02-Aug-2023

ଭୋଜପୁର (ସଂଜୀବ ପାଣିଗ୍ରାହୀ )
 ସମ୍ବଲପୁରର ଅଗ୍ରଣୀ  ସମ୍ବଲପୁରୀ ସାହିତ୍ୟାନୁଷ୍ଠାନ ସମ୍ବଲପୁରୀ ଲେଖକ ପରିଷଦ ଆନୁକୁଲ୍ୟରେ ଜମନକିରା ବ୍ଲକ ଭୋଜପୁର ସ୍ଥିତ ବିଛାଲାଲ ରାମଚନ୍ଦ୍ର ଗୁପ୍ତା ଉଚ୍ଚ ମାଧ୍ୟମିକ ବିଦ୍ୟାଳୟରେ ଗୁରୁ ସତ୍ୟନାରାୟଣ ବହିଦାରଙ୍କ ୧୦୮ତମ ଜୟନ୍ତୀ ତଥା ସମ୍ବଲପୁରୀ ଦିନ୍‌  ବିପୁଳ ଉତ୍ସାହ ଉଦ୍ଦିପନାରେ ହୋଇଯାଇଛି। ବିଦ୍ୟାଳୟର ଅଧ୍ୟକ୍ଷ ପ୍ରତାପ ମହାକୁଲଙ୍କ ପୌରୋହିତ୍ୟରେ ଆୟୋଜିତ ହୋଇଥିବା ଏହି ସଭାରେ ବିଶିଷ୍ଟ ଭାଷାବିଜ୍ଞାନୀ ଡ. ପିତାମ୍ବର ବେହେରା ଯୋଗଦେଇ ସମ୍ବଲପୁରୀ ଭାଷା ଉପରେ ସାଂସ୍କୃତିକ ପ୍ରଭୁତ୍ୱ ଉପରେ ବକ୍ତବ୍ୟ ରଖି କହିଲେ ଯେ ଓଡିଆ ଭାଷା ଯେପରି ବଙ୍ଗଳା ଭାଷାର ପ୍ରଭୁତ୍ୱ ବିରୁଦ୍ଧରେ ଯାଇ ଆନ୍ଦୋଳନର ପନ୍ଥା ଗ୍ରହଣ କରିଥିଲା ଆଜି ସମ୍ବଲପୁରୀ ଭାଷା ସକାଶେ ମଧ୍ଯ ସେଭଳି ଏକ ଭାଷା ଆନ୍ଦୋଳନର ସମୟ ଆସିଛି। ସେ ଅର୍ଥଗତ,ବ୍ୟାକରଣଗତ, ଉଚ୍ଚାରଣ ଓ ବ୍ୟବହାରଗତ ବିଭିନ୍ନ ଦିଗରୁ ସମ୍ବଲପୁରୀ ଭାଷାର ସ୍ୱାତନ୍ତ୍ର୍ୟ ଥିବା ଦର୍ଶାଇ ଏହି ଭାଷାରେ ବେଶିରୁ ବେଶି ସାହିତ୍ୟ ସୃଷ୍ଟି  ତଥା ବିବିଧ ଲେଖାମାନ ବ୍ୟବହାରିକ ଭବରେ ପ୍ରୟୋଗରେ ଆସିବା ଉଚିତ ବୋଲି ମତ ଦେଇଥିଲେ। ଲେଖକ ପରିଷଦର ସଭାପତି ମୁକ୍ତକଣ୍ଠ ପ୍ରଧାନ ସତ୍ୟନାରାୟଣ ବହିଦାରଙ୍କ ରଚନା ଶୈଳୀ ଉଚ୍ଚାଙ୍ଗ ଶବ୍ଦ ଗୁମ୍ଫନ ଉପରେ ଆଲୋଚନା କରିଥିବା ବେଳେ ସମ୍ପାଦକ ଦେବାର୍ଚ୍ଚନ ଠାକୁର ସତ୍ୟନାରାୟଣ ଗ୍ରନ୍ଥାବଳୀର ଦ୍ୱିତୀୟ ସଂସ୍କରଣ ଶିଘ୍ର ପ୍ରକାଶିତ ହେବା ନିହାତି ଜରୁରୀ ବୋଲି ତାଙ୍କ ଭାଷଣରେ ମତବ୍ୟକ୍ତ କରିଥିଲେ। ସହସମ୍ପାଦକ ଡ. ସିଦ୍ଧାର୍ଥ ପଣ୍ଡା ଭାଷା ସହ ସାଂସ୍କୃତିକ ସଂରକ୍ଷଣର ଆବଶ୍ୟକତା ଉପରେ ଆଲୋକପାତ କରିଥିଲେ। ଅଧ୍ୟାପକ ଜନ୍ମେଜୟ କୁମୁରା ସଭା ସଂଯୋଜନା କରିଥିବା ବେଳେ ଅଧ୍ୟାପିକା ଅନିତା ପଟେଲ ଧନ୍ୟବାଦ ଅର୍ପଣ କରିଥିଲେ। ଅଧ୍ୟାପିକା ସୁହାସିନୀ ଶତପଥି ସମ୍ବଲପୁରୀ ଗୀତ ପରିବେଷଣ କରିଥିବା ବେଳେ ଛାତ୍ରଛାତ୍ରୀମାନେ ମଧ୍ୟ ସମ୍ବଲପୁରୀ ନୃତ୍ଯ ଓ ଗୀତର ଆସର ଜମାଇ ଦେଇଥିଲେ।ଏହି କାର୍ଯ୍ୟକ୍ରମରେ ମହାବିଦ୍ୟାଳୟର ଶତାଧିକ ଛାତ୍ରଛାତ୍ରୀଙ୍କ ସମେତ ସୁନୀଲ କୁମାର ନାଏକ,ଉପମା ମହାପାତ୍ର ପ୍ରମୁଖ ଅଂଚଳର ବହୁ ମାନ୍ୟଗଣ୍ୟ ଶିକ୍ଷାପ୍ରେମି ଯୋଗ ଦେଇଥିଲେ।