30-Jul-2023

ବରଗଡ଼: ଗୋଦରେଜ ଆଗ୍ରୋଭେଟ ଲିମିଟେଡ଼ ଏବଂ ଉଦ୍ୟାନ ବିଭାଗ ବରଗଡର ମିଳିତ ସହଯୋଗରେ ସୋହେଲା ବ୍ଲକ ଅନ୍ତର୍ଗତ ଅର୍ଜୁଣ୍ଡା ଗ୍ରାମରେ ଜିଲ୍ଲାସ୍ତରୀୟ ମେଗା ଅଏଲ ପାମ ପ୍ଲାଣ୍ଟେସନ ଡ୍ରାଇଭ ଅନୁଷ୍ଠିତ ହୋଇଥିଲା । ମୁଖ୍ୟ ଅତିଥି ରୂପେ ଜିଲ୍ଲା ପରିଷଦ ଅଧ୍ୟକ୍ଷା ଶ୍ରୀମତୀ ମାନିନୀ ଭୋଇ ଯୋଗଦେଇ ଏହି କାର୍ଯ୍ୟକ୍ରମକୁ ଉଦ୍ଘାଟନ କରିଥିଲେ । ଅନ୍ୟ ଅତିଥିମାନଙ୍କ ମଧ୍ୟରେ ସୋହେଲା ଗୋଷ୍ଠୀ ଉନ୍ନୟନ ଅଧିକାରୀ ଶ୍ରୀ ବିଶ୍ୱରଞ୍ଜନ କର,ଗୋଦରେଜ ଆଗ୍ରୋଭେଟ ଲିମିଟେଡ଼ର ଜେନେରାଲ ମ୍ୟାନେଜର ଶ୍ରୀ ସଙ୍କଳେଶ୍ୱର ମହାନ୍ତି, ସହକାରୀ ବନ ସଂରକ୍ଷକ, ବରଗଡ ଶ୍ରୀ ରାଜେନ୍ଦ୍ର ଗୋଛାୟତ,ସହକାରୀ ଉଦ୍ୟାନ କୃଷି ନିର୍ଦେଶକ, ବରଗଡ ଶ୍ରୀ ଗୋବିନ୍ଦ ଚନ୍ଦ୍ର ପଣ୍ଡା, ସହକାରୀ ଉଦ୍ୟାନ କୃଷି ନିର୍ଦେଶକ, ପଦ୍ମପୁର ଶ୍ରୀ ଗୋବିନ୍ଦ ପଧାନ,  ଗୋଦରେଜ ଆଗ୍ରୋଭେଟ ଲିମିଟେଡ଼ର ଉନ୍ନୟନ ଅଧିକାରୀ ଶ୍ରୀ ସୁବାସ କୁମାର ଜେନା ଯୋଗ ଦେଇଥିଲେ ।
କେନ୍ଦ୍ର ସରକାର ଓ ରାଜ୍ୟ ସରକାରଙ୍କ ମିଳିତ ଉଦ୍ୟମରେ ଜାତୀୟ ଖାଦ୍ୟତେଲ ମିଶନ- ଅଏଲ ପାମ(NMEO-OP) ଯୋଜନାରେ ରାଜ୍ୟର ବିଭିନ୍ନ ଜିଲ୍ଲାରେ ଅଏଲ ପାମ ବହୁଳ ଭାବେ ଚାଷ କରାଯାଉଛି । ଏହି ଯୋଜନାରେ ଚାଷୀମାନଙ୍କୁ ମାଗଣାରେ ଚାରା ଏବଂ ରକ୍ଷଣାବେକ୍ଷଣ ପାଇଁ ସରକାରଙ୍କ ତରଫରୁ ସହାୟତା ଯୋଗାଇ ଦିଆଯାଉଛି । ଅଏଲ ପାମ ଏକ ଅର୍ଥକାରୀ ଏବଂ ବହୁବାର୍ଷିକ ଫସଲ ହୋଇଥିବାରୁ ବରଗଡ ଜିଲ୍ଲାରେ ବହୁଳ ମାତ୍ରାରେ ଚାଷ କରିବା ପାଇଁ ଅତିଥିମାନେ ଚାଷୀମାନଙ୍କୁ ଆହ୍ୱାନ ଦେଇଥିଲେ ।ଏହି କାର୍ଯ୍ୟକ୍ରମରେ ବରଗଡ଼ ଜିଲ୍ଲାର ସମସ୍ତ ବ୍ଲକରୁ ପାଖାପାଖି ୩୦୦ ଚାଷୀ ଯୋଗଦେଇଥିଲେ ।ଏଠାରେ ଏକ ଅଏଲ ପାମ ଚାଷ ସମନ୍ଧିୟ ପଦର୍ଶନୀ ଷ୍ଟଲ ଖୋଲାଯାଇଥିଲା । ସମସ୍ତ ଅତିଥିମାନେ ନିଜ ହାତରେ ଗୋଟିଏ ଗୋଟିଏ ଅଏଲ ପାମ ଚାରା ରୋପଣ କରିଥିଲେ ।ଗୋଦରେଜ ଆଗ୍ରୋଭେଟର

ଜେନେରାଲ ମ୍ୟାନେଜର ଚାଷୀମାନଙ୍କ ପାଇଁ ଷ୍ଟେଟ ବ୍ୟାଙ୍କ ଅଫ ଇଣ୍ଡିଆ ମାଧ୍ୟମରେ ଋଣ ବ୍ୟବସ୍ଥା ଏବଂ ସୋହେଲା ଠାରେ ଏକ ମିନି ସମାଧାନ କେନ୍ଦ୍ର ପ୍ରତିଷ୍ଠା କରିବା ପାଇଁ ଘୋଷଣା କରିଛନ୍ତି। ଯେଉଁଠାରେ ଚାଷୀମାନଙ୍କର ଅଏଲ ପାମ ଚାଷ ସମଧିୟ ସମସ୍ତ ପ୍ରକାର ସୁବିଧା ମିଳିପାରିବା ସହିତ ସେଠାରେ ଏକ ଫଳ ସଂଗ୍ରହ କେନ୍ଦ୍ର ରହିବ ।ଏହି କାର୍ଯ୍ୟକ୍ରମରେ ସୁବାସ କୁମାର ଜେନା ସ୍ୱାଗତ ଭାଷଣ ଦେଇଥିବା ବେଳେ, ଗୋବିନ୍ଦ ଚନ୍ଦ୍ର ପଣ୍ଡା ଏହି ମେଗା କାର୍ଯ୍ୟକ୍ରମକୁ ପରିଚାଳନା କରିଥିଲେ । ଉଦ୍ୟାନ ବିଭାଗ ଏବଂ ଗୋଦରେଜ ଆଗ୍ରୋଭେଟର ସମସ୍ତ ଅଧିକାରୀ ଏବଂ କର୍ମଚାରୀ ଉପସ୍ଥିତ ରହି କାର୍ଯ୍ୟକ୍ରମକୁ ସଫଳ କରିଥିଲେ ।