12-Aug-2023

ବରଗଡ଼:-ବରଗଡ଼ ଜିଲ୍ଲା ବିଜେପୁର ଗୋଷ୍ଠୀ ସ୍ୱାସ୍ଥ୍ୟକେନ୍ଦ୍ର ଅନ୍ତର୍ଗତ ଚାରପାଲି ସ୍ୱାସ୍ଥ୍ୟ ଆରୋଗ୍ୟ କେନ୍ଦ୍ରର ଗୋଷ୍ଠୀ ସ୍ବାସ୍ଥ୍ୟ ଅଧିକାରୀ ସୁଶ୍ରୀ କଳ୍ପନା ମହାନ୍ତିଙ୍କ ପ୍ରତ୍ୟକ୍ଷ ତତ୍ୱାବଧାନରେ ଫାଇଲେରିଆ ନିରାକରଣ ଅଭିଯାନ ଓ ସାମୁହିକ ଔଷଧ ସେବନ କାର୍ଯ୍ୟକ୍ରମ ସକାଶେ ଚାରପାଲି ଗ୍ରାମ ପଞ୍ଚାୟତ ଅନ୍ତର୍ଗତ ସମସ୍ତ ଗାଁ ଓ ବିଦ୍ୟାଳୟ ମାନଙ୍କରେ ସଚେତନତା ସଭା ଏବଂ ରେଲି ଅନୁଷ୍ଠିତ ହୋଇଯାଇଛି। ଏହି ରେଲି ଯୋଗେ ଗାଁ ମାନଙ୍କରେ ପ୍ରତ୍ୟେକ ଗଳି କନ୍ଦି ବୁଲି ସ୍ଲୋଗାନ ମାଧ୍ୟମରେ ଲୋକମାନଙ୍କୁ ସଚେତନ କରାଇବା ସହିତ ଏକ ଜନଜାଗରଣ ସୃଷ୍ଟି କରାଯାଇଛି। ଏହି ଫାଇଲେରିଆ ନିରାକରଣ ଅଭିଯାନ ର ମୂଖ୍ୟ ବିଷୟବସ୍ତୁ ଗୁଡିକ ହେଲା, କେମିତି ଗୋଟିଏ ମଶା ଆପଣଙ୍କୁ ସାରା ଜୀବନ ବିକଳାଙ୍ଗ କରି ଦେଇପାରେ। ଏହି ଫାଇଲେରିଆ ରୋଗ ମାଈ କ୍ଯୁଲେକ୍ସ୍ ମାଶା କାମୁଡିବା ଦ୍ବାରା ବ୍ଯାପିଥାଏ। ଏହି ରୋଗର ଲକ୍ଷଣ ମଶା କାମୁଡିବାର ୧୦ ରୁ ୧୫ ବର୍ଷ ପରେ ଶରୀରରେ ଦେଖାଦିଏ। ଲକ୍ଷଣ ଗୁଡ଼ିକ ମଧ୍ୟରେ, ଗୋଡ, ପାଦ, ହାତ ଆଦି ଫୁଲି ଗୋଦର ହୋଇଯିବା। ପୁରୁଷ ମାନଙ୍କ କ୍ଷେତ୍ରରେ ଅଣ୍ଡକୋଷ ଫୁଲିଯିବା ଏବଂ କେତେକାଂଶ କ୍ଷେତ୍ରରେ ଲିଙ୍ଗ ଫୁଲି ମୋଟା ଓ ବଙ୍କା ହୋଇ ମେଣ୍ଢା ଶିଙ୍ଗ ପରି ଦେଖାଯିବା। ମହିଳାମାନଙ୍କ ସ୍ତନ ଫୁଲି ଦରଜ ହେବା। କେତେକଙ୍କ କ୍ଷେତ୍ରରେ ଧଳା ପରିସ୍ରା ହେବା ଇତ୍ୟାଦି ଲକ୍ଷଣ ଦେଖାଦିଏ। ଥରେ ଲକ୍ଷଣ ଦେଖାଦେଲା