19-May-2023

ବଲାଙ୍ଗୀର(ପ୍ରେରଣା ଖବର)- ବଲାଙ୍ଗୀର ଖୋର୍ଦ୍ଧା-ରେଳପଥରେ ଆଉଟିକିଏ ଆଗକୁ ଗଡିଛି ଟ୍ରେନ l ଗତକାଲି ପ୍ରଧାନମନ୍ତ୍ରୀ ନରେନ୍ଦ୍ର ମୋଦୀ ପୁରୀରୁ ହାୱାର୍ଡକୁ ବନ୍ଦେ ଭାରତ ଏକ୍ସପ୍ରେସ ଟ୍ରେନର ଶୁଭାରମ୍ଭ କରିବା ସହିତ ବଲାଙ୍ଗୀର-ଖୋର୍ଦ୍ଧାରୋଡର ବିଛୁପାଲିରୁ ଝାରତରଭା ପର୍ଯ୍ୟନ୍ତ ରେଳଲାଇନର ଭର୍ଚୁଆଲ ମାଧ୍ୟମରେ ଉଦଘାଟନ କରିଛନ୍ତି । ଏଣିକି ବଲାଙ୍ଗୀରଠାରୁ ତରଭା ନିକଟସ୍ଥ ଝାରତରଭା ପର୍ଯ୍ୟନ୍ତ ପାସେଞ୍ଜର ଟ୍ରେନ ଗଡିବ । ସେହିପରି ଟିଟିଲାଗଡରୁ ସମ୍ବଲପୁରକୁ ହୋଇଥିବା ଡବଲଲେନ ରେଳଲାଇନକୁ ଉଦଘାଟନ କରିଥିଲେ । ଗତକାଲି ବଲାଙ୍ଗୀର ଓ ବିଛୁପାଲି ରେଳ ଷ୍ଟେସନଠାରେ ସେଥିପାଇଁ ସ୍ୱତନ୍ତ୍ର କାର୍ଯ୍ୟକ୍ରମ ଅନୁଷ୍ଠିତ ହୋଇଥିଲା । ବଲାଙ୍ଗୀର ଷ୍ଟେସନଠାରେ ଆୟୋଜିତ କାର୍ଯ୍ୟକ୍ରମରେ ସମ୍ବଲପୁର ଡିଆରଏମଙ୍କ ସଭାପତିତ୍ୱରେ ଅନୁଷ୍ଠିତ ସଭାରେ ମୁଖ୍ୟଅତିଥି ଭାବରେ ବଲାଙ୍ଗୀର ଲୋକସଭା ସାଂସଦ ସଂଗୀତା କୁମାରୀ ସିଂଦେଓ ଓ ସମ୍ମାନୀତ ଅତିଥି ଭାବରେ ରାଜ୍ୟସଭା ସାଂସାଦ ନୀରଞ୍ଜନ ବିଶି ଯୋଗଦେଇଥିଲେ । ଉଭୟ ସାଂସଦ ଓଡିଶାରେ ଆରମ୍ଭ ହୋଇଥିବା ବନ୍ଦେଭାରତ ଟ୍ରେନକୁ ସ୍ୱାଗତ କରିଥିଲେ । ସାଂସଦ ନିରଂଜନ ବିଶି ତାଙ୍କ ବକ୍ତବ୍ୟରେ ବଲାଙ୍ଗୀର ଜିଲ୍ଲାର ଲୋକଙ୍କ ପାଇଁ ପ୍ରୟାଗରାଜକୁ ଯିବାକୁ ତଥା ବଲାଙ୍ଗୀରରୁ ଦିଲ୍ଲୀକୁ ସିଧାସଳଖ ଟ୍ରେନଚଳାଚଳ କରାଇବା,ବଲାଙ୍ଗୀର-ନୂଆପଡା ଭାୟା ପାଟଣାଗଡ ନୂଆରେଳପଥକୁ ଆରମ୍ଭ କରିବା ଇତ୍ୟାଦି ଦାବିଗୁଡିକୁ ନେଇ ରେଳମନ୍ତ୍ରୀଙ୍କୁ ଦାବିପତ୍ର ଦେଇ ଆଲୋଚନା କରିଥିବା କହିଥିଲେ । ସେହିପରି ଲୋକସଭା ସାଂସଦ୍ ଶ୍ରମତୀ ସିଂଦେଓ ତାଙ୍କ ବକ୍ତବ୍ୟରେ ଟିଟିଲାଗଡ-ସମ୍ବଲପୁର ରେଳପଥ ଦୋହରୀକରଣ ଓ ବିଦ୍ୟୁତିକରଣ ଫଳରେ ଯାତ୍ରୀଙ୍କ ପାଇଁ ବହୁତ ସୁବିଧା ହୋଇଛି । ବଲାଙ୍ଗୀର, ଟିଟିଲାଗଡ, କଣ୍ଟାବାଞ୍ଜି ଓ ହରିଶଙ୍କରରୋଡକୁ  ବିଶ୍ୱସ୍ତରୀୟ ରେଳ ଷ୍ଟେସନ କରିବାକୁ କାମ ଆରମ୍ଭ ହୋଇଥିବା ବିଷୟରେ କହିଥିଲେ । ଠିକ ସେହିପରି ଖୋର୍ଦ୍ଧା-ବଲାଙ୍ଗୀର ରେଳପଥରେ ଦୁନକୁ ଦିନ ଆଗକୁ ଆଗକୁ ଟ୍ରେନ ଗଡିଚାଲିଛି । ଖୁବ ଶୀଘ୍ର ଏହି ପ୍ରକଲ୍ପରେ ଲୋକମାନେ ଲାଭାନ୍ୱିତ ହେବେ ବୋଲି ସେ କହିଥିଲେ । କାର୍ଯ୍ୟକ୍ରମକୁ ଉଦଘୋଷିକା ଐଶ୍ୱର୍ଯ୍ୟା ଦାସ ସଂଯୋଜନା କରିଥିଲେ । ଏହି କାର୍ଯ୍ୟକ୍ରମରେ ରେଳବିଭାଗର ସମସ୍ତ କର୍ମଚାରୀ,ବଲାଙ୍ଗୀର ସହରର ବୁଦ୍ଧିଜୀବୀ ଓ ଗଣମାଧ୍ୟମ ପ୍ରତିନିଧିମାନେ ଯୋଗଦେଇଥିଲେ । ଡିଜିଟାଲ ମାଧ୍ୟମରେ ପ୍ରଧାନମନ୍ତ୍ରୀଙ୍କ କାର୍ଯ୍ୟକ୍ରମକୁ ଦର୍ଶକମାନେ  ଦେଖିଥିଲେ ।