02-Aug-2023

ବଲାଙ୍ଗୀର(ପ୍ରେରଣା ଖବର): ସହଜରେ ଓ ବିନା ଖର୍ଚ୍ଚରେ ଜରୁରୀ ଚିକିତ୍ସା ସୁବିଧା ଲକ୍ଷ୍ୟ ନେଇ ଜନସାଧାରଣ ବିଭିନ୍ନ କଂପାନୀକୁ ଭରଷା କରି ସ୍ୱାସ୍ଥ୍ୟ ବୀମା କରିଥାନ୍ତି । ତେବେ ଲୋକଙ୍କ ଅଜ୍ଞାନତାର ସୁଯୋଗ ନେଇ ବେଳେ ବେଳେ ଏହି କଂପାନୀ ମାନଙ୍କ ଶୋଷଣର ଶିକର ହୋଇଥାନ୍ତି ଗ୍ରାହକ ମାନେ । ଏପରି ଏକ ଅଭାବନୀୟ ଘଟଣା ଦେଖିବାକୁ ମିଳିଛି ବଲାଙ୍ଗୀର ଜିଲ୍ଲା ପାଟଣlଗଡ଼ ଅଂଚଳରେ । ବୀମା କଂପାନୀରେ ଇନ୍‌ସ୍ୟୁରେନ୍ସ କରି ମଧ୍ୟ ନିଃଶୁକ୍ଲ୍ଲ ସ୍ୱାସ୍ଥ୍ୟ ସେବାରୁ ବଂଚିତ ହୋଇଛନ୍ତି ଜଣେ ବ୍ୟକ୍ତି । ଏ ନେଇ ଚିକିତ୍ସା ଟଙ୍କା ଭରଣା ପାଇଁ ବୀମା କଂପାନୀକୁ ବାରମ୍ବାର ହାରିଗୁହାରୀ କଲା ପରେ ମଧ୍ୟ ଦୀର୍ଘ ମାସ ହେଲା ଏହି ବ୍ୟକ୍ତି ଜଣକ ବୀମା କଂପାନୀ ଠାରୁ ପ୍ରତିଶୃତି ନାଁ ରେ କେବଳ ପ୍ରତାରଣା ପାଇଛନ୍ତି ।

   ସୂଚନାରୁ ପ୍ରକାଶ ଯେ, ବଲାଙ୍ଗୀର ଜିଲ୍ଲା ପାଟଣାଗଡ଼ ବ୍ଲକ ଭଇଁଷା ଗ୍ରାମର ମୁକେଶ କୁମାର ଅଗ୍ରୱାଲ(୪୩) ନାମକ ଏହି ବ୍ୟକ୍ତି ଜଣକ ଗତ ୩୦.୦୯.୨୦୨୨ ରେ ଏକ ଅପରେସନ ପାଇଁ ବଲାଙ୍ଗୀର ସ୍ୱରାଜ ହସ୍ପିଟାଲରେ ଭର୍ତ୍ତି ହୋଇଥିଲେ । ମୁକେଶ ପେଶାରେ ଜଣେ ବ୍ୟବସାୟୀ ଅଟନ୍ତି ।

ଅପରେସନ ଓ ସମସ୍ତ ଚିକିତ୍ସା ବାବଦକୁ ସେ ମୋଟ୍ ୧ଲକ୍ଷ ୭ ହଜାର ଟଙ୍କା ଖର୍ଚ୍ଚ କରିଥିଲେ । ତେବେ ପାଟଣାଗଡ଼ ଡିସିବି ବ୍ୟାଙ୍କ ମାଧ୍ୟମରେ ରୋୟଲ ସୁନ୍ଦରମ୍ ନାମକ ଏକ ବୀମା କଂପାନରେ ସେ ହେଲ୍‌ଥ ଇନ୍‌ସ୍ୟୁରେନ୍ସ କରିଥିଲେ । ପ୍ରତିବର୍ଷ ଆବଶ୍ୟକ ପ୍ରିମିୟମ ରାଶି ମଧ୍ୟ ସେ ବୁଝାଇ ଆସୁଥିଲେ । ଏହି ହେଲ୍‌ଥ ଇନ୍‌ସ୍ୟୁରେନ୍ସ କାର୍ଡ ବଳରେ ମୁକେଶଙ୍କୁ ସ୍ୱରାଜ ହସ୍ପିଟାଲରେ ଅପରେସନ୍ ହେବା ପାଇଁ ଅନୁମତି ମଧ୍ୟ ମିଳିଥିଲା । ବୀମା କଂପାନୀର ଚୁକ୍ତିନାମା ମୁତାବକ ଚିକିତ୍ସା ସଂକ୍ରାନ୍ତୀୟ ସମସ୍ତ ଖର୍ଚ୍ଚ ଗ୍ରାହକଙ୍କ ପକେଟରୁ ନୁହେଁ ବୀମା କଂପାନୀ ତରଫରୁ ସଂପୃକ୍ତ ଡାକ୍ତରଖାନାକୁ ପଇଠ କରିବା କଥା । ତେବେ ଚକିତ୍ସା ସରିବା ପରେ ବୀମା କଂପାନୀ ଆଜି ପର୍ଯ୍ଯନ୍ତ 

 ଦୀର୍ଘ ୧୧ମାସ ହେଲା ମୁକେଶଙ୍କୁ ବିଭିନ୍ନ ଆଳରେ ଠକି ଚାଲଛି । ନିଜର ପ୍ରାପ୍ୟ ପାଇବା ପାଇଁ ମଧ୍ୟ ମୁକେଶଙ୍କୁ ରୋୟଲ ସୁନ୍ଦମ୍‌କୁ ଜୁହାରମୁଣ୍ଡିଆ ମାରିବାକୁ ପଡୁଛି । କେବଳ ସେତିକି ନୁହେଁ ବୀମା କଂପାନୀର ପାଟଣାଗଡ଼ ଏଜେଣ୍ଟ ମଧ୍ୟ ମୁକେଶ ଙ୍କୁ ଆଜି ଏଇ ଡୋକୁମେଣ୍ଟ ଦିଅ, କାଲି ସେଇ ଡୋକୁମେଣ୍ଟ ଦିଅ କହି ଦିନ ଗଡାଇ ଚାଲଛନ୍ତି । ଅନ୍ୟ ପଟରେ ବୀମା କଂପାନୀ ଓ ବୀମା କଂପାନୀର ଏଜେଣ୍ଟଙ୍କ ଦାଓପେଂଚରେ ବିଚରା ମୁକେଶ ଚିକତ୍ସା ବାବଦକୁ ଲକ୍ଷାଧିକ ଟଙ୍କା ଖଚ୍ଚ କରି ଏବେ ମାନସିକ ଦୁଶ୍ଚିନ୍ତା ମଧ୍ୟରେ ରହିଛନ୍ତି । ତେବେ ରୋୟଲ ସୁନ୍ଦରମ୍ ନାମକ ଏହି ବୀମା କଂପାନୀ ର ବିଶ୍ୱାସଘାତକତା କାମକୁ ମୁକେଶ ନିନ୍ଦା କରିବା ସହ ଆଗାମୀ ଦିନରେ ଚିକିତ୍ସା ଟଙ୍କା ନ ପାଇଲେ ବୀମା କଂପାନୀ ବିରୁଦ୍ଧରେ କୋର୍ଟର ଦ୍ୱାରସ୍ଥ ହେବେ ବୋଲି କଡା ଚେତାବନୀ ଦେଇଛନ୍ତି ।