30-Jul-2023

ବଲାଙ୍ଗୀର, ବଲାଙ୍ଗୀର ଏକ ଶିଳ୍ପବିହୀନ ଜିଲ୍ଲା, ଅତୀତରେ ଏଠାରେ ଥିବା ବିଭିନ୍ନ ଅନୁଷ୍ଠାନ ସ୍ଥାନାନ୍ତରଣ କିମ୍ବା ସମୟକ୍ରମେ ଲୋପ ପାଇ ଯାଇଛି । ଏଠାରେ କୃଷିଭିତ୍ତିକ ଏକ ଶିଳ୍ପ କାରଖାନା ତଥା ଚିନି କଳର ପୁନଃରୁଦ୍ଧାର କରିବା ପାଇଁ ନାଗରିକ କମିଟି ତରଫରୁ ଦାବି କରାଯାଇଛି । ସ୍ଥାନୀୟ ଜେଏସ୍‌ଏମ୍ ମହାବିଦ୍ୟାଳୟ ଠାରେ ଅନୁଷ୍ଠିତ ନାଗରିକ କମିଟିର କାର୍ଯ୍ୟକାରୀ ସମିତିର ବୈଠକରେ ଏହା ମତପ୍ରକାଶ ପାଇଛି ।  ସଭାପତି ଇଂ ବେଲାରସିଂ ଭୋଇଙ୍କ ସଭାପତିତ୍ୱରେ ସାଧାରଣ ସଂପାଦକ ମନୋରଂଜନ ସାହୁ ବିଭିନ୍ନ ପ୍ରସ୍ତାବ ଆଗତ କରି ବୈଠକକୁ ପରିଚାଳନା କରିଥିଲେ । ବଲାଙ୍ଗୀରରେ ଅଧିକମାତ୍ରାରେ କପା ଚାଷ ହେଉଥିବାରୁ ଏଠାରେ ଏକ ଲୁଗା କାରଖାନା ଓ ଟେକ୍ସଟାଇଲ ଇଂଜିନିୟରିଂ  ପ୍ରତିଷ୍ଠା ହେଲେ ଦାଦନ ସମସ୍ୟାର ସମାଧାନ ହୋଇପାରିବ ବୋଲି ଆଲୋଚନା ହୋଇଥିଲା । ବଲାଙ୍ଗିର କୁ ସରକାର କ୍ରମାଗତ ଭାବେ ଅବହେଳା କରାଯାଇଥିବାରୁ ସମ୍ପାଦକ ଶ୍ରୀ ସାହୁ ବୈଠକରେ କ୍ଷୋଭ ପ୍ରକାଶ କରିଥିଲେ l

ସେହିପରି ପୌରସଂସ୍ଥାର ଅଧ୍ୟକ୍ଷା ଓ କାର୍ଯ୍ୟନିର୍ବାହୀ ଅଧିକାରୀଙ୍କ ସହ କମିଟିର ପ୍ରତିନିଧି ଦଳର ଆଲୋଚନା ପରେ, ପୌର ସଂସ୍ଥା କିଛି ପଦକ୍ଷେପ ନେଇଥିବାରୁ ବୈଠକରେ ସନ୍ତୋଷ ପ୍ରକାଶ ପାଇଥିଲା । ଆଲୋଚନାରେ ଉପସଭାପତି ନିତ୍ୟାନନ୍ଦ ମିଶ୍ର, ଗଜେନ୍ଦ୍ର ଭ୍ରମର, ଗୋପଭୂଷଣ ନାଥ, ଜୟରାମ ମିଶ୍ର, ମନୋରଂଜନ ପୁରୋହିତ, ବିମଳ ଚୋପଦାର, ଧର୍ମବ୍ରତ ରଥ, ଦିବାକର ହୋତା, ଗୋପବନ୍ଧୁ ପୁରୋହିତ ଓ ପଙ୍କଜିନୀ ପଣ୍ଡା ପ୍ରମୁଖ ଆଲୋଚନାରେ ଅଂଶଗ୍ରହଣ କରିଥିବା ବେଳେ ସହସଂପାଦକ ଚକ୍ରପାଣି ଦାଶ ଧନ୍ୟବାଦ ଅର୍ପଣ କରିଥିଲେ ।