ପାଇଁ ୬ମାସ ଜେଲ ଜୀବନ କଟାଇଥିଲେ ।ଏହା ବ୍ୟତୀତ କିଏ ଯଦି କୌଣସି ଅସୁବିଧାରେ ଅଛି ତାକୁ ସହଯୋଗ କରିବା ସହିତ ଦୃଢ ମନୋବଳ ରଖି କାର୍ଯ୍ୟ ତୁଲାଇଲେ ନିଶ୍ଚିତ ସଫଳ ହେବେ ବୋଲି ନିରଞ୍ଜନ ଲୋକଙ୍କୁ ଦିଗଦର୍ଶନ ଦେଉଥିଲେ ।ସେ ପାରାଲିଶିସ ରୋଗରେ ଆକ୍ରାନ୍ତ ହୋଇ ଦୀର୍ଘ ୪ମାସ ହେଲା ଶଯ୍ୟାଶାୟୀ ଥିଲେ।ଆଜି ତାଙ୍କର ମୃତ୍ୟୁ ଖବର ପ୍ରଚାରିତ ହେବାପରେ ଅଞ୍ଚଳରେ ଶୋକର ଛାୟା ଖେଳିଯାଇଛି।ତାଙ୍କ ମରଶରୀରକୁ ଏକ ଶୋଭାଯାତ୍ରାରେ ନିକଟ ଦେଣ୍ଡୁପଦର ଶ୍ଵସାନକୁ ନିଆଯାଇଥିଲା ସେଠାରେ ତାଙ୍କ ପୁଅ ସାମ୍ବାଦିକ ଅଶୋକ ପଣ୍ଡା ମୂଖାଗ୍ନୀ ପ୍ରଦାନ କରିଥିଲେ । ବନ୍ଧୁ ବର୍ଗ ଉପସ୍ଥିତ ଥିଲେ l