02-Aug-2023

ବଲାଙ୍ଗୀର(ମଳୟ ମିଶ୍ରଙ୍କ ରିପୋର୍ଟ ):  କଣ୍ଟାବାଞ୍ଜି ଲାୟନ୍ସ ପବ୍ଲିକ୍ ସ୍କୁଲ୍ ର ଦଶମଶ୍ରେଣୀର ଛାତ୍ର ତଥା କଣ୍ଟାବାଞ୍ଜି  ନୂଆପଡାର ବାସିନ୍ଦା ପ୍ରମୋଦ ଜୈନଙ୍କ ନାବାଳକପୁତ୍ର ଲଳିତ ଜୈନଙ୍କ ମୃତ୍ୟୁ ରହସ୍ୟ କ୍ରମଶଃ ଜଟିଳ ହେବାରେ ଲାଗିଛି । ଗତ ଜୁନ ୧୩ ତାରିଖରେ ଏଇ ପିଲାଟିର ମୃତଦେହ କଣ୍ଟାବାଞ୍ଜି- ମୁରିବାହାଲ ରାସ୍ତାର କୁକୁଡାହାଡ ରେଳଲାଇନରୁ ଜିଆରପି ଉଦ୍ଧାର କରି ସେହିଦିନ ଅଜଣାଶବ ଭାବରେ ତରବରିଆ ଭାବେ ରେଳଲାଇନ କଡ ମଶାଣିରେ ପୋତିଦେବା , ଘଟଣାଟି ପ୍ରଘଟ ଓ ଚର୍ଚ୍ଚା ହେବାରୁ ଥାନାରେ ନିଖୋଜ ବା ଅପହରଣ ଏତଲା ସତ୍ତ୍ୱେ ପୁଲିସ୍ ପୁଣି ମାଜିଷ୍ଟ୍ରେଟ୍ ଙ୍କ ଉପସ୍ଥିତିରେ ମାଟିଖୋଳି ଶବଉଦ୍ଧାର କରିବା ଓ ପରିବାରକୁ ହସ୍ତାନ୍ତର କରି ପୋଡିଦେବାକୁ ନିର୍ଦ୍ଦେଶ ଦେବା , ଶବର ପୋଷ୍ଟମର୍ଟମ୍ କରା ନଯିବା , ଜଣେ ସହପାଠିନୀଠାରୁ ଲକ୍ଷାଧିକ ଟଙ୍କା ନେଇଥିବାରୁ ସ୍ଥାନୀୟ ଆଲିଶାନ୍ ଲାଇଫ୍ ଷ୍ଟାଇଲ୍ ରେ କେତେକ ସ୍ଥାନୀୟ ପ୍ରଭାବଶାଳୀ ବ୍ୟକ୍ତିଙ୍କ ସହ ଉକ୍ତ ଝିଅର ବାପା ଓ କାକା ଲଳିତକୁ ଧରିନେଇ ମାଡମାରି ଟଙ୍କା ଅସୁଲି ଓ ଆହୁରି ଟଙ୍କା ଦେବାକୁ ଚୁକ୍ତିନାମା ଲେଖାଇନେବା , ଶେଷରେ ମୃତ ନାବାଳକଟିର ବାପା , ସ୍ଥାନୀୟ ବ୍ୟକ୍ତିବିଶେଷ , ବିଭିନ୍ନ ସଂଗଠନ ଓ ଗଣମାଧ୍ୟମର ପ୍ରକାଶିତ ଅଭିଯୋଗର ଚାପରେ ବାଧ୍ୟହୋଇ ପୁଲିସ୍ ବରିଷ୍ଠ ଅଧିକାରୀଙ୍କ ତତ୍ତ୍ୱାବଧାନରେ ଉକ୍ତ ଝିଅର ବାପା ବିଶାଲ ଅଗ୍ରବାଲ ଓ କାକା ବିକାଶ ଅଗ୍ରବାଲଙ୍କୁ ଲଳିତର ଆତ୍ମହତ୍ୟା ପାଇଁ ବାଧ୍ୟ କଲାଭଳି ପରିସ୍ଥିତି ସୃଷ୍ଟି କରିବା ସହ ନିର୍ଯାତନା ଦେବା ଅଭିଯୋଗରେ ଗିରଫ କରି କୋର୍ଟ ଚାଲାଣ କରିବା ପରେ  ଆପ୍ , ଭାଜପା ପକ୍ଷରୁ ଓ ମୃତବାପା ଏସପିଙ୍କୁ ଭେଟି ଏହାର ହତ୍ୟାଅଭିଯୋଗର ତଦନ୍ତ ପାଇଁ ଅନୁରୋଧ କରିବା ଇତ୍ୟାଦି ଘଟଣା ଚର୍ଚ୍ଚା ଓ ଖବରରେ ରହିଛି ।

