24-Jul-2023

ବଲାଙ୍ଗୀର(ଦେବାଶିଷ ବହିଦାର)-ବଲାଙ୍ଗୀର ଜିଲ୍ଲାରେ ଲୋୟରସୁକତେଲ ବୁଡିଅଞ୍ଚଳରେ ବିସ୍ଥାପିତଙ୍କୁ ଉଚିତ ନ୍ୟାୟ ମିଳୁନାହିଁ । ଗଢଶଙ୍କରଡୁଙ୍ଗୁରିପାଲି ବିସ୍ଥାପିତ ପରିବାରଙ୍କ ପାନୀୟଜଳ ଓ ବିଦ୍ୟୁତ ସଂଯୋଗ କାଟିଦିଆଯାଇଛି । ସେଠାରେ ସେମାନଙ୍କ ମାନବାଧିକାରର ଉଲଂଘନ ହେଉଛି ବୋଲି ଅଭିଯୋଗ ହେଲାପରେ ବିଶିଷ୍ଟ ପରିବେଶବିଦ ତଥା ଲୋକଶକ୍ତି ଅଭିଯାନର ସଭାପତି ପ୍ରଫୁଲ୍ଲ ସାମନ୍ତରା ଆଜି ଏହି ଅଞ୍ଚଳକୁ ଗସ୍ତକରି ପରିସ୍ଥିତିର ଅନୁଧ୍ୟାନ କରିବାର କାର୍ଯ୍ୟକ୍ରମ ଥିଲା । କିନ୍ତୁ ପ୍ରଶାସନ ଚାଲାକି କରି କିଛିଲୋକଙ୍କୁ ପଠାଇ ତାଙ୍କୁ ବାରଣ କରାଗଲା ତେଣୁ ସେ ବଲାଙ୍ଗୀର ରେଳ ଷ୍ଟେସନରୁ ଫେରିଯାଇଥିବା ସୂଚନା ଦେଇଛନ୍ତି । ଶ୍ରୀ ସାମନ୍ତରା ଏକ ପ୍ରେସ ବିବୃତି ଜରିଆରେ କହିଛନ୍ତି ଯେ,ସେ ଟ୍ରେନରେ ବଲାଙ୍ଗୀର ଆସିବା ପୂର୍ବରୁ ତାଙ୍କ ସାଙ୍ଗରେ ଲୋୟରସୁକତେଲ ବୁଡିଅଞ୍ଚଂଳକୁ ଯିବାକୁ ଥିବା ବଙ୍ଗୋମୁଣ୍ଡାର ସାମାଜିକକର୍ମି ରାଜୀବ ସଗରିଆଙ୍କୁ ପାଟଣାଗଡ ପୋଲିସ ଓ ବୁଡିଅଞ୍ଚଳର ସତ୍ୟ ବନଛୋରଙ୍କୁ ବଲାଙ୍ଗୀର ପୋଲିସ ଅଟକ ରଖିଥିଲା । ସେ ବଲାଙ୍ଗୀର ରେଳ ଷ୍ଟେସନରେ ପହଞ୍ଚିଲା ପରେ କିଛି ଅଜଣା ଯୁବକ ଲୋୟରସୁକତେଲ ବିସ୍ଥାପିତ ଲୋକ କହି ତାଙ୍କୁ ଫୁଲତୋଡା ଦେଇ ସ୍ୱାଗତ କରିଥିଲେ ଓ କହିଥିଲେ କି ବୁଡିଅଞ୍ଚଳରେ ପ୍ରଶାସନ ବିସ୍ଥାପିତଙ୍କୁ ଠିକରେ ଥଇଥାନ କରାଉଛି । ସେ ସେଠିକି ନଯାଆନ୍ତୁ ବୋଲି ବାରଣ କରିଥିଲେ । ବିସ୍ଥାପିତ ନାମରେ ଫୁଲତୋଡା ଦେଇଥିବା ଯୁବକମାନଙ୍କୁ  ସେ ଚିହ୍ନିନଥିଲେ କିମ୍ବା ଜାଣିନଥିଲେ । ବିସ୍ଥାପିତଙ୍କୁ ଠିକରେ ନ୍ୟାୟ ମିଳୁନଥିବା ନେଇ ଗଣମାଧ୍ୟମରେ ପ୍ରକାଶିତ ଓ ପ୍ରଶାରିତ ଖବର କଣ ମିଛ କି ବୋଲି ପ୍ରଶ୍ନ କଲେ ସେମାନେ ତାହାକୁ ଆଡେଇ ଯାଉଥିଲେ ଓ କେବଳ ବୁଡିଅଞ୍ଚଳକୁ ନଯିବାକୁ ଯିଦ କରୁଥିଲେ । ସେମାନେ ତାଙ୍କୁ  କୌଣସି ଖରାପ ବ୍ୟବହାର ପ୍ରଦର୍ଶନ କରିନଥିଲେ ହେଁ ତାଙ୍କ କଥାବାର୍ତ୍ତା ଓ ବାରଣରୁ ଜଣାପଡୁଥିଲା ଯେ, ସେମାନେ ପ୍ରଶାସନ ପ୍ରାୟୋଜିତ ଲୋକମାନେଥିଲେ । ତେଣୁ ସେମାନଙ୍କ ସହିତ ଅପ୍ରିତିକର ପରିସ୍ଥିତି ସୃଷ୍ଟିନକରି ଫେରି ଯାଉଛି ,କିନ୍ତୁ ବିସ୍ଥାପିତଙ୍କ ନ୍ୟାୟ ପାଇଁ ଲଢେଇ ଚାଲୁରହିବ ବୋଲି ପ୍ରଫୁଲ୍ଲ ସାମନ୍ତରା ଗଣମାଧ୍ୟମ ପ୍ରତିନିଧିମାନଙ୍କୁ ଦେଇଥିବା ଏକ ପ୍ରେସ ବିବୃତିରେ ଜଣାଇଛନ୍ତି । ପ୍ରଫୁଲ୍ଲ ସାମନ୍ତରା ଆଜିର ଘଟଣାପରେ ପ୍ରଶ୍ନ କରିଛନ୍ତି ଯେ, ଯଦି ବିସ୍ଥାପିତଙ୍କୁ ଠିକରେ ପ୍ରଶାସନ କ୍ଷତିପୂରଣ ଦେଉଛି ଓ ଥଇଥାନ କରୁଛି ତାହେଲେ ବୁଡିଅଞ୍ଚଳକୁ ଲୋକଲଗାଇ ବାରଣ କରାଯାଉଛି କାହିଁକି? ପ୍ରଶାସନ ନିଶ୍ଚୟ କିଛି ଲୁଚାଇବାକୁ ଚେଷ୍ଟା କରୁଛି ବୋଲି କହିଛନ୍ତି ।  ପ୍ରକାଶ୍ୟ ଯେ,କିଛିବର୍ଷ ପୂର୍ବରୁ ଡେମକାମ ଚାଲିଥିବା ବେଳେ ସାମାଜିକ କର୍ମୀ ପ୍ରଫୁଲ୍ଲ ସାମନ୍ତରା ଓ ଲିଙ୍ଗରାଜଙ୍କୁ ଥରେ ବଲାଙ୍ଗୀର ରେଳ ଷ୍ଟେସନରେ କିଛି ପ୍ରକଲ୍ପ ସପକ୍ଷବାଦୀମାନେ  ଦୁର୍ବ୍ୟବହାର ପ୍ରଦର୍ଶନ କରି ବଲାଙ୍ଗୀର ନ ଆସିବାକୁ ଧମକ ମଧ୍ୟ ଦେଇଥିଲେ ।