10-May-2023

ପାଟଣାଗଡ଼(ଦିଲୀପ ପଣ୍ଡା ): ପାଟଣାଗଡ଼ ବ୍ଲକ ଭଇଁଷା ପଞ୍ଚାୟତ ବାସୀଙ୍କୁ ଗତବର୍ଷ ଗ୍ରୀଷ୍ମଋତୁରେ ଦିଆଯାଇଥିବା ପାଣିର ବକେୟା ଟଙ୍କା ଟ୍ରାକ୍ଟର ମାଲିକ ମାନେ ଏଜାଏଁ ପାଇନଥିଲେ । ଯାହାକୁନେଇ ଆଜି ସେମାନେ ପଞ୍ଚାୟତ ପିଇଓ ଙ୍କୁ ତାଲାଦେଇ ଅଟକ ରଖିଥିଲେ । ବିଡିଓ ସୁମନ୍ତ କୁମ୍ଭାର ଙ୍କ ପ୍ରତିଶ୍ରୁତି ପରେ ଟ୍ରାକ୍ଟର ମାଲିକ ମାନେ ତାଲାଖୋଲି ପିଇଓ ଙ୍କୁ ଛାଡିଦେଇଥିବା ଜଣାପଡିଛି । ସୁଚନା ଅନୁସାରେ ଭଇଁଷା ପଞ୍ଚାୟତ ବାସୀଙ୍କୁ ଗତବର୍ଷ ପାଣିଜୋଗାଇ ଦେବାପାଇଁ ଜିପିଡିପି ଏକସନପ୍ଲାନ ହିସାବରେ  ୧ ଲକ୍ଷ ୩୯ ହଜାର ୫ ଶହ ଟଙ୍କାର ଅନୁଦାନ ରାଶିଥିଲା । କିନ୍ତୁ ପଞ୍ଚାୟତ ବାସୀଙ୍କ ଆବଶ୍ୟକ ଅନୁଜାଇ ଗତବର୍ଷ ଅନୁଦାନ ରାଶିରୁ ପ୍ରାୟ ୨ ଲକ୍ଷରୁ ଅଧିକ ଟଙ୍କା ପାଣି ସେମାନଙ୍କୁ ଯୋଗାଇ ଦିଆଯାଇଥିଲା   । ତତ୍ କାଳୀନ ପିଇଓ ମନୋରଞ୍ଜନ ଖମାରୀ, ତତ୍ କାଳୀନ ବିଡ଼ିଓ ନୀଲମାଧବ ସୁନାକୁ ଏସମ୍ପର୍କରେ ଲିଖିତ ଭାବରେ ଅବଗତ ମଧ୍ୟ କରାଇଥିଲେ ।  ବ୍ଲକ ପ୍ରଶାସନ ଅବଗତ ସ୍ବତ୍ବେ ମଧ୍ୟ ପାଖାପାଖି ୧ ବର୍ଷହେବ ୬ ଗୋଟି ଟ୍ରାକ୍ଟର ମାଲିକ ସେମାନଙ୍କର ପ୍ରାପ୍ୟଟଙ୍କା ଏଜାଏଁ ପାଇନଥିଲେ । ଯାହାକୁନେଇ ସେମାନେ ନୂତନ ଭାବରେ ଯୋଗଦେଇଥିବା ବିଡ଼ିଓ ସୁମନ୍ତ କୁମ୍ଭାର ଓ ପିଇଓ ଦୁଃଖିତ ବାଗ ଙ୍କୁ ଅବଗତ ମଧ୍ୟ କରାଇଥିଲେ । ବ୍ଲକ ପ୍ରଶାସନ ଏସଂକ୍ରାନ୍ତରେ ଅନୁଦାନ ରାଶି ଠାରୁ ଅଧିକ ଟଙ୍କା ଆସିଲାପରେ ସେମାନଙ୍କୁ ତାଙ୍କ ପ୍ରାପ୍ୟରାଶି ଦେବାପାଇଁ ଦିନ ଗଡାଇ ଚାଲିଥିଲେ । ଆଜି ସକାଳ ୮ ଟା ୩୦ ସମୟରେ ଶସିଭୁଷଣ ସାହୁ ଙ୍କ ନେତୃତ୍ବରେ ୬ ଜଣ ଟ୍ରାକ୍ଟର ମାଲିକ ପିଇଓ ଵାର୍ଦ୍ଧକ୍ୟ ଭର୍ତ୍ତା ଟଙ୍କା ବାଣ୍ଟିବା ସମୟରେ ତାଙ୍କୁ ତାଲା ପକାଇଦେଇ ପ୍ରାୟ ୨ ଘଣ୍ଟା ପର୍ଯ୍ୟନ୍ତ ଅଟକରଖି ନିଜଜିତରେ ଅଡିବସିଥିଲେ । ପିଇଓ ଘଟଣା ସମ୍ପର୍କରେ ବିଡ଼ିଓ ଙ୍କୁ ଅବଗତ ପରେ କନିଷ୍ଠ ଯନ୍ତ୍ରୀ ପ୍ରଭାତ କୁମାର ସେଠୀ ଘଟଣା ସ୍ଥଳରେ ପହଞ୍ଚି ଟ୍ରାକ୍ଟର ମାଲିକ ମାନଙ୍କୁ ବୁଝାସୁଝା ସହ ବକେୟା ଟଙ୍କା ଦେବାର ପ୍ରତିଶୃତିପରେ ଟ୍ରାକ୍ଟର ମାଲିକ ମାନେ ପିଇଓ ଙ୍କୁ ତାଲା ଖୋଲି ଛାଡିଦେଇଥିବା ସହ ସେମାନଙ୍କୁ ଦିନେଦୁଇଦିନ ଭିତରେ ତାଙ୍କ ପ୍ରାପ୍ୟରାଶି ଦିଆଯିବବୋଲି ବିଡ଼ିଓ ଶ୍ରୀ କୁମ୍ଭାର ଙ୍କ ଠାରୁ ଜଣାପଡିଛି  ।