ତେବେ ସଂପ୍ରତି କେତେକ ଗଣମାଧ୍ୟମ ବା ସୋସିଆଲ୍ ମିଡିଆରେ ଭାଇରାଲ୍ ହେଉଥିବା ଖବର ଅନୁଯାୟୀ , ମୃତ ଲଳିତର ମୋବାଇଲ୍ ରୁ ଉଦ୍ଧାର କରାଯାଇଥିବା ତଥ୍ୟରେ ଲଳିତ ସହପାଠିନୀ ଉକ୍ତ ଝିଅ ହଂସିକା ଅଗ୍ରବାଲକୁ ' କାହିଁକି ମୋତେ ମିଛଟାରେ ଫସାଉଛୁ ? ' ଇତ୍ୟାଦି କହିଥିବା ସହ ଝିଅର ବାପ ତାଙ୍କ ଝିଅକୁ ବ୍ଲାକ୍ ମେଲିଂ କରାଯାଇଛି ବୋଲି କହୁଥିବା ମୃତ ନାବାଳକର ପିତା ପ୍ରମୋଦ ଜୈନ ଗଣମାଧ୍ୟମରେ ପ୍ରକାଶ କରିଛନ୍ତି । ଆହୁରି ମଧ୍ୟ ହଂସିକାଠାରୁ ଲଳିତ ଟଙ୍କା ନେଇ ଜଣେ ରାଜସ୍ଥାନୀ ଗୁପ୍ ଚୁପ୍ ବାଲାର ପୁଅ ଚନ୍ଦ୍ରପ୍ରକାଶ ଡଙ୍ଗୀକୁ ଦେଉଥିବା ଓ ଉକ୍ତଦିନ ତାଠାରୁ ମଧ୍ୟ ୨ ଲକ୍ଷ ଟଙ୍କା ସହ ଆହୁରି ୧ ଲକ୍ଷ ୩୦ ହଜାର ଟଙ୍କା ଫେରାଇବାକୁ ଏଗ୍ରିମେଣ୍ଟ ଲେଖାଇନିଆଯାଇଥିବା ପ୍ରକାଶ । ଅସମର୍ଥିତସୂତ୍ରରୁ ଅଦ୍ୟାବଧି ଏହି ଛାତ୍ରୀଙ୍କଠାରୁ ପ୍ରାୟ ୧୧ ଲକ୍ଷ ଟଙ୍କା ଥରଥର କରି ନିଆଯାଇଥିବା ଓ ତାହା ଇନଷ୍ଟାଗ୍ରାମ୍ ରେ ଫଲୋଅର୍ ବୃଦ୍ଧି କରାଇବାକୁ ଲଳିତ ଜରିଆରେ କେତେକ ପିଲା ନେଇଥିବା ଚର୍ଚ୍ଚା ହେଉଛି । 