ପରେ ଏହି ରୋଗ ପାଇଁ ଚିକିତ୍ସା ନାହିଁ, କିନ୍ତୁ ସଂକ୍ରମିତ ହେବାର ପ୍ରାଥମିକ ଅବସ୍ଥାରେ ଏହି ରୋଗର ଚିକିତ୍ସା ସମ୍ଭବ। ପ୍ରଥମିକ ଅବସ୍ଥାରେ ରକ୍ତ ପରୀକ୍ଷା ଦ୍ଵାରା ଏହି ରୋଗକୁ ଚିହ୍ନଟ କରାଯାଇପାରିବ। ପ୍ରାଥମିକ ଅବସ୍ଥାରୁ ହିଁ ଏହି ରୋଗର ନିରାକରଣ ପାଇଁ ସରକାରଙ୍କ ତରଫରୁ "ସାମୁହିକ ଔଷଧ ସେବନ" କାର୍ଯ୍ୟକ୍ରମ ଆରମ୍ଭ କରାଯାଇଛି। ଏହି କାର୍ଯ୍ୟକ୍ରମ ଅଗଷ୍ଟ ୧୦ ତାରିଖ ରୁ ଅଗଷ୍ଟ ୧୯ ତାରିଖ ପର୍ଯ୍ୟନ୍ତ ଚାଲିବ। ଏହି କାର୍ଯ୍ୟକ୍ରମରେ ଅଙ୍ଗନବାଡି କର୍ମୀ, ଆଶା କର୍ମୀ ଓ ତାଲିମ ପ୍ରାପ୍ତ ସ୍ବେଚ୍ଛାସେବୀ ମାନେ ସ୍କୁଲ, କଲେଜ ଏବଂ ଘରକୁ ଘର ଯାଇ ଔଷଧ ଖୁଆଇବେ। କେବଳ ୨ ବର୍ଷରୁ କମ୍ ଶିଶୁ, ଗୁରୁତର ଅସୁସ୍ଥ ବ୍ଯକ୍ତି, ଗର୍ଭବତୀ ମହିଳା ଏବଂ ନବଜାତ ଶିଶୁଙ୍କୁ ୭ଦିନ ପର୍ଯ୍ୟନ୍ତ ସ୍ତନ୍ଯପାନ କରାଉଥିବା ମା ମାନେ ଏହି ଔଷଧ ଖାଇପାରିବେ ନାହିଁ। ଏହି କାର୍ଯ୍ୟକ୍ରମରେ ଚାରପାଲି ଗ୍ରାମ ପଞ୍ଚାୟତର ଗୋଷ୍ଠୀ ସ୍ବାସ୍ଥ୍ୟ ଅଧିକାରୀ ସୁଶ୍ରୀ କଳ୍ପନା ମହାନ୍ତି ଅଧକ୍ଷତା, ସ୍ବାସ୍ଥ୍ୟ କର୍ମୀ ଶ୍ରୀମତୀ ଗୀତ ଭୋଇ, ଅଙ୍ଗନବାଡି କର୍ମୀ ଶ୍ରୀମତୀ ସନ୍ତୋଷିନୀ ପ୍ରଧାନ ଓ ପୁଷ୍ପାଞ୍ଜଳି ସାହୁ ଏବଂ ଆଶା କର୍ମୀ ପ୍ରଭାସିନୀ ଭୋସାଗର ଓ ଯମୁନା ଦୀପ୍ ସହୋଯାଗ କରିଥିଲେ। ଏହି କାର୍ଯ୍ୟକ୍ରମରେ ବିଭିନ୍ନ ସ୍କୁଲର ଛାତ୍ରଛାତ୍ରୀ, ଶିକ୍ଷକ ଓ ଶିକ୍ଷୟିତ୍ରୀଙ୍କ ସମେତ ବହୁ ଗ୍ରାମବାସୀ ମାନେ ଯୋଗ ଦେଇ କାର୍ଯ୍ୟକ୍ରମକୁ ସାଫଲ୍ୟ ମଣ୍ଡିତ କରିଥିଲେ।