10-May-2023

ବଲାଙ୍ଗୀର (ପ୍ରେରଣା ଖବର ): ବଲାଙ୍ଗୀର ଜିଲ୍ଲା ସଦର ମହକୁମାଠାରୁ ପ୍ରାୟ ୫୦ କିମି ଦୂରତା ରେ ଆଗଲପୁର ଅବସ୍ଥିତ। ଦେଶ ସ୍ବାଧୀନତା ହେବା ଠାରୁ ଗୋଟାଏ ଅନୁନ୍ନତ ବ୍ଳକ୍ ଭାବରେ ପରିଚିତ ରହି ଆସୁଥିଲା। ଜିଲ୍ଳା ର ଲୋକଙ୍କ ପାଇଁ ଗୋଟାଏ ଢଗ ହୋଇ ରହିଥିଲା 'ଯଦି ଯିବୁ ଆଗଲପୁର ଥରିଥିବୁ ଚୁଡା ଗୁଡ '।କିନ୍ତୁ ତାହା ଏବେ ଭୁଲ୍ ପ୍ରମାଣିତ ହୋଇ ସାରିଲାଣି। ରାଜ୍ୟରେ ସରକାର ବଦଳିଳା। ବିଜେଡି ସରକାର ଆସୁ ଆସୁ ବହୁ ଦିନରୁ ଏଠିକାର ଲୋକଙ୍କ ପାଇଁ ଏକ ସ୍ବପ୍ନ ସାକାର ହେଲା। ମୂଖ୍ୟମନ୍ତ୍ରୀ  ନବୀନ ବାବୁ ଏକ ନିର୍ବାଚନୀ ସଭାକୁ ଆସିଥିବା ସମୟରେ ଅଙ୍ଗ ନଦୀ ଉପରେ ଏକ ବିରାଟ ପୋଲ ନିର୍ମାଣ କରିବା ପାଇଁ ପ୍ରତିଶୃତି ଦେଲେ। ସେହି ପୋଲ ନିର୍ମାଣ ରେ ଅବଶ୍ୟ ସ୍ଥାନୀୟ ତତ୍କାଳୀନ ସରପଞ୍ଚ ଓ ଯୁବ ଇଂଜିନିୟର୍ସ ଶ୍ରୀ ନାୟକ ବାବୁଙ୍କ ପ୍ରଚେଷ୍ଟା ମଧ୍ୟ ରହିଛି। ପୋଲ ନିର୍ମାଣ ହେବା ପରେ ଆସ୍ତେ ଆସ୍ତେ ଆଗଲପୁର ବିକାଶ ହେବାରେ ଲାଗିଲା। ପରବର୍ତ୍ତୀ ସମୟରେ ଭରସୁଜା ଦେଇ ଯାଇଥିବା ଆଗଲପୁର ରାସ୍ତା ଉପରେ ପୁଣି ଅଙ୍ଗ ନଦୀ ଉପରେ ଏକ ବିରାଟ ପୋଲ ନିର୍ମାଣ ହେଲା। ଏଇ କିଛି ମାସ ହେବ ସେହି ପୋଲ ଉଦ୍‌ଘାଟନ ହୋଇ ଲୋକେ ଯିବା ଆସିବା କରିବାର ସୁବିଧା ପାଇଲେ।  ବଲାଙ୍ଗୀର ଠାରୁ ପଡୋଶୀ ରାଜ୍ୟ ରାୟପୁର କୁ ଅଳ୍ପ ରାସ୍ତା ହେଲା। ବାଣିଜ୍ୟ ଓ ପରିବହନ ପାଇଁ ଏକ ସୁଯୋଗ ସୃଷ୍ଟି ହେଲା। ଦୁଇଟି ବଡ ପୋଲ ହିଁ ଆଗଲପୁର ବିକାଶ ପାଇଁ ବଡ ସହଯୋଗ ରହିଲା। ବିଭିନ୍ନ ସଂପ୍ରଦାୟ ଲୋକେ ଏଠି ବସବାସ କରୁଥିବା ଆଗଲପୁର ଏବେ ହୁ ହୁ ବଢି ଚାଲିଛି। ଏହାକୁ ଦୃଷ୍ଟିରେ ରଖି ସରକାର ଗମନାଗମନ ସୁବିଧା ପାଇଁ ଏକ ବସ୍ ଷ୍ଟାଣ୍ଡ  ଅନୁମୋଦିତ କରିଛନ୍ତି। ସେହି ବସ୍ ଷ୍ଟାଣ୍ଡ କେବେ ଠାରୁ ନିର୍ମାଣ କାର୍ଯ୍ୟ ସମାପ୍ତ ହୋଇ ଆଗଲପୁର ଠାରୁ ବସ୍ ଗଡିବା ଆରମ୍ଭ ହୋଇଥାନ୍ତା କିନ୍ତୁ ବିଡମ୍ବନା ବିଷୟ ରାଜ୍ୟ ସଡକ ପରିବହନ ନିଗମ ଅଧିକାରୀ ଓ ପୂର୍ବତନ ତହସିଲଦାର ଙ୍କ ମଧ୍ୟରେ ଜାଗା ଚିହ୍ନଟ ରେ ଟଣା ଓଟଣା ହୋଇ ତାହା ପଡି ରହିଲା। ଏବେ ନୂତନ ତହସିଲଦାର ଯୋଗ ଦେବା ପରେ ତହସିଲଦାର ମହୋଦୟା ସ୍ଥାନ ନିରୁପଣ କରି ବିଭାଗୀୟ ଅଧିକାରୀଙ୍କୁ ହସ୍ତାନ୍ତର କରିଥିବା ସୁଚନା ମିଳିଛି। ରାଜ୍ୟ ସଡକ ପରିବହନ ନିଗମ ଅଧିକାରୀ ଯଥାଶୀଘ୍ର ନୂତନ ବସ୍ ଷ୍ଟାଣ୍ଡ ନିର୍ମାଣ କାର୍ଯ୍ୟ ଆରମ୍ଭ କରିବେ ଓ ଆଗଲପୁର ଠାରୁ ହିଁ ବିଭିନ୍ନ ଦିଗକୁ ବସ୍ ଗଡିବ ବୋଲି ଜଣାପଡିଛି। ଏବେ ଆଗଲପୁର ନୂତନ ତହସିଲଦାର ମହୋଦୟା ସରୋଜା ବେହେରାଙ୍କୁ ସବୁ ଦିଗରୁ ପ୍ରଶଂସା ର ସୁଅ ଛୁଟୁଛି।