ତେବେ ଏବେ ଭାଇରାଲ୍ ହୋଇଥିବା ଏକ ସୋସିଆଲ୍ ମିଡିଆର ୟୁ ଟ୍ୟୁବ୍ ଭିଡିଓ ଖବର ଅନୁଯାୟୀ , ମୃତ ଲଳିତ ଜୈନ , ଗୁପ୍ ଚୁପ୍ ବାଲାର ପୁଅ ଚନ୍ଦ୍ର ପ୍ରକାଶ ଡଙ୍ଗୀ ସହ ଆଉ ୩ ଜଣ ମୋଟ ୫ ଜଣ ନାବାଳକ ରାୟପୁରର ଜୟବାବା ନାମକ ଏକ ମୋବାଇଲ ଦୋକାନକୁ ଯାଇ ସେଠାରୁ ଲକ୍ଷ ଲକ୍ଷ ଟଙ୍କାର ଦାମୀ ମୋବାଇଲ୍ କିଣିଥିଲେ । ଦୋକାନର ସେଲ୍ସ ମ୍ୟାନ୍ ଯୁବକ ଜଣକ ତାଙ୍କ ବିକ୍ରିର ପ୍ରଚାର ପ୍ରସାର ନିମନ୍ତେ କରିଥିବା ଏହି ଭିଡିଓରେ ମୃତ ଲଳିତ ଓ ଚନ୍ଦ୍ର ପ୍ରକାଶ ଡଙ୍ଗୀ ତଳେ ବସି ହାତରେ ମୁହଁ ଘୋଡାଇଥିବାର ସ୍ପଷ୍ଟ ଫଟୋ ଦିଶୁଛି ! 

ଏଣୁ ଏହି ନାବାଳକ ହତ୍ୟା ଅଭିଯୋଗ ସହ ଆହୁରି ଅନେକ ରହସ୍ୟ ରହିଥିବା ଚର୍ଚ୍ଚା ହେଉଛି । କଣ୍ଟାବାଞ୍ଜି ସହରର ଧନୀମାନୀ , ରାଜନେତା ଓ ବଡ ଘରର ପିଲାମାନେ ଏଭଳି ତଥାକଥିତ ବ୍ଲାକ୍ ମେଲିଂ ରେ ଜଡିତ ଥିବାରୁ ଆରମ୍ଭରୁ ଏହାକୁ ଆତ୍ମହତ୍ୟା ବୋଲି  ଶବବ୍ୟବଚ୍ଛେଦକୁ ମଧ୍ୟ ଏଡାଇ  ଆସୁଥିବା ଜିଆରପି ଓ ପୁଲିସ୍ ଅଧିକାରୀଙ୍କ ହାତରେ ଏହାର ତଦନ୍ତଭାର ଦିଆଯାଇ ଏଥିରେ ବ୍ଲାକ୍ ଡିଲ୍ କରାଯାଥିବା ଅଭିଯୋଗକୁ ଗୁରୁତ୍ୱ ଦିଆଯାଉ ନଥିବା କୁହାଯାଉଛି ।

ଗୁରୁତର କଥାହେଲା , ଦଶମଶ୍ରେଣୀର ଉକ୍ତ ଛାତ୍ରୀଜଣକୁ କେଉଁମାନେ କେଉଁଥିପାଇଁ ବ୍ଲାକ୍ ମେଲିଂ କରୁଥିଲେ  ? ଯେଉଁମାନେ ରାୟପୁରକୁ ଦାମୀ ମୋବାଇଲ୍ କିଣିବାକୁ ଯାଇଥିବା ଭିଡିଓରେ ଭାଇରାଲ୍ ହେଉଛି , ସେମାନଙ୍କୁ ପୁଲିସ୍ ତଦନ୍ତର ପରିସରଭୁକ୍ତ କଲାଣି କି  ? ସର୍ବୋପରି କଣ୍ଟାବାଞ୍ଜି ବା ବଲାଙ୍ଗୀର ପୁଲିସ୍ ଏହାର ସଠିକ୍ ତଦନ୍ତ କରିପାରିବ କି  ? କାହିଁକି ପାଟିଖୋଲୁ ନାହାଁନ୍ତି ବିଧାୟକ , ବରିଷ୍ଠ ବିଜେଡି ନେତା ଓ ପୂର୍ବତନ ବିଧାୟକ , ଜିଲ୍ଲାର ଟାଣୁଆ ବିଧାୟକ ଓ ସାଂସଦ  ବୋଲି ଲୋକେ ଆଲୋଚନା କରୁଛନ୍ତି ।