14-Aug-2023

ବୀରମହାରାଜପୁର, ( ବିନୋଦ ପାଣ୍ଡେ ): ସୁବର୍ଣ୍ଣପୁର ଜିଲ୍ଲା ବୀରମହାରାଜପୁର ବ୍ଳକ ପ୍ରଶାସନର ଅବହେଳା ଓ ପ୍ରଚାର ପ୍ରସାର ଦିଗରେ ଗୁରୁତ୍ବ ଦିଆ ନ ଯିବା କାରଣରୁ ବ୍ଳକସ୍ତରୀୟ ଜିଲ୍ଲାପାଳଙ୍କ ଅଭିଯୋଗ ଶୁଣାଣୀ ଶିବିରରେ ଅଧିକାରୀଙ୍କ ଉପସ୍ଥିତି ଅଧିକ ଥିବା ବେଳେ ଲୋକଙ୍କ ସଂଖ୍ୟା କମ୍ ଦେଖିବାକୁ ମିଳିଛି। ସୋମବାର ବ୍ଳକସ୍ତରୀୟ ଜିଲ୍ଲାପାଳଙ୍କ ଯୁଗ୍ମ ଅଭିଯୋଗ ଶୁଣାଣୀ ଶିବିର ବୀରମହାରାଜପୁର ବ୍ଲକ ସଭାଗୃହ ଠାରେ ଅନୁଷ୍ଠିତ ହୋଇଯାଇଅଛି। ସୁବର୍ଣ୍ଣପୁର ଜିଲ୍ଲାପାଳ  ବିମଳେନ୍ଦୁ  ରାୟ ଓ ଆରକ୍ଷୀ ଅଧିକ୍ଷକ ଅମରେଶ ପଣ୍ଡା‌ ଉକ୍ତ ଅଭିଯୋଗ ଶିବିରରେ ଯୋଗଦେଇ ଜନସାଧାରଣଙ୍କ ବିଭିନ୍ନ ‌ଆପତି  ଅଭିଯୋଗ ଗ୍ରହଣ କରି ସମାଧାନ କରିଥିଲେ। ୧୫ ଗୋଟି ପଞ୍ଚାୟତରୁ ଉକ୍ତ ଶିବିରରେ ମୋଟ ୬୬ ଜଣ ବ୍ୟକ୍ତି ନିଜର ଅଭିଯୋଗ ଦରଖାସ୍ତ ପଞ୍ଜିକରଣ କରିଥିଲେ। ଏଥିରେ ବ୍ୟକ୍ତିଗତ ଅଭିଯୋଗ ୫୯ ଗୋଟି ରହିଥିବା ବେଳେ ସାମୁହିକ ଅଭିଯୋଗ ୭ ଗୋଟି ଦରଖାସ୍ତ ଗ୍ରହଣ ହୋଇଥିଲା। ସେଥିମଧ୍ୟରୁ ୨ ଟି ଅଭିଯୋଗ ତୁରନ୍ତ ସମାଧାନ ହୋଇଥିଲା। ଏବଂ ଅନ୍ୟ ଅଭିଯୋଗ ଗୁଡିକ ତୁରନ୍ତ ସମାଧାନ ପାଇଁ ସମ୍ପୃକ୍ତ ବିଭାଗୀୟ ଅଧିକାରୀଙ୍କୁ ଜିଲ୍ଲାପାଳ ନିର୍ଦ୍ଦେଶ ଦେଇଥିଲେ। 
ବୀରମହାରାଜପୁର ଗୋଷ୍ଠୀ ଉନ୍ନୟନ ଅଧିକାରୀ  ମୋତିଲାଲ ସୁଲିଆ ଙ୍କ ତତ୍ୱାବଧାନରେ  ଅନୁଷ୍ଠିତ ଏହି ଯୁଗ୍ମ ଅଭିଯୋଗ ଶୁଣାଣି କାର୍ଯ୍ୟକ୍ରମ ରେ ଜିଲ୍ଲା ମୁଖ୍ୟ ଉନ୍ନୟନ ଅଧିକାରୀ ତଥା କାର୍ଯ୍ୟ ନିର୍ବାହୀ ଅଧିକାରୀ ଜିଲ୍ଲାପରିଷଦ ଅଶ୍ୱିନୀ ମେହେର , ବୀରମହାରାଜପୁର  ଉପ ଜିଲ୍ଲାପାଳ,  ଅଶୋକ କୁମାର ଭୋଇ, ଅତିରିକ୍ତ ଜିଲ୍ଲା ଚିକିତ୍ସା ଅଧିକାରୀ ଡ଼ ପଦ୍ମହଂସା ଦୋରା ,ଡି ଇ ଓ ଲକ୍ଷ୍ମଣ ଭୋଇ, ଜିଲ୍ଲା ଶ୍ରମ ଅଧିକାରୀ ଡିଲେଶ୍ଵର ଖାକା, ଜିଲ୍ଲା ପଞ୍ଚାୟତ ଅଧିକାରୀ ଙ୍କ ସମେତ ବିଭିନ୍ନ ଜିଲ୍ଳା ସ୍ତରୀୟ ଅଧିକାରୀ ଯୋଗଦାନ କରିଥିଲେ I ବୀରମହାରାଜପୁର ବ୍ଲକ ଅଧ୍ୟକ୍ଷା  ଶାନ୍ତି ଲୁହା, ଉପଖଣ୍ଡ  ଆରକ୍ଷୀ  ଅଧିକ୍ଷକ ବାସୁଦେବ ଛତ୍ରିଆ , ତହସିଲଦାର ବିବୁଧ ଗଡ଼ନାୟକ,, ଅତିରିକ୍ତ ତହସିଲଦାର ସ୍ଵାଗତ କୁମାର ପଣ୍ଡା,  ବିଭିନ୍ନ ବ୍ଲକ ସ୍ତରୀୟ  ଉପସ୍ଥିତ ଥିଲେ। ବ୍ଳକ ପ୍ରଶାସନର ଅବହେଳା,ଖାମଖିଆଲି ମନୋଭାବ ଏବଂ ଅନେକ ଗୁରୁତ୍ତ୍ୱପୂର୍ଣ ଅଭିଯୋଗ ଆସିବା ଜାଣିବାକୁ ପାଇଁ ବ୍ଳକ ପ୍ରଶାସନ ପ୍ରଚାର ପ୍ରସାର ଦିଗରେ ଗୁରୁତ୍ବ ଦେଇ ନଥିବା ବିଭିନ୍ନ ମହଲରେ ଆଲୋଚନା ହେଉଛି। ତେବେ ବ୍ଳକ ପ୍ରଶାସନର ଏଭଳି ଅବହେଳା ଯୋଗୁଁ ଲୋକେ କ୍ଷୋଭ ପ୍ରକାଶ କରିଥିବା ବେଳେ ଆଗକୁ ପ୍ରଚାର ପ୍ରସାର ଦିଗରେ ଜିଲ୍ଲା ପ୍ରଶାସନ ଦୃଷ୍ଟି ଦେବାକୁ ଦାବି ହେଉଛି।